04/09/2022
. #របស់បីយ៉ាងដែលមិនចេះប្រែប្រួល
យើងអាចទទួលការឈឺចាប់នៅពេលដែលយើងកំពុងតែជំពាក់ចិត្តលើនរណាម្នាក់ មិនថាក្ដីស្រលាញ់រវាងស្នេហាប្រុស និងស្រី! ការស្រលាញ់លើមិត្តភក្ដិ! ក្ដីស្រលាញ់ចំពោះឪពុកម្ដាយសាច់ញាតិ-ល-។ ព្រោះថ្ងៃណាមួយពួកគេនឹងរលាយបាត់ចាកឆ្ងាយពីយើង! មិនត្រឹមតែអ្វីទាំងអស់នោះទេ តែវាក៏មាននូវរឿងរ៉ាវមួយជាច្រើនទៀតដែលតែងប្រែប្រួល មិនថាកិត្តិយស ទ្រព្យសម្បត្តិ តម្លៃរបស់យើង ភាពល្បីល្បាញ ភាពជោគជ័យកន្លងសុទ្ធតែអាចប្រែប្រួល! បើសិនថ្ងៃមួយនោះវាបានមកដល់ការដែលយើងពេញចិត្តស្រលាញ់លើវាកាន់តែខ្លាំង យើងក៏កាន់តែពិបាកនឹងទទួលយកវាកាន់តែខ្លាំងផងដែរ។ ប៉ុន្តែមានរឿងបីយ៉ាងដែលយើងភ្លេចហើយថាវាមិនបានប្រែប្រួល!
#អតីតកាល
យើងអាចភ្លេចហើយថាម្សិលមិញយើងបានធ្វើរឿងមួយ ហើយវាមិនដែលបានប្រែប្រួលឡើយ! នោះហើយបានបង្ហាញថាគ្រប់យ៉ាងដែលវាស្ថិតស្ថេរគឺជាគ្រប់យ៉ាងដែលយើងបាននឹងកំពុងធ្វើវាឡើងក្នុងថ្ងៃនេះ។
- យើងបានជេរប្រមាថទៅនរណាម្នាក់ វាយនរណាម្នាក់ ឬបំផ្លាញនរណាម្នាក់នៅថ្ងៃនេះ! ស្អែកឡើងរឿងទាំងនោះវានឹងក្លាយជាភាពអមតៈ!
- យើងបានជួយជីវិតនរណាម្នាក់ សាងល្អសម្រាប់បុព្វហេតុអ្វីមួយ ចែករំលែកសេចក្ដីអាណិតក្នុងថ្ងៃនេះ! ស្អែកឡើងវាមិនបានសាបសូន្យឡើយ!
ដូច្នេះហើយគ្រប់ទង្វើដែលយើងសាងសុទ្ធតែមិនបានប្រែប្រួលនៅថ្ងៃស្អែក! ជម្រើសជារបស់អ្នកចង់ធ្វើទង្វើល្អដែលមានតម្លៃ ឬធ្វើទង្វើអាក្រក់ដែលថោកទាបស្រេចតែរូបអ្នក! ចង់បន្សល់ការឈឺចាប់មួយ ចង់បន្សល់វិប្បដិសារីមួយ ឬចង់បន្សល់ស្នាមញញឹមមួយដល់មនុស្សជាទីស្រលាញ់ បន្សល់ទុកអនុស្សាវរីយ៍មួយដែលធ្វើឲ្យមនុស្សចងចាំក្នុងចិត្ត ឬមនុស្សជាទីគោរពរបស់អ្នកអាស្រ័យទង្វើរបស់អ្នកនៅថ្ងៃនេះ។
ត្បិតតែថ្ងៃក្រោយយើងមិនបានដឹងថាគេនឹងប្រែប្រួលចិត្តគេទៅជាយ៉ាងណាចំពោះយើង ក៏ការពិតមួយនៃទង្វើរបស់យើងវាមិនបានបាត់បង់ ការពិតមួយនៃអំពើទាំងនោះយើងបានប្រឹងធ្វើដោយស្មោះអស់ពីចិត្ត នោះយើងក៏បានសាងរឿងអមតៈមួយរួចជាស្រេច។
ចូរពេញចិត្តនូវទង្វើដែលយើងកំពុងធ្វើដោយមិនចាំបាច់ចង់ឲ្យនណាម្នាក់ចងចាំឡើយ! ព្រោះអ្វីដែលប្រែប្រួលពិតប្រាកដនោះគឺការចងចាំ និងចិត្តមនុស្សតែប៉ុណ្ណោះ ខណៈដែលទង្វើនោះវាមិនបានប្រែប្រួល។
⏩យើងកំពុងតែធ្វើនូវរឿងអមតៈជាច្រើននៅថ្ងៃនេះ! ចាំណាចូររើសភាពមិនប្រែប្រួលនោះធ្វើនូវអ្វីដែលមានតម្លៃបំផុត។
#តម្លៃមួយដែលយើងមិនអាចដឹង
តម្លៃមួយចំនួនដែលយើងផ្ដល់ឲ្យតែមិនអាចដឹង មិនអាចយល់រហូតថ្ងៃស្លាប់!
