11/11/2024
Adminတို့ ငွေဆောင်ကမ်းခြေတောင်ဘက် ဆင်မတံငါရွာလေး Sinma Village ကိုသွားရောက်လည်ပတ် ခဲ့လို့ ငွေဆောင်အနီးမှာရှိတဲ့ဆင်မရွာလေးကို အလည်ရောက်ဖူးအောင်သွားဖို့အကြံပေးလိုပါတယ်။
ငွေဆောင်မြို့ကမ်းခြေကနေဆို ၅ မိုင်အကွာမှာရှိပြီး ဆိုက်ကယ်နဲ့သွားမယ် ဆို ရင်၂၀မိနစ်လောက်ပဲ ကြာမှာဖြစ်ပါတယ်။ ကားလမ်းကတော့နွေရာသီဆိုပိုအဆင်ပြေပြီး ကားလေးတွေနဲ့ပါသွားလို့ရပါတယ်။ကွန်ကရစ်လမ်းကတော့ ငွေဆောင် ကနေ ဆင်မလမ်းတစ်ဝက်လောက်ထိခင်းထားပြီး ကားနဲ့ဆိုရင်တော့လမ်းအနေထားအရ ၂၅မိနစ်ခန့်သွားရပါတယ် ဖြေးဖြေးမောင်းရင်းလမ်းတလျောက်ရှုခင်းတွေကြည့်နိုင်ပါတယ်။
ကမ်းခြေ ရွာလေးပါ... ရွာလို့ဆိုပေမယ့် လူနေမှုအဆင့်အတန်းကတော့ သာပါတယ်..ငါးဖမ်းလုပ်ငန်းကို အဓိကထားလုပ်ကိုင်ကြပါတယ်။
ငွေဆောင်ရောက်ရင် နိုင်ငံခြားသားဧည့်သည်တွေကြား နာမည်ကြီးပြီးစိတ်ဝင်တစားသွားရောက်လည်ပတ်တဲ့ရွာလည်းဖြစ်ပါတယ်။
ဆင်မ ရွာကိုသွားရာလမ်းတစ်လျောက် ဆိုက်ကယ်နဲ့ ရေကျချိန်သွားရင် ကမ်းခြေသောင်ပြင်ပေါ်ဆိုက်ကယ်မောင်းပြီးသွားရတဲ့ခံစားမှုမျိုးကပျော်ရွှင်ဖွယ်ကောင်းပြီး လမ်းတလျောက်ရှုခင်းတွေက အလွန်စိတ်ကြည်နူးဖွယ်ကောင်းလှပါတယ်။
ကမ်းခြေလမ်းတလျောက် ဟိုတယ်ဇုန်များကျော်လျင် ကမ်းစွဲပိုက် ငါး ဖမ်းခြင်းကို ပွင့်လင်းရာသီများတွင် ရွာဓလေ့တိုင်းလုပ်ကိုင်နေတာကိုချစ်စဖွယ်မြင်တွေ့နိုင်ပါတယ်။
ရေတက်ချိန်သွားမယ်ဆိုရင်တော့ ငွေဆောင် ဆင်မလမ်းတလျောက်ရွာများကို သဘာဝအတိုင်း ချစ်စဖွယ် မြင်တွေ့နိုင်ပါတယ်။
ဆင်မရွာ ရောက်ပြီဆိုတာနှင့် ရွာအဝင် တောင်ကုန်းကုန်းလေးပေါ်ကဘုရားကို ဝင် ရောက်နိုင်ပါတယ်။ ဘုရားတောင်ပေါ်မှာ ရှုခင်း များအလွန်တရာလှပပြီး ၃၆၀ ဒီဂရီ ပတ်လည်မြင်ကွင်းကို ကြည့်ရှုနိုင်ပါတယ်။ ဓါတ်ပုံဝါသနာရှင်များ ဆယ်ဖီသမားတွေအကြိုက်တွေ့နိုင်ပါတယ်။
ဆင်မကမ်းခြေတလျောက် အလွန်သာယာလှပပြီး တကယ် ကို virgin Beach ပါ။ ဆင်မကျွန်းကိုလည်း စက်လှေနှင့်သွားရောက်နိုင်ပါတယ်။
ဆင်မရွာရောက်ပြီး ဆင်မချောင်းလေးကို လှေလေးနဲ့ကူပြီးဆက်သွာမယ် ဆိုရင်တော့ ကျွန်းဘုံဒို ခေါ် လိပ်ကျွန်းကို သဘာဝတိုင်မြင်တွေ့နိုင်ပါတယ်။ ရေကျချိန်ဆိုရင်တော့ ကျွန်းကိုလမ်းလျောက်သွားနိုင်ပြီး ရေတက်ရင်တော့ ခါးလယ်လောက်ရှိပါတယ်။
အနီးနားပတ်ဝန်းကျင် ကမ်းခြေမှာအလွန်လှပပြီး ကျောက်လှည်းဘီးရာများကို ကျောက်ဆောင်တွေနဲ့အတူ မြင်တွေ့နိုင်ပါတယ်။တကယ့်သဘာဝအလှတွေကိုခံစားရမှာပါ။
အပြန်မှာတော့ လက်ဆောင် ဒေသထွက် ပုဇွန်ခြောက်၊ငါးနီတူခြောက်နှင့် ဟိုတယ်အပြန်ချက်ခိုင်းဖို့ ငါးဒိုင်တွေမှာ ပင်လယ်ထွက် ငါး၊ပုဇွန်၊ပင်လယ်စာတို့ ကိုဝယ်ယူနိုင်ပါတယ်။
စားဖို့သောက်ဖို့ကတော့ ထမင်းဆိုင်၊စားသောက်ဆိုင်၊လဘ္ဘက်ရည်ဆိုင်၊ကုန်စုံဆိုင်၊မုန့်ဆိုင်လေးတွေတော့ရှိပါတယ်။
ဆင်မရွာ ကဒေသထွက်ပင်လယ်စာ အကောင်းဆုံးပါ ငွေဆောင်ဟိုတယ်များ၊စားသောက်ဆိုင်များ၊၊ရန်ကုန်တို့အထိတင်ပို့ကြတယ်လို့သိရပါတယ်။ချစ်စရွာဆင်မတံငါရွာလေးသို့ သွားရောက်လည်ပတ်ဖို့တိုက်တွန်းပရစေ။
