25/06/2024
Ганбаатарын эсрэг Эрдэнэ...
За нөгөө муу хэлж, модоор балбаад, барьж авч, батирч унагаад байдаг Эрдэнэ чинь гандан буурна аа л гэж байхгүй ажээ. Баянголд Уул уурхайн сайд Ганбаатарын багийн эсрэг зогсож байгаа юм байна. Энэ хүнийг монголчууд бүтэн жил бүүр хамаг муугаар нь баалсан шүү дээ. АН-ыг халааслачихаад, дарга ч үгүй, дагуул ч үгүй болголоо гэлцээд, тал талаас нь тарж унатал гоочилсон. Үнэндээ бол Эбигийн эсрэг сөрсөн сүүлчийн гөжүүд улстөрч, Женокийн өмнө хөндөлссөн сүүлчийн жинхэнэ бодлоготон байсан юм билээ. Одоо л энэ үнэн, эл баримттайгаа худлыг гүйцээд ирж байна даа. Үнэндээ бол Эби Женок хоёр АН-ыг хувааж идэж, хувьчилж өвөрлөхийн эсрэг л элдвээрээ хэлүүлээд зогсоод байсан хүн юм билээ. С.Эрдэнийн багт дандаа залуус ажиллаж байна, Монголын боловсролын салбарт зайлшгүй нэвтрүүлэх ёстой, хиймэл оюун ухаанд суурилсан дижитал технологи ашиглан мөрийн хөтөлбөрөө танилцуулж байгаа болохоор хаяа залгаа өөр дүүргийнхэн сонирхоод оччихсон, нүд тайлж, чихээ онгойлгож явна. С.Эрдэнэ олон арван хууль зүтгүүлэн санаачилсны нэг нь Нийгмийн даатгалын хуульд оруулсан нэмэлт өөрчлөлтөөр ганзагын наймаанд улс орноороо мордсон 10 жилийн эзэнгүйдлийг нөхөж, иргэдийн даатгалыг нөхөн төлсөн явдал юм. Энэ хуулийн үр шим одоо ч үргэлжилсээр, олон мянган хүнийг тэтгэвэртэй, амьдралын баталгаатай нь залгуулсаар байгаа. Баянголд бандайтал ноёрхлоо тогтоосон Ганбаатарын эсрэг Эрдэнэ л сөрдөггүй юм бол өөр зогсох хүч байхгүй. Энэ удаа С.Эрдэнэ бас л зэвүүн улстөрч гэдгээ харуулж, МАН-ын хамгийн нөлөө бүхий тэрбумтны эсрэг залуусаа ахлан зогсож байна. "Бүх төрлийн татварыг эрс буулгах, төрийн данхар бүтцийг багасгаж, цомхон болгоно" хэмээж буй С.Эрдэнэ аймшгийн өндөр татвартаа дассан, татварын дарангуйлал дор мөлхдөг бидэнд мартсаныг маань сануулж байна. Нээрэн энэ татварууд яагаад өсөөд байдаг юм бол, яагаад буулгах тухай хэн ч ярихаа больчихов ооо? Дээр нь Ганбаатар Уул уурхайн сайд болоод Монголын орд газруудын лицензийг туршлага, татвар төлөлт, техник эдийн засгийн тооцоо, үзүүлэлт эс харгалзан, зөвхөн асар их мөнгө амласанд нь шууд өгдөг журам баталсан, тэнд мөнгөтэй урд хөршийнхөнд халаас нимгэн монголчууд бут ялагддаг болсон, удахгүй уул болгон ухсан нүх, уурхай болгон хятадуудаар дүүрнэ. Тиймээс С.Эрдэнийг бах мэлхий байсан ч дэмжээд өг, яадын за, наад чинь заргач, наалдаад гэвтэхээ мэднэ!
