23/06/2020
မန္တလေးမြို့ရဲ့ အရှေ့တောင်ဘက်ခြမ်းက အလားအလာအကောင်းဆုံး အိမ်ခြံမြေဧရိယာဖြစ်လာ
====================
====================
ငွေကြေး ရင်းနှီးမြှုပ်နှံသူတွေ စိတ်ဝင်စားကြတဲ့ ထိပ်တန်းစီးပွားရေးကဏ္ဍတွေထဲမှာ အိမ်ခြံမြေကဏ္ဍဟာ တစ်ခုအပါအဝင်ဖြစ်ပါတယ်။ အကြောင်းအမျိုးမျိုးကြောင့် အိမ်ခြံမြေဈေးကွက်မှာ အရောင်းအဝယ်လည်ပတ်မှုဟာ တစ်ခါတစ်ရံ နှေးကွေးသွားတာ၊ အခန့်မသင့်ရင် ကာလအပိုင်းအခြားတစ်ခုအထိ ရပ်တန့်သွားတာမျိုး ကြုံရလေ့ရှိပေမယ့် ရင်းနှီးမြှုပ်နှံသူတွေဟာ အိမ်ခြံမြေဈေးကွက်ကိုတော့ မျက်ခြေပြတ်ခံကြလေ့မရှိပါဘူး။
တရုတ်၊ အိန္ဒိယတို့နဲ့ ကူးသန်းဆက်နွယ်နေပြီး စီးပွားရေးကဏ္ဍမှာ အရေးပါနေတဲ့ မန္တလေးမြို့ရဲ့ အိမ်ခြံမြေ ကဏ္ဍဟာ ရင်းနှီးမြှုပ်နှံသူတွေကို အကျိုးအမြတ် ကောင်းကောင်းဖြစ်စေခဲ့တဲ့ သာဓကတွေ အတိတ်မှာ အများကြီးရှိခဲ့ပါတယ်။ အခုအခါ လူဦးရေသိပ်သည်းထူထပ်လာပြီး မြို့ပြဆိုင်ရာ အင်္ဂါရပ်တွေ များစွာဖွံ့ဖြိုးလာ တဲ့ မန္တလေးမြို့ရဲ့ အိမ်ခြံမြေကဏ္ဍဟာ ပြီးခဲ့တဲ့နှစ်ပေါင်း ၂၀ လောက်အတွင်းမှာ သိသိသာသာ ပြောင်းလဲသွား ခဲ့ပြီဖြစ်ပါတယ်။
လက်ရှိကာလဟာ စီးပွားရေးလုပ်ငန်းအတော်များများ ထိခိုက်နေတဲ့ ကိုဗစ်ကပ်ရောဂါကာလဆိုပေမယ့် ဈေးနှုန်းအရရော၊ ရှေ့အလားအလာနဲ့ လက်ရှိဖွံ့ဖြိုးပြောင်းလဲမှုအရပါ မျက်စိကျစရာကောင်းတဲ့ အိမ်ခြံမြေအကွက်အကွင်းတွေ မန္တလေးမှာ ရှိနေပါတယ်။ မန္တလေးမြို့ရဲ့ အရှေ့တောင်ဘက်ခြမ်းမှာရှိတဲ့ ရဲမွန် တောင်ရပ်ကွက်အရှေ့ခြမ်းနဲ့ ထန်းကိုးပင်ဧရိယာတွေဟာ အလားအလာ အကောင်းဆုံးအချက်တွေနဲ့ ကိုက်ညီနေတယ်လို့ မန္တလေးမြို့က သက်တမ်းရင့် အိမ်ခြံမြေအကျိုးဆောင်လုပ်ငန်းဖြစ်တဲ့ ဖိုးလမင်းအိမ်ခြံမြေအကျိုးဆောင်လုပ်ငန်းရဲ့ အုပ်ချုပ်မှုဒါရိုက်တာ ဦးဝဏ္ဏစိုးက ပြောပါတယ်။
"ဒီရက်ပိုင်းမှာ ဖြစ်ပေါ်နေတဲ့ ဈေးကွက်အနေအထားရယ်၊ ဈေးနှုန်းတန်းရယ်၊ ရင်းနှီးမြှုပ်နှံမှု အနေအထား ပေါ်မူတည်ပြီး ရဲမွန်တောင်အရှေ့ခြမ်းနဲ့ ထန်းကိုးပင်ဧရိယာတွေကို မန္တလေးမြို့ရဲ့ အလားအလာ အကောင်းဆုံးဧရိယာအဖြစ် ရွေးချယ်လိုပါတယ်။ လမ်းဧရိယာအရဆိုရင် ၃၅ လမ်းနဲ့ သိပ္ပံလမ်း ကြား၊သိပ္ပံလမ်းဝဲယာ၊ ပြင်ဦးလွင် မန္တလေးမြို့ပတ်လမ်းနဲ့ ဆက်လျက်ရှိနေတဲ့ ဧရိယာတွေဖြစ်ပါတယ်"လို့ ဦးဝဏ္ဏစိုးက ပြောပါတယ်။
