07/08/2026
គម្រោងសាងសង់ផ្លូវជាតិថ្មីតភ្ជាប់ពីខេត្តបាត់ដំបងទៅខេត្តសៀមរាប កំពុងឈានទៅមុខមួយជំហានទៀត ខណៈមន្ត្រីជាន់ខ្ពស់និងក្រុមការងារបច្ចេកទេសនៃក្រសួងសាធារណការ និងដឹកជញ្ជូន បានចុះពិនិត្យទីតាំងតម្រាយផ្លូវ មុនឈានដល់ការបើកការដ្ឋានសាងសង់ជាផ្លូវការ។
លោក សុខុម ភគវន្តមុនី រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោងពង្រឹងការតភ្ជាប់ភាពធន់នឹងអាកាសធាតុ (CRCEP) រួមជាមួយលោក លឿម រស្មី ប្រធានមន្ទីរសាធារណការ និងដឹកជញ្ជូនខេត្តសៀមរាប បានដឹកនាំក្រុមការងារបច្ចេកទេសចុះពិនិត្យតម្រាយផ្លូវ ដែលគ្រោងសាងសង់ក្រោមហិរញ្ញប្បទានរបស់ធនាគារវិនិយោគហេដ្ឋារចនាសម្ព័ន្ធអាស៊ី (AIIB)។
ផ្លូវថ្មីនេះ ត្រូវបានចាត់ទុកជាគម្រោងអាទិភាពរបស់រាជរដ្ឋាភិបាល ក្នុងការពង្រឹងការតភ្ជាប់រវាងខេត្តភាគពាយ័ព្យ និងខេត្តសៀមរាប ដែលជាគោលដៅទេសចរណ៍ដ៏សំខាន់របស់កម្ពុជា ព្រមទាំងជួយជំរុញការដឹកជញ្ជូន និងសកម្មភាពសេដ្ឋកិច្ចនៅតាមតំបន់។
បើតាមការសិក្សា ផ្លូវជាតិថ្មីនេះមានប្រវែងសរុប ៧២,១៥៤ គីឡូម៉ែត្រ ដោយចាប់ផ្តើមពីផ្លូវជាតិលេខ៥ ត្រង់ចំណុច PK302+325 ក្នុងខេត្តបាត់ដំបង និងបញ្ចប់នៅផ្លូវជាតិលេខ ៦ ត្រង់ចំណុច PK343+100 ក្នុងខេត្តសៀមរាប។
ខ្សែផ្លូវនេះសាងសង់ឆ្លងកាត់ខេត្តចំនួន ៣ រួមមាន ខេត្តបាត់ដំបង (ស្រុកថ្មគោល និងស្រុកឯកភ្នំ) ខេត្តបន្ទាយមានជ័យ (ស្រុកព្រះនេត្រព្រះ) និងខេត្តសៀមរាប ស្រុកក្រឡាញ់ និងស្រុកពួក។
ចំណុចពិសេសនៃគម្រោងនេះ គឺអាចកាត់បន្ថយចម្ងាយធ្វើដំណើររវាងខេត្តបាត់ដំបង និងខេត្តសៀមរាបបានជាង ១០០ គីឡូម៉ែត្រ បើប្រៀបធៀបនឹងផ្លូវបច្ចុប្បន្ន ដែលនឹងជួយសន្សំទាំងពេលវេលា ថ្លៃដើមដឹកជញ្ជូន និងជំរុញការធ្វើដំណើររបស់ប្រជាពលរដ្ឋនិងភ្ញៀវទេសចរ។
ក្រៅពីគម្រោងផ្លូវបាត់ដំបង-សៀមរាប រាជរដ្ឋាភិបាលក៏កំពុងជំរុញគម្រោងផ្លូវជាតិថ្មីចំនួនពីរខ្សែទៀត ដើម្បីពង្រីកបណ្តាញដឹកជញ្ជូន និងលើកកម្ពស់សេដ្ឋកិច្ចជាតិ។
គម្រោងទីមួយ គឺផ្លូវជាតិលេខ ៦០បេ ដែលតភ្ជាប់ពីស្រុកព្រែកប្រសព្វ ខេត្តក្រចេះ ទៅកំពង់ថ្ម ខេត្តកំពង់ធំ មានប្រវែងជាង ១៣០ គីឡូម៉ែត្រ។ ផ្លូវនេះ រួមជាមួយស្ពានឆ្លងទន្លេមេគង្គខេត្តក្រចេះ ដែលទើបដាក់ឱ្យប្រើប្រាស់ នឹងក្លាយជាខ្សែឈាមសេដ្ឋកិច្ចដ៏សំខាន់សម្រាប់តំបន់ភូមិភាគឦសាន និងជំរុញការវិនិយោគ ការដឹកជញ្ជូនទំនិញ និងវិស័យទេសចរណ៍។
ចំណែកគម្រោងផ្លូវជាតិលេខ ៥០សេ តភ្ជាប់ពីស្រុកកំពង់លែង ខេត្តកំពង់ឆ្នាំង ទៅផ្លូវជាតិលេខ៦ ក្នុងខេត្តកំពង់ធំ។ ផ្លូវនេះនឹងកាត់បន្ថយចម្ងាយធ្វើដំណើរពីជាង ១០០ គីឡូម៉ែត្រ មកនៅត្រឹមប្រមាណ ៥៣ គីឡូម៉ែត្រ ប៉ុណ្ណោះ ដែលជាការបើកផ្លូវថ្មីឆ្លងកាត់តំបន់កណ្តាលប្រទេស មិនធ្លាប់មានពីមុនមក។
ការអភិវឌ្ឍបណ្តាញផ្លូវជាតិថ្មីទាំងនេះត្រូវបានរំពឹងថា នឹងជួយពង្រឹងការតភ្ជាប់រវាងបណ្តាខេត្ត បង្កើនប្រសិទ្ធភាពដឹកជញ្ជូន កាត់បន្ថយថ្លៃដើមភស្តុភារ និងបង្កើតកាលានុវត្តភាពថ្មីៗសម្រាប់ការអភិវឌ្ឍសេដ្ឋកិច្ច និងវិស័យទេសចរណ៍របស់កម្ពុជា៕
---------------
©KPT Economy
