21/11/2024
10 වැනි පාර්ලිමේන්තුවට සහ නව ආණ්ඩුවට සුභ පැතුම් !!!
___________________________ .
2024 නොවැම්බර් 14 වන දින පවත්වන ලද මහ මැතිවරණයේ දී විශිෂ්ඨ ජයක් ලබාගනිමින් ආසන 159 ක සුවිශේෂී ආණ්ඩු බලයක් ලබාගැනීමට නව රජයට හැකියාව ලැබීම සම්බන්ධයෙන් ඉමහත් සතුටට පත්වන්නෙමි. මහ මැතිවරණය අවස්ථාවේ දී වෙනත් දේශපාලන පාර්ශවයක නියෝජනයක නිරත වීම නිසා සෘජුව ජාතික ජන බලවේගය ලත් ජයග්රහණයේ කොටස්කරුවකු විය නොහැකිවිය. එහෙත් ස්වාධීනව සහ කිසිවෙකුට පාර්ශවකාරී හෝ ගැති නොවෙමින් අපගේ දේශපාලන ක්රියාදාමය ඉදිරියට ගෙනයමින්, ආණ්ඩුව ගෙනයන යහපත් ක්රියාදාමයන් වෙත සුභවාදී දායකත්වයක් ලබදීමට අප අපේක්ෂා කළෙමු. එමෙන්ම අනුර කුමාර දිසානායක ජනාධිපතිවරයා පත්කරගැනීමට මතවාදීව, ක්රියාකාරීව දායක වූ අයෙකු වශයෙන් සහ ශ්රී ලංකා මාතෘ භුමියේ දියුණුව සහ අභිමානය නිරන්තරයෙන් ප්රාර්ථනා කරන්නාවූ පුරවැසියකු වශයෙන් ප්රගතිගාමී වූද, සමාජයේ ප්රධාන මතවාදය නියෝජනය කරන්නට අවස්ථාව ලද ජාතික ජන බලවේග ආණ්ඩුවක් බිහිවීම මා දැඩිව අපේක්ෂා කළ සහ සොම්නසට පත්කරන ලද මතවාදයයි.
මාගේ පෞද්ගලික දේශපාලන මතවාදය සහ නියෝජනය තුළදී පවා හැකිතාක් ඊට බලපෑම් හෝ එදිරිවාදිකම් නොවීමට වගබලාගත් අතර සෑම විටකම මාගේ දේශපාලන භාවිතාව සහ සවිඥානය තුළ මා සැබැවින්ම විශ්වාස කරන්නේ රටක ජනාධිපතිවරයා නියෝජනය කරන පාර්ශවය වෙත ශක්තිමත් ආණ්ඩු බලයක් පැවතිය යුතු බවයි. එහි අදහස වන්නේ විපක්ෂය අක්රියව පැවතීම හෝ ආණ්ඩුව ගන්නා ඕනෑම තීන්දුවක් තීරණයක් සිතීමෙන් විමසීමෙන් තොරව අනුමත කිරීම නොවන බවද මෙහිලා සටහන් තබමි.
එකී අපේක්ෂාව සැබෑවක් වී ඇත. ශ්රී ලාංකික පුරවැසියන් රෝස මල් යහනාවන් මතින් තම ජීවිතය ගෙවා නොදමන අතර, සෑම තප්පරයක් පාසා කටුපඳුරු රළු බොරළු මතින් ඔවුන් තම එදිනෙදා ජීවිකාව ගෙවා දමමින් සිටී. රාජ්යයක ජනතාව දුක්ඛිතව සිටියදී එහි පාලකයින් අමා සුව වළඳන කිසිඳු රාජ්යයක් හෝ පාලකයෙක් යහපත් අවසානයක් ලබා නොමැත. ඒ පිළිබඳ උගත් පාඩම් මෑත කාලීන ඉතිහාසය තුළදී පවා නිදර්ශන සහිතව අප සියලු දෙනා දැක ඇති බවට සැකයක් නොමැත. එබැවින් සෑම මොහොතක් ම, සෑම ක්රියාවක්ම මේ මාතෘභූමියේ ද පුරවැසියන්ගේ ද යහපත, දියුණුව සහ ස්වෛරීත්වය වෙනුවෙන් කැපකරන කරනු ඇතැයි ආණ්ඩුව ප්රමුඛ සමස්ථ පාර්ලිමේන්තු මහජන නියෝජිතයන් වෙතද , ගරු ජනාධිපතිතුමන් වෙත ද විශ්වාසය තබා සිටිමි.
නව පාර්ලිමේන්තුව පක්ෂ විපක්ෂ භේදයකින් තොරව මාගේ මාතෘභූමිය වෙත කළ හැකි උපරිමය කරන්නට කටයුතු කරනු ලැබේවා 🙏
ගරු ජනාධිපතිතුමන් වෙත ද, පාර්ලිමේන්තුවේ සියලුම මහජන නියෝජිතයන් වෙත ද සියලු යහපත උදාවේවායි ප්රාර්ථනා කරමි...!!!
- කේශාන් අනුරාද් අධිකාරි