👆ក្ដីស្រលាញ់មួយដែលយើងស្រលាញ់រវាងគ្នា វាអាចនឹងប្រែប្រួលប្រសិនបើមនុស្សអាចរស់នៅដោយមិនប្រែប្រួលវ័យ និងអាយុ! គឺយើងរស់នៅបានរហូតដល់ចិត្តនោះបានប្រែប្រួលចេញដោយខ្លួនឯង! ប៉ុន្តែមនុស្សយើងមានដែនកំណត់នៃអាយុដែលត្រូវបាត់បង់ជីវិត។ បើសិនជាប្ដីបានស្រលាញ់ប្រពន្ធយ៉ាងលើសលុប មិនបានដឹងថាក្រោយការលះបង់តស៊ូគ្រប់យ៉ាងសូម្បីតែជីវិត បើសិនថ្ងៃក្រោយពេលដែលខ្លួនស្លាប់ប្រពន្ធក៏ចាប់ផ្ដើមមានប្ដីថ្មីនោះ! តើចិត្តប្ដីនឹងអាចប្រគល់សេចក្ដីស្រលាញ់ដូចពីមុនទេ?
👉នេះហើយក្ដីស្រលាញ់មួយរបស់ប្ដីបានស្ថិតក្នុងភាពអមតៈទៅហើយ! ដែលគាត់មិនទាន់បានប្រែប្រួល មិនមានពេលប្រួលប្រែ និងមិនបាននឹងដឹងថាបើគាត់មានពេលបន្តទៅទៀតគាត់បានដឹងនូវរឿងរ៉ាវមួយចំនួនដែលនឹងអាចធ្វើឲ្យចិត្តគាត់ប្រួលប្រែឬទេ?
👆ដូចគ្នាទៅនឹងតម្លៃមួយដែលមនុស្សមិនធ្លាប់ដឹង ចង់ស្វែងយល់ពីវាហើយតែងតែផ្ដល់តម្លៃឲ្យវា មិនថាគំនិតទស្សនៈ អាថ៌កំបាំងនៃការគោរព(ជំនឿ) តម្លៃនៃវត្ថុ-ល-។ សុទ្ធតែមិនអាចកែប្រែបានប្រសិនបើបុគ្គលម្នាក់នោះរកវាមិនឃើញរហូតអស់ពេលដែលត្រូវស្វែងយល់ពីវា ឬបាត់បង់ជីវិតនោះ! គឺវាមិនបានសាបសូន្យតម្លៃនោះចេញពីគំនិតគេឡើយ។
👉️នេះហើយជាតម្លៃអមតៈមួយដែលមិនចេះប្រួលប្រែ! ព្រោះចិត្តបានផ្ដល់ឲ្យដោយមិនមានឱកាសនឹងទទួលយល់!
