06/10/2020
المقبلين على بناء
🟣 قبل ان تبني الدار الجديد اقرأ بعض النصائح الاتية :-
■ الكهرباء بواري اسسوها
■ ابو الصحيات من يشتغل خلي ياسس مي السبلت بطريقة تخلصون من البوري مال تقطير
■ الخريطة الخريطة الخريطة صمموها زين و صفنو بيها هواية و اسالو ازيد من شخص مو الة مكتب انتو حسب احتياجكم و الي تشوفو يفيدكم
■ المطبخ لسوو صغير بحجة العائلة صغيرة منستفاد منة العائلة الصغيرة ترة تكبر
■ الاستقبال وسعو مو حرامات بي المساحة من تصيرلكم مناسبة و خطاطير
■ الدرج لسوو دائري يعدم المساحة وخوب اذا سويتو بي شباك هذا لا يتنظف ولا تكعدلة بردة
■ المناور درسو مكانها تكون مشمسة مو عكس الشمس
سوو مخزن سوو مخزن سوو مخزن
■ من تسوون المطبخ وانتة بمرحلة الطابوك كون مختارين مكان الطباخ وين و المفرغة حت تحطون مكان للهوز مال المفرغة لا الهوز الفضي يبقة ممدود بطول المطبخ
■ سوو مكان للغسالة من البداية صفنو بيها
■ بالكراج سوو كابينة الماطور بالحايط هوة و الغاز بحيث القنينة تفوت بالكابينة و الصوندة تاسيس للطباخ كلة دفن بالحايط و خلصو من سالفة الصوندة مال غاز بنص البيت
السخان ذبو بالسطح مو بالمنور و حطو ماطور بوستر حت تستفادون من المساحة
■ المبردة فكرو بيها من هسة و سوو تبريد دكتات و وحدة تبريد بالسطح و خلصو من منظرها البشع عالشبابيك
■ من تسوون جبسون بورد خلو السجة مال بردة تنخفي بي كلش مرتب يصير
■ باب الاستقبال سووها حصينة و باب المطبخ حديد عادي
■ المغسلة و التواليت تكرمون سووهن تعليك تخلصون من التكلسات جوة هالمكانين
■ المفرغة مال حمام لا تسووها عالشباك ترة مراح يتداور الهوة هيجي سوولها فتحة خاصة بيها
■ ابتعدو عن الاسود و الابيض بالارضيات ميتنظفن يبقن وصخات اختارو الوان محايدة ترهم علة كل الاثاث مثل البيج و لتاخذون ارضية دمراتها كلش بارزة محلوة تبين مطكعة
■ بالاجهزة الكهربائية و الطباخ اخذو كلة ستيل ميعتك و ميتوصخ يلمع يجنن يضل
■ لسوون سويت حمام بغرفة النوم اذا شرقي لو طابق ثاني ضلع كامل ميت و هم لازم اربع و عشرين ساعة جلف جلف جلف لان بنص الغرفة اقل جيفة خو بالصيف من تهيج ريحة المجاري موضوع كلش سخيف عدا انو الغرفة بيها يصير بابين علة كل ضلع وضلع شباك حت محيرة بترتيب الاثاث الافضل بصف باب الغرفة براتها و قريب عالغرفة
■ نزلو برامج هواية مال تاثيث حت يطيكم تصور البيت شونة و شون ترتيب الاثاث و ححط صور من عدة بالتعليقات شوفوهن مفيدات
■ تواليت الخطار ضروووورة بالبيوت ولو اني ضد فكرة انو خارج المنزل ف سوو داخل كليدور ارتب و اكشخ
■ الواجهة عوفو السيراميك و المرمر اختارو واجهات هندسية حلوة جماعة الحديد و الصبغ هم متكلف و هم عصرية اقصة شي ٣ ملايين سعرها
■ نرجع المناور كلها تسوي وية البيت البصفة علة اساس انو يعرض المنور و ينفه بالزايد حلوة السالفة بس مصيبة اذا جوارينكم يقررون يحولون منورهم مطبخ حار حت الهم الاكل و الكم الجيفة اني وية فكرة المنور يبقة نظيف و فارغ لتكومون بي قلاقيل فدوة
■ الشبابيك حديد لسوون ترة تزنجر و تعبر كومة وصاخة راح وكتها حطو لو pvc رخيص و عملي لو اذا عدكم فلوس سوو المنيوم ابو دبل زجاج حت عازل حرارة
