مجمعات بغداد السكنية : Baghdad residential complexes

  • Home
  • Iraq
  • Baghdad
  • مجمعات بغداد السكنية : Baghdad residential complexes

مجمعات بغداد السكنية : Baghdad residential complexes صفحة مهتمة بنشر كافة التفاصيل والمعلومات عن المجمعات السكنية في بغداد

15/04/2026

هيئة استثمار بغداد
الى موظفين واداريين الهيئة رجاءا نريد توضيح من حضراتكم بخصوص اسعار الوحدات السكنية ببغداد لازم تكون بالدينار العراقي لو بالدولار ؟؟
لان حسب ما اذكر عدكم قرار صدر ببداية سنة ٢٠٢٣ انه لازم الوحدات السكنية بالمجمعات الاستثمارية تكون مسعرة وتباع بالدينار العراقي حصرا والعقود القديمة الي جانت مثبتة بالدولار فيتم التسديد بالدينار العراقي على سعر صرف البنك المركزي … شنو هذا القرار تم الغاءه ؟؟؟ لان حاليا المستثمرين ديثبتون اسعار الوحدات السكنية بالعقود بعملة الدولار مو بالدينار العراقي .. فيرجى التوضيح

هيئة استثمار بغداد تسحب بعض الاجازات الاستثمارية من عدة مجمعات
23/07/2024

هيئة استثمار بغداد تسحب بعض الاجازات الاستثمارية من عدة مجمعات

12/04/2024

جمعة مباركة اعزائي
سؤال للاستطلاع : اذا ساكن بمجمع سكني شكد تشوف المبلغ المناسب للخدمات ؟

09/04/2024

عيد فطر مبارك تقبل الله صيامكم وقيامكم .. يعود عليكم بالخير والبركة ان شاء الله ويارب يرزق الجميع بسكن مناسب ومريح

هاي الصورتين لمجمع بوابة العراق .. وحدة من جان قيد الانشاء وبس اول ٥ عمارات كاملة والثانية حاليا وتقريبا ٤٠ عمارة كاملة…...
02/03/2024

هاي الصورتين لمجمع بوابة العراق .. وحدة من جان قيد الانشاء وبس اول ٥ عمارات كاملة والثانية حاليا وتقريبا ٤٠ عمارة كاملة… شنو تتخيلون شكد تاريخ الصورة الاولى بيا سنة ؟

23/01/2024

هذا المنشور هم من المنشورات الطويلة والخلاصة مالته بالنهاية
اكثر مكاتب العقارات والمستثمرين بالمجمعات السكنية يستهدفون المجمعات التابعة لشركات معروفة بسرعة البناء وصعود الهياكل .. مثل شركة امواج وشركة الغدير ومجموعة الايادي المتحدة وغيرها من الشركات الي صار الها اسم بانجاز المشاريع السكنية .. ليش المستثمرين بالعقارات يستهدفون المجمعات التابعة لهاي الشركات .. لان الي ديصير من يفتح مجمع لوحده من هاي الشركات دينحجز بالكامل خلال ايام قليله فهمه يروحون يحجزون عدد جبير من الشقق وطبعا همه ماعدهم فلوس كامله لهاي الشقق ويدفعون المقدمة وينتظرون وراها من تصعد الهياكل وتبدي تبين ملامح المجمعات يبدون يبيعون قسم من الشقق او الوحدات السكنية بارباح عاليه ويسددون باقي الشقق وهكذا … يعني مثلا يروح يحجز ١٠ شقق ويدفع المقدمات مالتها ووره ٤ او ٥ اشهر يدفع الدفعة الاولى مال ال١٠ شقق وراها قبل ما يجي موعد القسط الثاني يكون قسم من هياكل المجمع صاعده فيصير طلب ورغبة من الناس انه يشترون بالمجمع .. همه يخلون نسبة ارباح جيدة ويبيعون فد ٤ شقق من هاي ال١٠ .. بفرق نسبة الارباح يسددون القسط الثاني لل ٦ شقق المتبقية وهكذا الى ان تبقى فد شقة للنهاية وهاي من يبيعوها تكون تقريبا ارباح صافيه … الاعتماد بهاي الطريقة يكون على سرعة صعود الهياكل بالمجمع وسرعة الانجاز … حاليا الي مستثمرين بهاي الطريقة باحد المجمعات الي دتنبني بمطار المثنى نكدر نكول انه ماكلين بوري او متورطين .. ليش ؟ لان هياكل المجمع لحد الان مصاعده ! هم ليش ؟ لان هذا المجمع الكراج مالته حيكون تحت الارض وطبعا اعمال الحفر وبناء الكراجات تحت الارض تاخذ فترة طويلة .. فالي صار همه سددوا الدفعة الاولى وراح يجي موعد الدفعة الثانية والهياكل بعدها ما مبينه .. صح المجمع محجوز بالكامل بس الناس بعدها ماعدها رغبة تدفع فلوس الشقة كاملة وتشتريها من مكتب عقارات لو دلال وهي بعدها الهياكل مكاملة … اني نزلت هذا البوست كنصيحة للناس من تريد تشتري شقة بمجمع تابع لشركة معروفة الافضل تروح تاخذ من الشركة بصورة مباشره واذا محصلت واضطريت بعدين تروح تشتري من دلال او بياع شراي فجيك اسعار المجمع واعرف هو ببيش مشتري شقتك بالاصل واضغط عليه بالسعر وخليله فد ٥ الى ١٠ ملايين بالزايد فوك سعر الشقة واخذها منه لان همه مضطرين يبيعون بالاخص اذا صار تاخير بانجاز الهياكل مثل الحالة الي ذكرتها وموعد الدفعة الثانية او الثالثه صار قريب ( يعني احسبها شوكت المجمع فتح مبيعات وشوف جدول الدفعات وانت راح تعرف الدلال الي مشتري الشقة الي تريد تشتريها شوكت راح يكون مضطر يسدد الدفعة الثانية او الثالثة ) واستخدم هاي الشغلة كورقة ضغط واذا شفت الدلال قافل ولازم سعر عوفه وروح دور يم غيره الى ان توكع بواحد مضطر يبيع بربح معقول حتى يسدد باقي الدفعات الي عليه.

