23/11/2025
នេះជាជនញៀនថ្នាំដែលដុតសម្លាប់សាច់ញាតិរបស់ខ្លួនទាំងក្មេងទាំងចាស់៨នាក់ ហើយកាប់អ្នកមករារាំងតាមផ្លូវស្លាប់ម្នាក់ទៀត តែជននេះត្រូវកម្លាំងនគរបាលចាប់ខ្លួន នៅថ្ងៃទី២៣ ខែវិច្ឆិកា ឆ្នាំ២០២៥ នៅឃុំទួលសំបួរ ស្រុកស្ទឹងត្រង់ ខេត្តកំពង់ចាម។
តាមពិតករណីព្រៃផ្សៃបែបនេះ ខ្ញុំមិនចង់ផ្សាយឡើយ ហើយទាំងអាជ្ញាធរ និងសមត្ថកិច្ច ចង់ឲ្យដកចេញទៀតផង។
មួយជ្រុងនៃការមិនផ្សាយ ព្រោះតែសាហាវយង់ឃ្នងពេក ដែលសង្គមជាតិរបស់យើង កាន់សាសនាព្រះពុទ្ធ មិនគួរកើតមានឡើយ ហើយម្យ៉ាងទៀត វារុញមុខមាត់សង្គមជាតិរបស់យើងកាន់តែអាក្រក់។
តែបើយើងគិតម្យ៉ាងទៀតថា បើម្នាក់ៗនាំគ្នាធ្មេចភ្នែក ហើយធ្វើគថ្លង់ ចំពោះបញ្ហាសង្គមមួយនេះ តើពេលណា សង្គមយើងបានសុខសាន្ត ហើយអាចលុបបំបាត់គ្រឿងញៀននេះបាន?
យើងត្រូវរុញរឿងនេះ ដើម្បីជាការភ្ញាក់រលឹក និងជាសារព្រមានដល់អាជ្ញាធរ និងសមត្ថកិច្ចរបស់យើងទាំងអស់តាមមូលដ្ឋាន ត្រូវតែពួតដៃគ្នា កម្ចាត់ដង្កូវសង្គមមួយនេះចោល។
ពេលនេះហេតុការណ៍មិនទាន់បានកើតឡើងលើសាច់ញាតិរបស់យើងផ្ទាល់ យើងមិនដឹងពីទំហំនៃការឈឺចាប់នោះឡើយ។ បើយើងបណ្តែតបណ្តោយឲ្យបញ្ហានេះ កាន់តែចាក់ឬសខ្លាំងឡើង តើយុវជនយើងទៅមុខទៀត អាចក្លាយជាជន្ទល់ និងខឿនកសាងសង្គមជាតិដែរទេ?
ប៉ុន្មានថ្ងៃមុននេះ នៅមូលដ្ឋានខណ្ឌដង្កោ ក៏កើតឡើងករណីនេះដែរ ដោយជនញៀនថ្នាំម្នាក់ បានដុតផ្ទះរបស់ខ្លួនរហូតស្លាប់ និងរបួស។
យើងត្រូវរួមគ្នាកម្ចាត់គ្រឿងញៀនចេញពីសង្គមជាតិរបស់យើង។ តើបងប្អូនយល់យ៉ាងណាដែរ គួរផ្សាយរឿងបែបនេះ ឬមិនផ្សាយ?
update: រដ្ឋបាលខេត្តកំពង់ចាម បានបញ្ជាក់ថា ក្រោយពិនិត្យទឹកនោម មិនឃើញមានសារធាតុញៀន តែនៅយកឈាមទៅពិនិត្យបន្តទៀត។