■ بالبناء مال حيطان خلو يسوولكم عزل حراري شبكة حديد و فوم من الجهتين و السطح طبقة فووم قبل الشتايكر و خلصو من حرارة الصيف
■ السكككف سوو عاليييي ليكولولكم ٣ مترات اعلة شي ترة كلما اعلة اكشخ و انفه سوو ٣.٥ و اذ بي مجال سوو ٤
■ شكو كروب بناء دخلو بي نصائحهم ذهب
■ جوة الدرج لو تسوو حديقة صغيرة و نافورة ارتب بهواي من تسوو مخزن خصوصا اذا الحولي سويتو صالة ولو هم اني ضد هالشي لان صعبة تتبرد و تتدفة صيف شتا بس المساحة تحكم شنسوي
■ باب المنور سوو سلايد المنيوم كلة جام هم كانما شباك و هم ارتب يفوتلكم ضوة منة و المنور سوولة قفص حديد كلة للامان افضل
■ مكان السطح الي متجي شمس سوو شون كعدة خارجية خصوصا للناس الماعدهم حديقة سوو مكان منقلة شوي طابوك و مبردة خارجية و حدائق سنادين و فرشو الارضية ثيل اصطناعي و سوو سقيفة
■ السيراميك مال المطبخ لسوو مااات ولو جديد و حلو بس يموت ميتنظف اختارو glossy الي يلمع العادي حت لا يتعبكم بالتنظيف ها و لتجيبون سيراميك بي نقش بارز ينترس دهن خصوصا اذا مو مطبخ حار بارد
■ البياض خلي يشتغلو مساطر والبورك عوفو اخر شي ورة ما تتطبك الارضية حت ليتوصخ
■ الدرج لسوو بايات راح موديلها سوو صب
■الكاونتر سوو ملحق ويا يصعد للسكف هم احسن حت لا يصير دهن فوك الكاونتر و هم تستفادون من المساحة ولو غالي يصير المتر ب٤٠٠$ هيج شي بس مو خسارة
■ من تسوون الدكتات كون متتعارض وية الطابق الثاني ينخفي بالحايط كون و نفس الشي المفرغة من تسوون مال مطبخ حطو ببالكم الطابق الثاني ميتاثر
■ شغلة لتهملوها الحمام بالطابق الاول انصة من سكف البيت حت حمام الطابق الثاني متضطرون تسوولة دجة
الملاحظات اهوايه تحتاج الى كراس تعليمي بس راح اكتب الي اذكرها
..1~وضع مفرغه هواء بالبيتونه او اعلى منطقه بالبيت للتخلص من حراره الطابق الثاني لان الهواء الحار اخف من الهواء البارد ...
2~ربط جهاز( مانع الصعقه) ايرث لكج للسخان وخط المبردات لزياده الامان ...
3~تاسيس انبوب بلاستك للكامرات اذا ماردت تربطها هسه وايصال خط من الراوتر الى مكان جهاز التسجيل لتشغيله على النت...
4~وضع سويج تشغيل ماطور الماء الى اقرب نقطه في المطبخ والحمام اذا ما ردت تربط بوستر ..
5~اسس خطوط الكهرباء بالقياسات الصحيحه ومو اتخلي الكهربائي يمد الاسلاك وسط الحائط اختصارا للوقت والمواد ..الاسلاك تمتد من الاعلى وتنزل للنقاط ..
6~صور كل التاسيسات الماء والكهرباء قبل اعمال اللبخ والبياض حتى تذكر المسارات اذا صار خلل بالمستقبل..
7~اربط حساس فوتوسيل للاناره الخارجيه ليتم تشغليها واطفاها اوتوماتيك حتى اذا كنت خارج البيت ...
8~اسس خط للعاكسه ووضعها بالبيتونه بالمستقبل تحتاجها لعمل منظومه طاقه شمسيه وممكن تشغل عليه مولده منزل ...
9~تاسيس خط.ابوب بلابستك مثقب ووضعه داخل الاساس وحول البيت فقط.ليتم حقنه بماده الكلوريدين لمعالجه الارضه مستقبلا من خلال منفذ خلف البيت مثلا...
10~عمل سقوف ثانويه لغرف الطابق الثاني بدلا من اللبخ او البياض وبنفس الكلفه تقريبا.
11~استخدم الفوم (فلين )تحت الشتايكر لزياده العزل
12~تصوير كل مسارات الماء والكهرباء ....