هاي الدراسة تم نشرها من قبل وزير الاعمار والاسكان والبلديات العامة قبل ايام قليلة .ملخص الدراسة عدنه ببغداد عجز بعدد الو...
18/01/2024

هاي الدراسة تم نشرها من قبل وزير الاعمار والاسكان والبلديات العامة قبل ايام قليلة .
ملخص الدراسة عدنه ببغداد عجز بعدد الوحدات السكنية ٥٧٧٦٧١ وحدة سكنية طبعا بعد اضافة عدد الوحدات السكنية للمشاريع الاستثمارية قيد الانشاء وبعد اضافة الوحدات السكنية للمدن الجديدة ( الجواهري وغيرها ) ( الي هي ١٤٧٨٤٢ وحدة سكنية ) .
نسبة العجز هي ٣٤٪؜ لغاية عام ٢٠٢٣

01/01/2024

سنة سعيدة وكل عام وانتم بخير وان شاء الله تحقيق جميع امانيكم خلال ال ٢٠٢٤
لحد الان اشوف هواية منشورات وتعليقات لناس يسئلون شلون يضمنون انه صاحب المجمع مراح ياخذ فلوسهم وينهزم او يسئلون اذا فلان مجمع امان او لا.
اكو اشياء اذا شفتوا المستثمر او الشركة المستثمرة مسويها فراح تعرفون انه وضع المجمع تمام.
اولا .. ينذكر بالعقد اسم المجمع واسم الشركة المستثمرة
ثانيا .. يكون مذكور بالعقد رقم اجازة الاستثمار ومن تروحون تجيكون بهيئة الاستثمار تلكون هاي الاجازة صادرة بنفس اسم المجمع المذكور عدكم بالعقد ولصالح نفس الشركة المستثمرة المذكورة بالعقد
ثالثا .. يكون مذكور بالعقد رقم الحساب المصرفي الي يتم بي توديع دفعات او اقساط العقار .. والحساب المصرفي لازم يكون بنفس اسم الشركة المستثمرة.
رابعا .. يرفق بالعقد نسخة من سند الارض الي العقار راح يكون بيها والسند يكون بأسم الشركة المستثمرة
هسه انت شراح يصير عندك .. حيصير عندك عقد شراء عقار من شركة مستثمرة و هاي الشركة المستثمرة عندها اجازة من هيئة الاستثمار ببناء مشروع بارض معينة … عقارك الي راح تدفع عليه فلوس حيكون بارض باسم هاي الشركة وانت دتدفع فلوس لحساب مصرفي باسم هاي الشركة .. هنا انت المفروض تكون مأمن ورغم هذا هم لازم تفكر بالموضوع صح.
يعني تشوف موقع المشروع واذا قيمة المقدمة تتناسب مع الموقع الي راح يكون بي العقار وتشوف هم نسب الانجاز بالمشروع شكد وتاريخ المستثمر شنو ؟ اكو شركات عدنا صار الها اسم يعني من تسجل على مشروع تابع الهم تكدر تكون مأمن انه انت راح تستلم عقارك بالنهاية يعني ممكن يصير تأخير بس المستثمر يكمل المشروع.
وبعد اذا عدكم نقاط اضافية تكدرون تذكروها بالتعليقات حتى الكل ينتبهون عليها.

