10/02/2023
ပုလောမြို့နယ်ကတိုက်ပွဲတွေမှာ စစ်ကောင်စီဘက်က ၁၃ ဦးဝန်းကျင်သေဆုံး၊ ပြည်သူ့ကာကွယ်ရေးတပ်ဘက်ကလည်း ၅ ဦးဒဏ်ရာရ
+++++++++++++
ဖေဖော်ဝါရီ ၉
ပုလောမြို့နယ်မှာ အခုလ ၇ ရက်နေ့ကစလို့ စစ်ကောင်စီတပ်နဲ့ ပြည်သူ့ကာကွယ်ရေးတပ်တွေ နှစ်ဖက်တိုက်ပွဲတွေအပြင်းအထန်ဖြစ်ပွားပြီး နှစ်ဖက်ထိခိုက်မှုတွေရှိနေတယ်လို့ ပြည်သူ့ကာကွယ်ရေးတပ်နဲ့ ဒေသခံတွေဆီကသိရပါတယ်။
တိုက်ပွဲတွေဟာ ပုလောမြို့နယ်ထဲက တိုရွာ၊ ပိတပ်ရွာ နဲ့ မြဒေါင်ရွာတို့မှာဖြစ်ပွားနေတာဖြစ်ပြီး မနေ့ကတော့ မနက် ၈နာရီလောက်စပြီး ညနေအထိအပြင်းအထန်ဖြစ်ပွားခဲ့တယ်လို့သိရပါတယ်။
" မနေ့ကတော့တနေကုန်ဖြစ်တာပါ။ သူတို့ဘက်လည်းထိသလို ကျနော်တို့ဘက်လည်း အထိနာတယ်" လို့ တိုက်ပွဲဝင်ရဲဘော်တစ်ဦးကပြောပါတယ်။
တိုက်ပွဲအတွင်း စစ်ကောင်စီဘက်က ၁၃ ဦးဝန်းကျင်သေဆုံးပြီး ၈ဦးဝန်းကျင် ထိခိုက်ဒဏ်ရာရရှိခဲ့တယ်လို့ ပြည်သူ့ကာကွယ်ရေးတပ်မတော် မြိတ်ခရိုင်အမှတ်(၁)တပ်ရင်းက ထုတ်ပြန်ထားပါတယ်။
ပြည်သူ့ကာကွယ်ရေးဘက်ကလည်း ထိခိုက်ဒဏ်ရာရရှိသူ ၅ ဦးရှိပြီး ၂ ဦးကတော့ဒဏ်ရာပြင်းထန်တယ်လို့သိရပါတယ်။
မနေ့က တိုက်ပွဲဖြစ်ပွားပြီးနောက် စစ်ကောင်စီတပ်သားတွေ တို၊ ပိတပ်နဲ့မြဒေါင်ကျေးရွာတွေဘက် လက်နက်ကြီးအချက်ရေ ၅၀ခန့်ပစ်ခတ်ခဲ့ပြီး တိုကျေးရွာကနေအိမ်တွေကို မီးရှို့ခဲ့ခဲ့သလို ဒီနေ့မှာလည်းနေအိမ်တွေကိုထပ်ပြီးမီးရှို့နေတယ်လို့ ပြည်သူ့ကာကွယ်ရေးတပ်ပြန်ကြားရေးကဆိုပါတယ်။
"နေအိမ် ၃၀ခန့်အထိ မီးရှို့ခံထားရတယ်လို့ခန့်မှန်းရပါတယ်။ စစ်အုပ်ချုပ်ရေးကြေညာပြီးကတည်းက သူတို့ဘက်က ပြင်ဆင်မှုတွေ အများကြီးလုပ်ထားတယ်။ စစ်ရေးပိုပိုပြီးတင်းမာလာပြီး ဒီကောင်တွေ ပိုပြီး ယုတ်မာလာနိုင်ပါတယ်"လို့ မြိတ်ခရိုင်အမှတ်(၁) တပ်ရင်းရဲ့ ပြန်ကြားရေးတာဝန်ခံကပြောပါတယ်။
ဒီနေ့မှာလည်း စစ်ကောင်စီတပ်က ပုလောအခြေစိုက် ခလရ (၂၈၅)၊ ပလမြို့စခန်းကုန်းနဲ့ ပဝကုန်းကျေးရွာတွေကနေ လက်နက်ကြီးတွေအများအပြားပစ်ခတ်နေတယ်လို့သိရပါတယ်။
အခုသုံးရက်အတွင်းလက်နက်ကြီးပစ်ခတ်မှုကြောင့် ပုလောမြို့နယ်အတွင်း ထိခိုက်ဒဏ်ရာရရှိသူ ၅ ဦးထက်မနည်းရှိနေပြီဖြစ်ပါတယ်။
မြိတ်ခရိုင်တပ်ရင်း (၁) ကတော့ ပြည်သူတွေအနေနဲ့ အရေးကြီးတဲ့ အရာတွေကိုကြိုတင်ထုတ်ပိုးထားကြဖို့၊ တိုက်ပွဲသတင်းနားစွင့်ကြဖို့ နဲ့ ပြည်သူ့ကာကွယ်ရေးတပ်တွေရဲ့ ထုတ်ပြန်ချက်တွေကို လိုက်နာပေးကြဖို့ ထုတ်ပြန်ထားပါတယ်။