မန္တလေး ပြင်ဦးလွင်မြို့ပတ်လမ်းအရှေ့ခြမ်းက လယ်ယာမြေတွေကို အခြားနည်းအသုံးပြုခွင့်လျှောက်ပြီး အိမ်ရာ လို၊ ကားအရောင်းပြခန်းလို လုပ်ငန်းတွေ အကောင်အထည်ဖော်လာတာ၊ ဒီအရှေ့ခြမ်းမှာရေတံခွန် တောင်ဂေါက်ကွင်းအိမ်ရာစီမံကိန်းတွေရှိလာတာတွေဟာ ဒီအိမ်ခြံမြေဧရိယာအတွက် အားသာချက် တွေဖြစ်နေကြောင်း ပြောပါတယ်။
"မြေအကျယ်တွေက ရဲမွန်တောင်ထဲမှာ ဧကကွက်ရော၊ ဝန်ထမ်းကွက် ပေ ၄၀× ပေ ၆၀ ရောရာရှိပါတယ်။ ထန်းကိုးပင်ထဲမှာတော့ ပေ ၄၀× ပေ ၆၀ အကွက်တွေရိုက်တာများပါတယ်။ အနောက်မြို့သစ် (ဆ) ဖရိန်ထဲမှာ ဆိုလဲ ဝန်ထမ်းကွက်ဖြစ်တဲ့အတွက် ပေ ၄၀× ပေ ၆၀ မြေကွက်ရိုက်တာများပါတယ်။ အခု ပေ ၄၀ × ပေ ၆၀ တန်းကို နှိုင်းယှဉ်ချိန်ထိုးကြည့်တဲ့အခါ ပြီးခဲ့တဲ့နှစ်တွေက အနောက်မြို့သစ် (ဆ) က ကျပ်သိန်း ၂,၀၀၀၊ ရဲမွန် တောင်က ကျပ်သိန်း ၁,၈၀၀၊ ထန်းကိုးပင်က ကျပ်သိန်း ၁,၆၀၀ ရှိခဲ့တယ်။ ဒါပေမယ့် အခုအခြေအနေမှာကျ သူတို့အကုန်လုံးက ကျပ်သိန်း ၂,၀၀၀ ဝန်းကျင် တပြေးညီဖြစ်သွားပြီ" လို့ ဦးဝဏ္ဏစိုးက ပြောပါတယ်။
ဒီဧရိယာတွေမှာ လူနေထိုင်မှုက သိပ်သည်းလာပြီး ပြင်ဦးလွင်မြို့ပတ်လမ်းအရှေ့ခြမ်းက လယ်ယာမြေတွေက တခြားနည်းနဲ့ ဖွံ့ဖြိုးလာတဲ့အတွက် ရဲမွန်တောင်၊ ထန်းကိုးပင်ဘက်မှာ အိမ်ကြီးအိမ်ကောင်းတွေ၊ ဂိုထောင်တွေ အစီအရီပေါ်လာကြောင်း ပြောပါတယ်။ ထန်းကိုးပင်ဧရိယာမှာ မြေကွက်လွတ် သိပ်မတွေ့ရတော့ဘူးလို့ ဆိုပါ တယ်။
"ဖွံ့ဖြိုးမှုအကောင်းဆုံးက လတ်တလောအနေအထားအရ ထန်းကိုးပင်ကိုပဲ ညွှန်းဆိုရမယ်။ ဘာကြောင့်လဲ ဆိုတော့ ဒူးကြားလမ်းကိုက ပေ ၆၀ လမ်းဖြစ်နေတယ်။ တချို့လမ်းမတွေရဲ့ မိန်းလမ်းမကြီးလောက် ဖြစ်နေ တာ။ တခြားရပ်ကွက်တွေထက် ကြည့်ရတာအရသာကွာတယ်။ ပြီးတော့ လမ်းတွေတောက်လျောက် စဉ်ဆက်မပြတ်ခင်းနေတယ်။ အဆောက်အအုံတွေကလဲ အာရ်စီ နှစ်ထပ်၊ သုံးထပ်တွေ တောက်လျောက်ဆောက်ပြီး လူတွေနေလာကြတယ်"လို့ ဦးဝဏ္ဏစိုးက ပြောပါတယ်။
