09/04/2021
ជំនួញលើអចលនទ្រព្យគឺជាអ្វី ?💬💬💬
ជំនួញអចលនទ្រព្យ គឺជាមុខរបរមួយដែលមនុស្សភាគច្រើនគិតថា មានតែអ្នកមានប្រាក់ប៉ុណ្ណោះដែលអាចធ្វើបាន ដោយសារអចលនទ្រព្យ គឺជាទ្រព្យសម្បត្តិដែលមានតម្លៃខ្ពស់ ដូច្នេះ ការដាក់ទុនត្រូវប្រើលុយច្រើន និងមានពាក់ព័ន្ធនឹងច្បាប់ទៀតផង ។ មនុស្សមួយចំនួនមើលទៅលើអាជីវកម្មប្រភេទនេះថា ជាអាជីពដែលនៅឆ្ងាយពីខ្លួន និងមិនអាចឈោងចាប់ដល់។ តើជាការពិតដែរឬទេ? សូមឈ្វេងយល់នូវចម្លើយដូចតទៅ ៖
ពាក្យថា អចលនទ្រព្យនៅក្នុងផ្លូវច្បាប់ គឺដី និងទ្រព្យសម្បត្តិផ្សេងទៀតដែលនៅជាប់ជាមួយដី ដែលមានលក្ខណៈស្ថិតស្ថេរ មាំមួន ដូចជា អគារ លំនៅឋាន ខុនដូ អាគារពាណិជ្ជកម្ម បន្ទប់ស្នាក់នៅ និងសិទ្ធិទាំងឡាយណាដែលពាក់ព័ន្ធនឹងកម្មសិទ្ធិដី រួមទាំងប្លង់ដី ។
រីឯជំនួញ គឺជាការផ្តល់សេវាកម្មនៅក្រោមក្រឹត្យក្រមដែលបានកំណត់ទុក ដូចជាការទិញ-លក់ ឬផ្លាស់ប្តូរគ្នា និងមានគោលដៅដើម្បីប្រយោជន៍ ឬប្រាក់ចំណេញពីការធ្វើកិច្ចការនោះ ។ ដូច្នេះ អត្ថន័យរបស់ពាក្យថា «ជំនួញអចលនទ្រព្យ» គឺជាការបង្កើតប្រាក់ចំណូលពីការលក់ ការជួល និងប្រតិបត្តិការអភិវឌ្ឍន៍ដីធ្លី លំនៅឋាន និងអគារផ្សេងៗឱ្យកើតជាប្រាក់ចំណូលឡើងមក ។
▶️ លក្ខណៈនៃជំនួញអចលនទ្រព្យ
ការធ្វើជំនួញអចលនទ្រព្យមានទម្រង់ច្រើនយ៉ាង ហើយលក្ខណៈនៃជំនួញនេះ យើងអាចបែងចែកជា៣ប្រភេទធំៗដូចជា ៖
1️⃣ ការលក់ដូរទូទៅ ៖
ការទិញ-លក់អចលនទ្រព្យ ជាការទិញ-លក់ដែលមានលក្ខណៈស្រដៀងគ្នានឹងការទិញ-លក់នៃអាជីវកម្មផ្សេងៗទូទៅដែរ ដូចជា ៖ ការទិញហើយលក់វិញ ។ ផលតបស្នង ឬចំណែកដែលបានមក គឺប្រាក់ចំណេញ ។
ការទិញ-លក់ក្នុងជំនួញអចលនទ្រព្យតាមច្បាប់កំណត់ គឺត្រូវធ្វើជាសៀវភៅ ឬចុះបញ្ជីជាមួយអាជ្ញាធរដូចជា សំបុត្រកម្មសិទ្ធិដីធ្លីជាឯកសារកម្មសិទ្ធិ ដើម្បីបញ្ជាក់ពីអ្នកកាន់កាប់កម្មសិទ្ធិដី ពីព្រោះអចលនទ្រព្យជាទ្រព្យសម្បត្តិដែលមានតម្លៃខ្ពស់ ដូច្នេះ ត្រូវតែភ្ជាប់មកជាមួយនឹងឯកសារច្បាប់ ដើម្បីមិនឱ្យកើតបញ្ហានៅថ្ងៃក្រោយ ។
2️⃣ ការជួល ៖
លក្ខណៈនៃការជួលមានដូចជា ការជួលបន្ទប់ស្នាក់នៅ អាផាតមិន លំនៅឋាន អគារពាណិជ្ជកម្ម ការិយាល័យ ឬការជួលដីទំនេរ គឺជាការធ្វើជំនួញអចលនទ្រព្យ ។ ការវិនិយោគទុន ឬទិញអគារ និងទិញដីទំនេរ រួចយកមកជួលនោះ នឹងធ្វើឱ្យកើតប្រាក់ចំណូលយ៉ាងទៀងទាត់ ។
3️⃣ ជាឈ្មួញកណ្តាលទិញ-លក់ ឬជួល ៖
ជាអាជីពដែលមនុស្សភាគច្រើនធ្លាប់ស្គាល់ ដូចជា ជាឈ្មួញកណ្តាលទិញ-លក់ដី ផ្ទះ ឬរថយន្ត ដែលភាគច្រើនយកធ្វើជាមុខរបរបន្ថែម ។ ការទិញ-លក់មួយលើកៗអាចធ្វើឱ្យឈ្មួញកណ្តាលទទួលបានប្រាក់ចំណូលខ្ពស់ ដែលអាស្រ័យទៅលើសមត្ថភាព ។
សរុបមក ទិដ្ឋភាពទូទៅនៃជំនួញអចលនទ្រព្យ គឺជាការបង្កើតប្រាក់ចំណូលពីការលក់ ការជួលលំនៅឋាន និងដីទំនេរ ដើម្បីទទួលបានប្រាក់ចំណូលតាមរូបភាពផ្សេងៗ រួមទាំងការធ្វើជាឈ្មួញកណ្តាលផងដែរ ។ អចលនទ្រព្យ គឺមិនចាំបាច់ត្រូវចំណាយដើមទុនច្រើន ហើយក៏មិនសំដៅលើអ្នកមានទ្រព្យសម្បត្តិ ឬអ្នកមានលុយសម្រាប់វិនិយោគទុននោះទេ ដែលអាចធ្វើវាបាន ។
ការធ្វើជាឈ្មួញកណ្តាលទិញ-លក់ដី ពេលខ្លះជាការចាប់ខ្លាដោយដៃទទេ មានន័យថា អ្នកមិនចាំបាច់មានលុយវិនិយោគទេ ។ ប្រសិនបើអ្នកមានលុយខ្លះៗ ឬគិតថា ចង់ប្រកបអាជីវកម្មនោះ ការដាក់ទុនក្នុងវិស័យអចលនទ្រព្យ គឺជាជម្រើសមួយទៀតដែលគួរឱ្យចាប់អារម្មណ៍ ៕
