21/06/2014
ស.វ.អ.ក ត្រៀមបើកវគ្គបណ្តុះបណ្តាលនៅដើមខែកក្កដា
Sat, 14 June 2014
ស៊ីវ ម៉េង
ភ្នំពេញ ប៉ុស្តិ៍
សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា នឹងបើកវគ្គបណ្តុះបណ្តាលជំនាញមូលដ្ឋានទាក់ទងនឹងវិស័យអចលនទ្រព្យនៅខែកក្កដាខាងមុខ ដើម្បីឆ្លើយតបទៅនឹងកង្វះធនធានមនុស្សក្នុងវិស័យនេះ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ចេង ខេង បានប្រាប់ថា សមាគមនឹងបើកវគ្គបណ្តុះបណ្តាលធនធានមនុស្សទាក់ទងនឹងវិស័យអចលនទ្រព្យនៅខែកក្កដាខាងមុខ ខណៈនេះជាវគ្គបណ្តុះបណ្តាលជំហានដំបូងសម្រាប់អ្នកគ្មានមូលដ្ឋាននៅក្នុងវិស័យនេះ។ លោកបន្តថា វគ្គបណ្តុះបណ្តាលនេះមានរយៈពេលបីខែ និងបង្រៀនដោយគ្រូក្នុងស្រុកដែលមានជំនាញ និងធ្លាប់ទៅសិក្សានៅក្រៅប្រទេស។
លោកបានបន្តថា៖«វគ្គបណ្តុះបណ្តាលនេះនឹងបើកចំហសម្រាប់អ្នកមានបំណងចង់ចូលរៀន និងចង់រកស៊ីក្នុងវិស័យអចលនទ្រព្យទាំងអស់»។ លោកបានបន្តថា៖«នៅពេលអនាគតអ្នកចង់រកស៊ីក្នុងវិស័យនេះត្រូវតែឆ្លងកាត់ការបណ្តុះបណ្តាល។ ប្រសិនបើមិនធ្លាប់ឆ្លងកាត់ការបណ្តុះបណ្តាលទេ ពួកគេនឹងមិនអាចទទួលបានអាជ្ញាប័ណ្ណស្របច្បាប់ទេ»។
ការចុះឈ្មោះកំពុងប្រព្រឹត្តទៅនៅទីស្នាក់ការសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ដែលស្ថិតនៅផ្ទះលេខ២០បេ ផ្លូវលេខ២៩៤ កែវផ្លូវលេខ២១ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
លោក ចេង ខេង បានប្រាប់ទៀតថា សមាគមនឹងរៀបចំបណ្តុះបណ្តាលធនធានមនុស្សក្នុងវិស័យនេះជាបីដំណាក់កាល គឺការបណ្តុះបណ្តាលដោយគ្រូក្នុងស្រុក វគ្គបណ្តុះបណ្តាលដោយគ្រូជំនាញបរទេស និងវគ្គបណ្តុះបណ្តាលជាលក្ខណៈអន្តរជាតិ។ បច្ចុប្បន្នសមាគមកំពុងជ្រើសរើសសាលាអន្តរជាតិមួយ នៅក្នុងចំណោមសាលាអន្តរជាតិចំនួនបីដែលមានការទទួលស្គាល់លើពិភពលោក ដើម្បីផ្តល់ការបណ្តុះបណ្តាលកម្រិតស្តង់ដារអន្តរជាតិដល់អ្នកសិក្សានៅកម្ពុជា។
លោក សួន សូលេញ នាយកប្រតិបត្តិនៃលេខាធិការដ្ឋានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានប្រាប់ថា វគ្គបណ្តុះបណ្តាលនេះនឹងចាប់ផ្តើមនៅថ្ងៃទី២ ខែកក្កដា នៅផាកកាហ្វេទល់មុខមន្ទីរពេទ្យកាល់ម៉ែត។ វគ្គនេះមានតម្លៃចាប់ពី១៥០ទៅ១៧០ដុល្លារសម្រាប់សមាជិកសមាគម និងតម្លៃ២២០ដុល្លារសម្រាប់អ្នកនៅក្រៅវិស័យនេះ។ វគ្គបណ្តុះបណ្តាលនេះគ្រោងចែកចេញជាពីរ គឺថ្នាក់វាយតម្លៃអចលនវត្ថុ និងថ្នាក់បណ្តុះបណ្តាលជំនាញធ្វើជាភ្នាក់ងារអចលនវត្ថុ។
