25/03/2022
មកស្គាល់ផ្លូវក្រវាត់ក្រុងទាំង ៤ ! https://t.me/cambodiaringroad
✅ផ្លូវក្រវ៉ាត់ក្រុងទី១៖ ផ្លូវក្រវ៉ាត់ដំបូងគេបង្អស់នៅរាជធានីភ្នំពេញនេះ ត្រូវបានសាងសង់តាំងពីសម័យសង្គមរាស្រ្តនិយម នៅក្នុងទីតាំងខណ្ឌចំនួន៤ មានខណ្ឌដូនពេញ ខណ្ឌ៧មករា ខណ្ឌចំការមន និងខណ្ឌទួលគោក។ ផ្លូវនេះតភ្ជាប់ពីគីឡូម៉ែត្រលេខ៩ (ផ្លូវជាតិលេខ៥) ភ្ជាប់ផ្លូវសុផារ៉ា និងផ្លូវ ៥៩៨ ត្រលោកបែក ទៅផ្លូវ ២៧១ រហូតដល់គល់ស្ពានច្បារអំពៅ តភ្ជាប់ជាមួយផ្លូវជាតិលេខ១។
✅ផ្លូវក្រវ៉ាត់ក្រុងទី២៖ សាងសង់កាលពីឆ្នាំ ២០១៦ (ដាក់ឲ្យប្រើប្រាស់ឆ្នាំ២០១៩) ដោយមាន២កំណាត់ ប្រវែងសរុបជាង ២៧គីឡូម៉ែត្រ។ កំណាត់ទី១ មានប្រវែង ១០គីឡូម៉ែត្រ តភ្ជាប់ពីផ្លូវទំនប់កប់ស្រូវ (ឬផ្លូវ120K) ឆ្ពោះទៅកាន់មហាវិថីសហព័ន្ធរុស្សី។ កំណាត់ទី២ ប្រវែង ១៧គីឡូម៉ែត្រ តភ្ជាប់ពីមហាវិថីសហព័ន្ធរុស្ស៊ី (ត្រង់ស្តុបផ្សារដីហុយ) ទៅផ្លូវលេខ ១០១៩ កាត់តាមផ្លូវ North Bridge ផ្លូវទ្រុងមាន់ ផ្លូវមុខរោងចក្រអគ្គិសនី ផ្លូវមុខសហគមន៍អន្លង់គង ផ្លូវទំនប់ ៧មករា ផ្លូវ ៦០ម៉ែត្រ តភ្ជាប់ទៅផ្លូវជាតិលេខ២ ត្រង់ចំណុចគល់ស្ពានព្រែកហូរផ្នែកខាងជើង ភ្ជាប់ស្ពានព្រែកសំរោងតាខ្មៅ។
✅ផ្លូវក្រវ៉ាត់ក្រុងទី៣ ជាខ្សែផ្លូវថ្មីដែលតភ្ជាប់ផ្លូវជាតិសំខាន់ៗរបស់ប្រទេសកម្ពុជា ដោយចាប់ពីស្ពានព្រែកព្នៅ នៅផ្លូវជាតិលេខ៥ ឆ្លងមកផ្លូវជាតិលេខ៤ ភ្ជាប់មកផ្លូវជាតិលេខ៣ ផ្លូវជាតិលេខ២ ផ្លូវជាតិលេខ២១ និងផ្លូវជាតិលេខ១ ភ្ជាប់មកកំពង់ផែភ្នំពេញថ្មី។ មានទំហំទទឹងផ្លូវរហូតដល់ទៅ២៧ម៉ែត្រ សម្រាប់ទីប្រជុំជន ក្រៅទីប្រជុំជនវិញមានទំហំទទឹងផ្លូវ ២៥ម៉ែត្រ។
✅.ផ្លូវក្រវាត់ក្រុងទី៤៖ គម្រោងស្ថាបនាផ្លូវក្រវាត់ក្រុងទី៤ ត្រូវបានសិក្សាចប់រួចរាល់ហើយ។ ផ្លូវក្រវាត់ក្រុងទី ៤ មានប្រវែង ១៩៥គីឡូម៉ែត្រ ឆ្លងកាត់ខេត្តចំនួន៤ គឺខេត្តកំពង់ស្ពី តាកែវ កណ្តាល និងខេត្តព្រៃវែង ដោយកាត់ខេត្តកំពង់ស្ពីចំនួន ៣ស្រុក, ខេត្តតាកែវចំនួន ១ស្រុក, ខេត្តកណ្តាល ៨ស្រុក និងខេត្តព្រៃវែង ២ស្រុក។
_______