01/12/2023

اكو مجمع بغرب بغداد .. جديد … بناء افقي وبي عمارات هم .. المستثمر شركة عربية خليجية
اذا تريدون تشترون يمهم لغرض السكن فماكو مشكلة بس اذا تريد تشتري لغرض الاستثمار فخلي ببالك لازم تكمل الدفعات للنهاية وتستلم الوحدة السكنية يلا تكدر تبيع … غير هذا الشي مراح تكدر تبيع وراح تخسر عمولة الشركة وتاخذ فلوسك نفسهن الي دفعتهن وتكعد … اني عليه انصحكم والباقي بكيفكم

هذا عرض بناء لاحد شركات بناء الدور السكنية .. لاحظوا بالعرض ذاكرين اكثر التفاصيل وطبعا بالعقد المبرم بين الزبون والشركة ...
15/11/2023

هذا عرض بناء لاحد شركات بناء الدور السكنية .. لاحظوا بالعرض ذاكرين اكثر التفاصيل وطبعا بالعقد المبرم بين الزبون والشركة عدهم استعداد يكتبون تفاصيل ادق ( مثلا يكتبلك السويج بلك والسبوت لايت حتكون نوع اوزن التركي ) او مثلا يكتبلك تأسيسات الكهرباء حتكون من فلان منشأ وفلان شركة وطبعا هو كاتب الجدران من اي نوع طابوق والحديد( الشيش ) اي نوع والسيراميك والمرمر خال المنشأ والقياس لان القياس كلش يأثر بالسعر من حيث سعر المواد وسعر العمل وكاتبين اكثر تفاصيل البناء وبالعقد انت كزبون تكدر تطلب تفاصيل اكثر …
سؤالي هو : اكو شركة عقارية استثمارية تكتب هيج تفاصيل بالعقود المبرمة ويه الزبائن ؟ لو بس يكولون بناء درجة اولى او ممتاز بدون اي تفاصيل ؟؟
اني لحد الان ممصادف اي شركة تذكر هيج تفاصيل بالعقد اذا انتوا مصادفين ياريت لو تذكرون اسم الشركة والمجمع بالتعليقات حتى الناس تستفاد

13/11/2023

سالفة وبيها رباط .. قبل ١٢ سنة وتحديدا عام ٢٠١١، شركة شوفرلية نزلت تاهو بشكل جديد وطبعا بذاك الوقت السيارات التاهو جانت اعدادها اقل بالشوارع لان الموديلات القديمة مجانت كلش طاشة عدنه بس موديل ٢٠١١ نزل بشكل حلو ويختلف اذا تتذكروا … المهم اكو تاجر مال سيارات جبير باربيل جان جايب وجبة تاهوات بال٢٠٠ سيارة تقريبا وسوه عليها اعلانات باربيل والشمال وكلب الدنيا بس السيارات جانت نايمه ومدتمشي الى ان فد يوم سوه فد حركة تسويقية … كام اتصل بشخص اقاربه يشتغل برلماني ببرلمان اربيل … كله تعال عندي الك هدية .. جابه وكعده ونطى تاهو جديده هدية وكله اريد ارقام تلفونات فد عشر برلمانين ثقه وياك بالبرلمان هم اريد انطيهم سيارات هدية .. وجابهم كلهم ونطاهم تاهوات هدية ببلاش بس اتفق وياهم انه همه ميكولون هاي ببلاش .. يكولون اشتريناها من فلان معرض وبكذا سعر واخذ حجايه منهم انه يستخدموها للسيارات ويطلعون بيها دائما مو يضموها لو يبيعوها … خلال ٦ اشهر من هاي الحركة صاحب المعرض كدر يبيع كل ال٢٠٠ سياره الي جان جايبها ووصى على وجبه لخ ٢٥٠ سيارة حتى ينزلها للسوك .
رباط السالفة انه هاي الحركة التسويقية تعتمد على الغيرة وهي تعتبر اخر سلاح تسويقي يستخدمه التاجر لو المستثمر لو الشركة التسويقية بلاخص من البضاعة المسوق الها تكون غالية ومكلفة … حاليا اكو بعض المجمعات السكنية الي اسعارهم هي اغلى الاسعار ديستخدمون هاي الحركة .. فلا تستغربون اذا تطلعلكم مغنية لو عارضة لو اي شخص من الي ديطشون بهذا الوقت يكللكم اني اشتريت شقة وشقتين بفلان مجمع لو اشتريت كذا فيلااا بفلان مجمع هاي كلها طرق تسويق حتى باقي اصحاب الاموال من نفس الطبقة تكب عدهم الغيرة ويروحون يشترون بنفس المجمع … وخلوا ببالكم المجمع الي يسوي هيج شي معناتها اسعاره غاليه واذا عدكم امكانية تشترون يمهم فلا تقبلون بالاسعار الي همه يخلوها .. لا .. تفاوضوا وياهم واضغطوا عليهم وراح تحصلون اسعار هوايه اقل من اول سعر .

Address

Baghdad International Airport Road, بغداد
Baghdad

Website

Alerts

Be the first to know and let us send you an email when مجمعات بغداد السكنية : Baghdad residential complexes posts news and promotions. Your email address will not be used for any other purpose, and you can unsubscribe at any time.

Shortcuts

Share

Category