ទោះបីយ៉ាងណារហូតមកដល់ពេលនេះលោក សូលេញ មិនបានប្រាប់ថា មានមនុស្សចំនួនប៉ុន្មាននាក់ដែលបានចុះឈ្មោះចូលរៀននោះទេ។
ប្រធានគ្រប់គ្រងទូទៅក្រុមហ៊ុន អេស៊ា រៀលអេស្ទេត លោក ប៉ូ អ៊ាវគង់ បានអះអាងថា ការបណ្តុះបណ្តាលធនធានមនុស្សក្នុងវិស័យនេះជាចំណែកមួយល្អដែលគួរមានការចូលរួមពីសមាជិកសមាគម អ្នកបម្រើការងារក្នុងវិស័យធនាគារ និងអ្នកនៅក្នុងវិស័យផ្សេងទៀតដែលធ្វើការពាក់ព័ន្ធនឹងវិស័យនេះ។ លោកបន្តថា វគ្គបណ្តុះបណ្តាលបែបនេះគួរតែមានគ្រូជំនាញមកពីបរទេស និងមានបទពិសោធបង្រៀនច្បាស់លាស់។
លោកបានបញ្ជាក់ថា៖«កម្ពុជាកំពុងខ្វះធនធានមនុស្សក្នុងវិស័យនេះច្រើន បើទោះបីមានក្រុមហ៊ុនអន្តរជាតិចូលមកច្រើនក៏ដោយ ក៏ពួកគេមានតែទ្រឹស្តីគោល ដោយមិនមានការធ្វើទិន្នន័យ និងព័ត៌មានវិភាគឲ្យបានច្បាស់លាស់នោះទេ»។
លោក អ៊ិន ស៊ីថា អគ្គនាយករងក្រុមហ៊ុនអចលនទ្រព្យ វើលដ៍ ត្រាស់ ដែលធ្លាប់ទទួលបានការបណ្តុះបណ្តាលនៅក្រៅប្រទេសជាច្រើនវគ្គ និងបច្ចុប្បន្នជាគ្រូបង្រៀននៅសាកលវិទ្យាល័យវេស្ទើនផ្នែកគ្រប់គ្រងអចលនទ្រព្យ ដែលត្រូវជ្រើសរើសជាគ្រូបង្គោលក្នុងវគ្គបណ្តុះបណ្តាលនាពេលខាងមុខនេះ បានប្រាប់ថា វគ្គបណ្តុះបណ្តាលនេះនឹងផ្តោតសំខាន់លើវិជ្ជាជីវៈជាភ្នាក់ងារទិញ លក់អចលនវត្ថុ និងការវាយតម្លៃអចលនទ្រព្យ ទាំងនៅក្នុងប្រទេស ក្នុងតំបន់ និងពិភពលោក។ សិក្ខាកាមក៏អាចយល់ដឹងពីមូលដ្ឋានច្បាប់ និងវិធានក្នុងការអភិវឌ្ឍវិស័យអចលនវត្ថុផងដែរ។
លោកអះអាងថា៖«វគ្គបណ្តុះបណ្តាលនេះនឹងផ្តល់ប្រយោជន៍ច្រើនដល់អ្នកធ្វើការក្នុងវិស័យធនាគារ និងមីក្រូហិរញ្ញវត្ថុ...ព្រោះជំនាញនេះដើរតួនាទីសំខាន់ក្នុងការអភិវឌ្ឍសេដ្ឋកិច្ចជាតិ»។ លោកបន្តថា៖«បច្ចុប្បន្នកម្ពុជាកំពុងខ្វះធនធានមនុស្សផ្នែកនេះច្រើន ព្រោះបើគិតពីចំនួនប្រជាជនទូទាំងប្រទេស គឺអ្នកជំនាញក្នុងវិស័យនេះមិនមានដល់១០ភាគរយទេ ខណៈកន្លងមកមិនមានសាលាណានៅកម្ពុជាបើកវគ្គបណ្តុះបណ្តាលលើជំនាញនេះនៅឡើយទេ»៕
