30/08/2026
🔳 ပြင်ဦးလွင်မြို့နယ်အတွင်း မြေပြင်ကွင်းဆင်း အခွန်စည်းကြပ်ရန် မြေတန်ဖိုးနှုန်းထားများ ထုတ်ပြန်ကြေညာ
ဩဂုတ် ၃၀၊ ၂၀၂၆ (ပြင်ဦးလွင်)
ပြင်ဦးလွင်မြို့နယ်အတွင်းရှိ ရပ်ကွက်များနှင့် ကျေးရွာများအလိုက် ၂၀၂၆-၂၀၂၇ ဘဏ္ဍာရေးနှစ်အတွက် မြေအရောင်းအဝယ်၊ ပေးကမ်းခြင်းများနှင့် ပတ်သက်၍ အခွန်စည်းကြပ်ရန် တစ်စတုရန်းပေအလိုက် မြေပြင်ပေါက်ဈေး သတ်မှတ်နှုန်းထားများကို အာဏာပိုင်အဖွဲ့အစည်းများက ထုတ်ပြန်ကြေညာလိုက်သည်။
အဆိုပါ ထုတ်ပြန်ချက်အရ ပြင်ဦးလွင်မြို့ပေါ်ရှိ ရပ်ကွက်ကြီးများ ဖြစ်ကြသော ရပ်ကွက်ကြီး (၁) မှ (၁၀) အထိနှင့် ပတ်ဝန်းကျင် ကျေးရွာများရှိ လမ်းမကြီးများ၊ လမ်းသွယ်များနှင့် လမ်းကြားများအလိုက် မြေတန်ဖိုးများကို အမျိုးအစားခွဲခြား၍ စနစ်တကျ သတ်မှတ်ထားကြောင်း သိရသည်။
ရပ်ကွက်အလိုက် ထင်ရှားသော မြေတန်ဖိုး သတ်မှတ်ချက်များ
▪️ရပ်ကွက်ကြီး (၁)၊ (၂)၊ (၃)၊ (၄) နှင့် (၅)
မန္တလေး-လားရှိုးလမ်းမကြီးပေါ်ရှိ မြေကွက်များအတွက် အမြင့်ဆုံးနှုန်းထားအဖြစ် တစ်စတုရန်းပေလျှင် ၂၁,၀၀၀ ကျပ် သတ်မှတ်ထားသည်။
မြို့ပတ်လမ်းနှင့် ချယ်ရီလမ်းများပေါ်တွင် တစ်စတုရန်းပေလျှင် ၁၂,၅၀၀ ကျပ် ရှိပြီး၊ လမ်းသွယ်များနှင့် လမ်းကြားများတွင် တည်နေရာအပေါ် မူတည်၍ ၉,၃၀၀ ကျပ်မှ ၂,၃၀၀ ကျပ်အထိ အသီးသီး လျော့နည်းသတ်မှတ်ထားသည်။
▪️ရပ်ကွက်ကြီး (၆) နှင့် (၁၀)
လမ်းမကြီး (၁) နှင့် မန္တလေး-လားရှိုးလမ်းမကြီးများတွင် တစ်စတုရန်းပေလျှင် ၂၁,၀၀၀ ကျပ် နှုန်းဖြင့် ကာလတန်ဖိုး အမြင့်ဆုံးအဆင့်တွင် ရှိနေသည်။
ကျန်လမ်းသွယ်များနှင့် လမ်းကြားများတွင် တစ်စတုရန်းပေလျှင် ၄,၂၀၀ ကျပ်မှ အနိမ့်ဆုံး ၂,၀၀၀ ကျပ်အထိ သတ်မှတ်ထားကြောင်း တွေ့ရသည်။
▪️ရတနာပုံမြို့သစ်
လမ်းမကြီးများပေါ်တွင် တစ်စတုရန်းပေလျှင် ၆,၄၀၀ ကျပ် သတ်မှတ်ထားပြီး၊ လမ်းသွယ်များတွင် ၁,၆၀၀ ကျပ်မှ ၃,၃၀၀ ကျပ်အတွင်း ရှိသည်။
▪️ကျေးရွာအုပ်စုများနှင့် ဆန်ခါတင်ဒေသများ
မြို့ပြဧရိယာအပြင်ဘက်ရှိ ရေငယ်ကျေးရွာ၊ ရေချမ်းအိုးကျေးရွာ၊ ဆင်ခေါင်းလေးကျေးရွာ၊ ညောင်နီနှင့် ကံကြီးကုန်း စသည့် ကျေးရွာများတွင် လမ်းမကြီးဘေးရှိ မြေကွက်များကို တစ်စတုရန်းပေလျှင် ၄,၃၀၀ ကျပ်မှ ၇,၄၀၀ ကျပ်အထိသတ်မှတ်ထားပြီး၊ လမ်းကြားမြေများအတွက်မူ ၉၀၀ ကျပ် ဝန်းကျင်အထိ နှုန်းထားများ လျော့ကျသွားသည်။
ထို့အပြင် ကျန်ကန်ကျေးရွာများ (၁/၃/၅/၆/၇/၈/၉ ပိုင်အပါအဝင်)၊ ပွဲကောက်ကျေးရွာနှင့် ဇီးပင်ကြီးဒေသများရှိ လမ်းမကြီးဘေး မြေကွက်များကိုမူ တစ်စတုရန်းပေလျှင် ၃,၉၀၀ ကျပ်၊ လမ်းသွယ်များကို ၁,၉၀၀ ကျပ် နှင့် လမ်းကြားများကို ၉၀၀ ကျပ် အသီးသီး သတ်မှတ်ထားကြောင်း အဆိုပါ ထုတ်ပြန်ချက်ဇယားများအရ သိရှိရသည်။
ယခု ထုတ်ပြန်လိုက်သော နှုန်းထားများသည် ၂၀၂၆-၂၀၂၇ ဘဏ္ဍာရေးနှစ်အတွင်း ပြင်ဦးလွင်မြို့နယ်အတွင်း မြေယာလွှဲပြောင်းခြင်း၊ ရောင်းချခြင်းနှင့် ပိုင်ဆိုင်မှု လဲလှယ်ခြင်း ကိစ္စရပ်များတွင် အခွန်တော်ခိုင်နှုန်း တန်ဖိုးဖြတ် အခြေခံအဖြစ် အတည်ပြု အသုံးပြုသွားမည်ဖြစ်ကြောင်း သတင်းရရှိသည်။
