21/09/2021
រដ្ឋាភិបាលវៀតណាម ត្រូវតែមានកាតព្វកិច្ចអនុវត្តតាមលិខិតុបករណ៍ ដែលបានផ្តល់សច្ចាប័នដល់ច្បាប់អន្តរជាតិជាច្រើន ស្តីពីសិទ្ធិមនុស្ស និងរដ្ឋធម្មនុញ្ញ ជាច្បាប់កំពូលរបស់ខ្លួន ដើម្បីធានាការពារសិទ្ធិជនជាតិដើមខ្មែរក្រោមម្ចាស់ស្រុក
------------------------
វៀតណាម បារម្ភខ្លាចពលរដ្ឋខ្មែរក្រោម យល់ដឹងអំពី «ច្បាប់អន្តរជាតិ» ទើបចាប់ដកយកសៀវភៅ ពីយុវជនខ្មែរក្រោម ដែលបោះពុម្ពដោយអង្គការសហប្រជាជាតិ ។ ពីព្រោះថា កាលណាពលរដ្ឋខ្មែរក្រោម ទទួលបានចំណេះដឹងគ្រប់គ្រាន់ខាងផ្នែកផ្លូវច្បាប់ ដែលមានចែងក្នុងច្បាប់អន្តរជាតិ ក្នុងនោះ មានដូចជា កតិកាសញ្ញា អនុសញ្ញា និងសន្ធិសញ្ញាអន្តរជាតិ ដែលប្រទេសវៀតណាម បានចុះហត្ថលេខា និងផ្តល់សច្ចាប័ន ជាមួយនឹងអង្គការសហប្រជាជាតិនោះ ។ ជាពិសេស «សិទ្ធិជនជាតិដើម» ដូច្នេះហើយ ពួកគាត់ នឹងយល់ដឹង ពីអ្វីដែលរដ្ឋាភិបាលវៀតណាម មានកាតព្វកិច្ចសន្យានឹងអង្គការសហប្រជាជាតិ ។ ពេលនោះហើយ ពួកគាត់ នឹងមានសេចក្តីក្លាហាន ក្នុងការជ្រើសរើសយកផ្លូវ «សិទ្ធិសម្រេចវាសនាខ្លួន ដោយខ្លួន» ទៅថ្ងៃអនាគត ។
នៅទីនេះ យើងគ្រាន់តែលើកយកសេចក្តីប្រកាសអង្គការសហប្រជាជាតិស្តីពី «សិទ្ធិជនជាតិដើម» ប៉ុណ្ណោះ ដែលបង្ហាញឲ្យឃើញថា រដ្ឋាភិបាលវៀតណាម ដែលជារដ្ឋភាគីមួយនៃសេចក្តីប្រកាសនេះ មិនបានគោរពនូវកាតព្វកិច្ចរបស់ខ្លួនក្នុងការលើកកំពស់សិទ្ធិសេរីភាពរបស់ខ្មែរក្រោម ដែលមានចែងនៅក្នុងសេចក្តីប្រកាសរបស់អង្គការសហប្រជាជាតិនេះឡើយ ។
សូមបញ្ជាក់ថា នៅថ្ងៃទី ១៣ ខែកញ្ញា ឆ្នាំ ២០២១ គឺជាខួប ១៤ ឆ្នាំនៃការប្រកាសឱ្យប្រើសេចក្តីប្រកាសអង្គការ សហប្រជាជាតិស្តីពី «សិទ្ធិជនជាតិដើម» ។ សេចក្តីប្រកាសនេះ បានចែងនូវសិទ្ធិសេរីភាព ជាមូលដ្ឋាននានា ដែលជនជាតិដើមនៅលើពិភពលោកត្រូវទទួលបាន ក្នុងនោះក៏មានពលរដ្ឋខ្មែរក្រោម ផងដែរ ។
សេចក្តីប្រកាសស្តីពី «សិទ្ធិជនជាតិដើម» មានទាំងអស់ ៤៦ មាត្រា ដែលចែងអំពីសិទ្ធិសេរីភាពជា មូលដ្ឋានជាច្រើនរបស់ជនជាតិដើម រួមមានទាំងសិទ្ធិពលរដ្ឋ នយោបាយ សេដ្ឋកិច្ច សង្គម និង វប្បធម៌ ជាពិសេស គឺសិទ្ធិស្វ័យសម្រេច ឬសិទ្ធិសម្រេចវាសនាខ្លួនដោយខ្លួនឯង មានន័យថា ជនជាតិដើមអាចធ្វើសេចក្តីសម្រេចចិត្ត អំពីស្ថានភាពនយោបាយរបស់ខ្លួនដោយសេរី និងធ្វើ ការអភិវឌ្ឍសេដ្ឋកិច្ច សង្គម និងវប្បធម៌របស់ខ្លូនដោយសេរីផងដែរ ។
