27/08/2026
രാജ്യത്തെ റിയൽ എസ്റ്റേറ്റ്, ഭവന വിപണിയിൽ തിരുവനന്തപുരം വീണ്ടും ശ്രദ്ധേയ സാന്നിധ്യമായി മാറുന്നു. റിസർവ് ബാങ്ക് ഓഫ് ഇന്ത്യയുടെ (RBI) 2026-27 സാമ്പത്തിക വർഷത്തെ ആദ്യ പാദത്തിലെ House Price Index പ്രകാരം രാജ്യത്തെ ഭവനവിലകൾ വാർഷികാടിസ്ഥാനത്തിൽ 3.6 ശതമാനം ഉയർന്നു. ഇതിൽ ത്രൈമാസ വളർച്ചയ്ക്ക് പ്രധാന പിന്തുണ നൽകിയ നഗരങ്ങളിൽ തിരുവനന്തപുരം, ചണ്ഡീഗഡ്, ലഖ്നൗ എന്നിവ ഉൾപ്പെട്ടതായി റിപ്പോർട്ട് വ്യക്തമാക്കുന്നു.
ആദ്യ പാദത്തിൽ All-India House Price Index 1.1 ശതമാനം ഉയർന്ന് 117.5 ആയി. തിരുവനന്തപുരം അന്താരാഷ്ട്ര തുറമുഖത്തിന്റെ വളർച്ചാ സാധ്യതകൾ, ടെക്നോപാർക്കിന്റെ വിപുലീകരണം, പുതിയ IT, GCC നിക്ഷേപങ്ങൾ, വിമാനത്താവള വികസനം, നഗര അടിസ്ഥാന സൗകര്യങ്ങളിലെ പുരോഗതി എന്നിവയ്ക്കൊപ്പം തിരുവനന്തപുരം ശക്തമായ വളർച്ചാ നഗരമായി മാറുന്നതിന്റെ മറ്റൊരു സൂചനയായാണ് ഈ മുന്നേറ്റത്തെ കാണുന്നത്. വീടുകളുടെ വില വർധനവെന്നതിലുപരി, നഗരത്തിന്റെ നിക്ഷേപ ആകർഷണവും സാമ്പത്തിക വളർച്ചാ സാധ്യതകളും കൂടുതൽ ശക്തമാകുന്നതിന്റെ സൂചന കൂടിയാണ് പുതിയ കണക്കുകൾ നൽകുന്നത്.