▶️អមតៈវាកើតមាននៅពេលដែលយើងមិនអាចទទួលដឹង យល់ ឬយកវាបាន! មិនទោះជាថ្ងៃណាមួយនណាម្នាក់នឹងអាចយល់ពីវាជំនួសយើង ឬកំណត់ថាវាគ្មានតម្លៃ ក៏តម្លៃអមតៈមួយនោះវាបានកើតឡើងរួចរាល់ទៅហើយសម្រាប់យើងដែលមិនអាចដឹងពីវា! ហើយគ្រប់យ៉ាងដែលយើងបានផ្ដល់តម្លៃនោះវាបានស្ថិតស្ថេររហូតចំពោះយើង ក៏ព្រោះតែយើងនឹងមិនបានដឹងនៅក្នុងពេលមួយដែលយើងអាចមានសមត្ថភាពដឹងពីវាបាន។
⏩មិនថាក្ដីស្រលាញ់ ការគោរព ចិត្តរំពឹងកាលណាបើយើងចង់ឲ្យវាស្ថិតស្ថេរនោះអ្នកមិនចាំបាច់ស្វែងយលពីវាឡើយ! អ្នកគ្រាន់តែដឹងថាអ្នកស្រលាញ់ព្រោះស្រលាញ់ គោរពព្រោះគោរព ឲ្យតម្លៃព្រោះតែមានតម្លៃ នោះជីវិតអ្នកក៏នឹងស្រលាញ់គេដោយមិនអាចប្រែប្រួលជារៀងរហូត។
#សច្ចភាព
អ្វីដែលមិនបានប្រែប្រួលបើទោះជាយើងមិនបានផ្ដល់តម្លៃឲ្យ ទោះជាយើងតាំងចិត្តស្អប់លើវា ឬក៏កែប្រែបង្ខំឲ្យមនុស្សទទួលយកថាវាអាក្រក់ ឬល្អ! នោះគឺសច្ចភាព!
+ ផែនដីវិលជុំវិញព្រះអាទិត្យ ទោះជាអ្នកបង្ខំឲ្យមនុស្សថាព្រះអាទិត្យវិលជុំវិញផែនដី ក៏សច្ចភាពនោះមិនប្រួលប្រែដែរ!
+ ជីវិតកើតមកដោយទឹកដីភ្លើងខ្យល់ ហើយក៏រលាយទៅជាទឹកដីភ្លើងខ្យល់ដដែលក៏មិនអាចកែប្រែសច្ចភាពនោះបាន!
ទាំងនេះហើយដែលវាគ្មានភាពក្បត់ គ្មានការប្រកែក គ្មានខុសគ្មានត្រូវ មិនចាំបាច់ផ្ដល់តម្លៃ មិនបង្ខំឲ្យជឿជាក់ក៏វាស្ថេតស្ថេរជាអមតៈដោយគ្មានការកំណត់។
☝️ប៉ុន្តែចិត្ត និងគំនិតមនុស្សទេ ការយល់ឃើញរបស់មនុស្សទេ ការផ្ដល់តម្លៃរបស់មនុស្សទេដែលតែងតែប្រែប្រួល និងចេះតែចង់ឲ្យមនុស្សគ្រប់គ្នាយល់តាមគំនិតខ្លួនជាគំនិតត្រឹមត្រូវ តែងតែចង់ឲ្យតម្លៃរបស់ខ្លួនជាតម្លៃអមតៈ តែងចង់ឲ្យទស្សនៈរបស់ខ្លួនជាទស្សនៈឥតខ្ចោះ។
⏩ដូច្នេះអ្វីដែលប្រែប្រួលពិតប្រាកដនោះគឺចិត្តមនុស្សដោយខ្លួនឯងប៉ុណ្ណោះ! គ្រប់យ៉ាងនៃសច្ចភាពរបស់ធម្មជាតិលើលោកមិនដែលប្រែប្រួលឡើយ! ហើយភាពត្រឹមត្រូវមួយវាក៏មិនដែលសាបសូន្យផងដែរ! សំខាន់ត្រង់ថាតើយើងធ្លាប់មានសច្ចភាពចពោះខ្លួនឯងប៉ុណ្ណា? ធ្លាប់សម្រេចចិត្តស្រលាញ់ពេញចិត្តលើគេហើយ បែរជាប្រែប្រួលចិត្តនៃការស្រលាញ់នោះដោយក្បត់ចំពោះការសម្រេចចិត្តរបស់ខ្លួននោះដែរឬទេ? ធ្លាប់ស្មោះត្រង់នឹងក្ដីស្រលាញ់ដូចដែលយើងធ្លាប់សន្យាចំពោះជាតិមាតុភូមិ មនុស្សជាតិ បើរទោះជាដឹងថាគ្នាកំពុងតែវង្វេងមិនផ្ដល់តម្លៃត្រឡប់មកឲ្យខ្លួនវិញដែរឬអត់?
👉ចាំថាការសាងអ្វីមួយឡើង វាជាសច្ចភាពបានលុះត្រាតែអ្នកមិនបានក្បត់ពីវាសូម្បីតែចិត្តរបស់អ្នក៕
អត្ថបទ : បក្សស្មូម