ទោះបីជាយ៉ាងណាក៏ដោយ ក្នុងនាមជារដ្ឋភាគី គេសង្កេតឃើញថា គិតមកដល់ថ្ងៃទី ១៣ ខែកញ្ញា ឆ្នាំ ២០២១ នេះ គឺមាន រយៈពេល ១៤ ឆ្នាំហើយ រដ្ឋាភិបាលវៀតណាម មិនបានគោរពពេញលេញសិទ្ធិពលរដ្ឋខ្មែរក្រោម ជាជនជាតិដើមម្ចាស់ស្រុកឡើយ ។ រដ្ឋាភិបាលវៀតណាម មិនព្រមទទួលស្គាល់ខ្មែរក្រោម ជាផ្លូវការថា ជាជនជាតិដើមនោះទេ បើទោះជាខ្មែរក្រោម គឺជាម្ចាស់ទឹកដីមានវត្តមាន នៅដែនដីកម្ពុជាក្រោម តាំងពីដើមមក មានភាសា អក្សរសាស្រ្ត ប្រពៃណី វប្បធម៌ ទំនៀមទំលាប់ សាសនា និងតឹកតាងប្រវត្តិសាស្រ្ត ជាច្រើន ។
ការមិនគោរពកាតព្វកិច្ចអនុវត្តតាមលិខិតុបករណ៍ ដែលរដ្ឋអំណាចវៀតណាម បានផ្តល់សច្ចាប័នជាមួយអង្គការសហប្រជាជាតិ មកលើជនជាតិដើមខ្មែរក្រោមនោះ តាមរយៈការធ្វើទុក្ខបុកម្នេញ ដូចជា ការរើសអើងជាតិសាសន៍ ការបំបិទសិទ្ធិសេរីភាពបញ្ចេញមតិ សេរីភាពក្នុងការជួបប្រជុំ ការរំលោភយកដីធ្លី ការចាប់ខ្លួនពលរដ្ឋខ្មែរក្រោម ដាក់ពន្ធនាគារដោយអយុត្តិធម៌ សេរីភាព ក្នុងការសិក្សាភាសាខ្មែរ និងប្រវត្តិសាស្រ្តកម្ពុជាក្រោម ការរឹតត្បិតលើសេរីភាពប្រតិបត្តិជំនឿ សាសនា សេរីភាពក្នុងការទទួលបានឱកាសអប់រំខ្ពង់ខ្ពស់ សិទ្ធិមាន តំណាងរបស់ខ្លួននៅក្នុង ជួររដ្ឋាភិបាល និងសិទ្ធិទទួលបានការដោះស្រាយបញ្ហាដោយយុត្តិធម៌ជាដើម ។
ធ្ងន់ធ្ងរជាងនេះទៀត អាជ្ញាធរវៀតណាមមិនត្រឹមតែបំពេញកាតព្វកិច្ចរបស់ខ្លួន ក្នុងការផ្សព្វផ្សាយសេចក្តីប្រកាសទៅកាន់ជនជាតិដើម ដែលស្ថិតនៅក្រោមការគ្រប់គ្រងរបស់ខ្លួនប៉ុណ្ណោះទេ ប៉ុន្តែ បានសម្លុតបំភ័យ គំរាមកំហែង និងធ្វើទុក្ខបុកម្នេញ យុវជនខ្មែរក្រោមដែលបានខិតខំ បោះពុម្ពសៀវភៅសិទ្ធិជនជាតិដើម ដើម្បីសិក្សាឈ្វេងយល់ទៅវិញ ។
ករណីនេះ ធ្លាប់បានកើតឡើង ចំពោះយុវជនខ្មែរក្រោម យឿង ខាយ ដែលត្រូវអាជ្ញាធរ វៀតណាមខេត្តដូនណៃរឹបអូសយកសៀវភៅ «សិទ្ធិជនជាតិដើម» ជាង ១០០ ក្បាល និងត្រូវ នគរបាលឃាត់ខ្លួនសួរចំលើយអស់ជាច្រើនម៉ោង ។
ករណីដូចគ្នានេះ ក៏បានកើតឡើងចំពោះពលរដ្ឋខ្មែរក្រោម លោក ថាច់ ថា នៅខេត្តព្រះត្រពាំង ដែលត្រូវបានអាជ្ញាធរស្ទាក់ឃាត់ម៉ូតូរឹបអូសយកសៀវភៅ ស្តីពី «សិទ្ធិជនជាតិដើម» ចំនួន ១៥០ ក្បាល ។ ក្រៅពីនោះ ក៏នៅមានករណីសម្លុតបំភ័យ គំរាមកំហែង ជាច្រើនផ្សេងទៀត ដូចជា ការឃាត់ខ្លួនពលរដ្ឋខ្មែរក្រោម សួរនាំពីរឿងពាក់អាវយឺត ការរឹបអូសយកអាវយឺតសិទ្ធិមនុស្ស និងការវាយឆ្មក់ចូលផ្ទះយុវជនខ្មែរក្រោម រុករកសៀវភៅសិទ្ធិមនុស្សជាដើម ។
ជាអនុសាសន៍របស់ក្រុមអង្គការសិទ្ធិមនុស្សអន្តរជាតិ រដ្ឋាភិបាលវៀតណាម ត្រូវតែទទួលស្គាល់ឋានៈជាជនជាតិដើមម្ចាស់ស្រុករបស់ខ្មែរក្រោម និងទាមទារឱ្យវៀតណាម ត្រូវតែធានាការពារ និងគោរពសិទ្ធិសេរីភាពរបស់ខ្មែរក្រោម ដែលមានចែងនៅក្នុងសេចក្តីប្រកាសអង្គការ សហប្រជាជាតិស្តីពី «សិទ្ធិជនជាតិដើម» និងឧបករណ៍សិទ្ធិមនុស្សអន្តរជាតិនានា ៕ រូបត្លុកពី Internet