အိမ်ခြံမြေကဏ္ဍမှာ ပိုင်ဆိုင်မှုအထောက်အထား၊ စာရွက်စာတမ်းအရှုပ်အရှင်းပြဿနာတွေကလဲ သတိထားစရာ ပါ။ ဒီဧရိယာတွေထဲမှာတော့ ရာခိုင်နှုန်းအတော်များများက ပိုင်ဆိုင်မှုအရှုပ်အရှင်းကင်းပြီး ၁၉၉၀ ခုနှစ်ပတ်ချာ လည်က မြို့ကွက်သစ်ဖော်ထုတ်ရေးအဖွဲ့က ချထားတဲ့ ဂရန်မြေကွက်တွေဖြစ်တာကြောင့် ခိုင်မာမှုများတယ်လို့ ပြောပါတယ်။
"လမ်းအခြေအနေတွေက မန္တလေး ပြင်ဦးလွင်မြို့ပတ်လမ်းက တော်တော်ကောင်းပါတယ်။ အောင်ပင်လယ် ဘက်ကနေ မြို့တွင်းဘက်လာရင်လဲ လုပ်ငန်းတွေက အခြားနည်းအသုံးပြုခွင့်လျှောက်တယ်။ လယ်ယာ မြေဝယ်တယ်၊ စီမံကိန်းကို ပီပီပြင်ပြင်ရေးတင်တယ်၊ ရေးတင်တဲ့ စီမံကိန်းအတိုင်းလဲ သေချာအကောင်အ ထည်ဖော်တယ်။ အဲဒီလို ပရောဂျက်တွေကို သေချာအကောင်အထည်ဖော်လာတဲ့အတွက် အလားအလာ တွေက ကောင်းလာတာ။ စာရွက်ပေါ်တင် မည်ကာမတ္တပြောင်းသွားတာ မဟုတ်ပါဘူး။ ဂရန်ကျရုံ၊ အခြား နည်းပြောင်းသွားရုံတင် ပြောင်းသွားတာမဟုတ်ဘူး။ တကယ်လဲ လျှောက်တယ်။ ဒါတွေကို ခိုင်ခိုင်မာမာ လုပ်တယ်။ တကယ် စီမံကိန်းအခြေချလုပ်တော့ ဈေးကွက်က အားကောင်းလာတာပေါ့"လို့ ဦးဝဏ္ဏစိုးက သုံးသပ်ပါတယ်။
မန္တလေးမြို့ဟာ အရှေ့တောင်ဘက်ကိုဦးတည်ပြီး မြို့ပြအကွက်အကွင်းသစ်အဖြစ် ရုပ်လုံးပေါ်လာနေပါတယ်။ ဒီအနေအထားမှာ တခြားစိတ်ဝင်စားစရာကောင်းတဲ့ အိမ်ခြံမြေဧရိယာတွေထဲကနေ ဈေးနှုန်းတန်းအရရော၊ ရှေ့ အလားအလာအရပါ ချိန်ထိုးလိုက်ရင် ရဲမွန်တောင်နဲ့ ထန်းကိုးပင်ဧရိယာဟာ နှာတစ်ဖျားသာနေတယ်လို့ ဆိုရမှာဖြစ်ပါတယ်။
---
https://myanmar.mmtimes.com/news/140592.html
==========
The Myanmar Times
မန္တလေးတွင် အိမ်ခြံမြေ ရောင်းဝယ်ငှားဆောင်ရွက်လိုပါက
📨📨📨📨📨
📱 ဆက်သွယ်ရန်-
Lucky Square
အိမ်ခြံမြေ၀န်ဆောင်မှု
၀၉ ၂၅၉၁ ၆၃၈၈၂
၀၉ ၉၆၉၄ ၈၈၄၀၇
🏰 အ.ထ.က-ကမ္မ မြောက်ဘက်၊ ပခုက္ကူ-ပေါက်လမ်း၊ အမှတ်(၆)ရပ်ကွက်၊ ကမ္မမြို့။
ငွေကြေး ရင်းနှီးမြှုပ်နှံသူတွေ စိတ်ဝင်စားကြတဲ့ ထိပ်တန်းစီးပွားရေးကဏ္ဍတွေထဲမှာ အိမ်ခြံမြေကဏ္ဍဟာ တစ်ခုအပါ....
