16/06/2026
Орон сууцны захиалга хийхдээ залилуулахгүй, хохирохгүй байхын тулд нягтлах, танилцах шаардлагатай бичиг баримтууд 👇
Баригдаж байгаа орон сууцнаас захиалга өгөөд хохирсон иргэд олон байдаг юм байна. Тэгвэл хохирохгүй байхын тулд захиалга өгөхөөс өмнө яг ямар бичиг баримтуудтай танилцах, нягтлах ёстойг доор орууллаа.
#1. Газар эзэмших гэрээ, кадастр ба egazar.gov.mn цахим хуудас
Барилга барих гэж байгаа газар нь хэний, ямар компанийн эзэмшлийн газар вэ, хэмжээ нь хэд вэ, газрын зориулалт нь юу вэ, байршил нь зөв байна уу гэдгийг Гэрээ, кадастр болон egazar.gov.mn цахим сан руу орж харна. Хэрэв газар нь өөр компанийх эсвэл байршил нь өөр, газрын хугацаа дууссан ч юм уу зориулалт нь өөр байвал эргэлзээтэй болж байгаа юм. Иймд үүний учрыг тодруулж асуух, нарийн нягтлах хэрэгтэй болно.
#2. Барилгын ажлын зөвшөөрлийн гэрчилгээ
Ер нь бол энэ гэрчилгээг авч байж л барилгын ажил эхлэх хуулийн зохицуулалттай юм. Үүнийг аваагүй бол барилга баригдаж эхлэх болоогүй л гэсэн үг. Хэрэв зөвшөөрөлгүйгээр барилгаа бариад явж байгаа бол хожим байрны гэрчилгээ олгогдохгүй, улсын комисс барилгыг авахгүй гэх мэт асуудал үүснэ.
Энэ гэрчилгээнээс барилгын товч мэдээлэл, захиалагч, гүйцэтгэгчийн мэдээлэл зэргийг харж болдог. Таны гэрээ байгуулах гэж байгаа компани захиалагч, гүйцэтгэгч нь мөн үү гэдгийг эндээс мэднэ. Хэрэв энд байгаагаас өөр компани тантай гэрээ байгуулах гэж байгаа бол үүнийг тодруулах хэрэгтэй болно. Туслан гүйцэтгэгч юм уу эсвэл борлуулалтын эрх авсан компани уу гэх мэт...
#3. Архитектур төлөвлөлтийн даалгавар
Хүмүүс үүнийг товчлоод А даалгавар гэдэг. Энэ их чухал бичиг баримт байдаг. Энэ баримтаас барилга, түүний орчны төлөвлөлтийн мэдээллийг харж болдог. Хэдэн давхар, үйлчилгээ, оффистой юу эсвэл дан орон сууц уу, хотхон бол төлөвлөлт нь ямар вэ зэрэг мэдээлэл эндээс харагдана. Барилга бол яг А даалгаварт заасан цэгт, яг тэнд заасан ёсоор баригдана гэсэн үг. Иймд таны барилгын байршил нь яг хаана вэ, хажуу талд нь хэдэн давхар барилга баригдах вэ зэргийг харна гэсэн үг.
#4. Барилгын зураг төсөл
Барилгын зураг төслийг бас төрийн эрх бүхий байгууллагаар батлуулдаг. Тэр зургийн дагуу барилга баригдана. Иймд танд үзүүлж буй байрны төлөвлөлт, өрөөний зохион байгуулалт зэрэг нь яг батлагдсан зураг төсөлдөө нийцэж байна уу, үнэн зөв үү гэж тэндээс харж болно.
Мөн зөвшөөрөл олгосон, А даалгавар баталсан төрийн байгууллага руу холбогдож, тэдгээр бичиг баримтууд хүчинтэй юу, өөрчлөлт ороогүй юу гэдгийг тодруулбал бүүр зөв. Яагаад гэвэл таны танилцсан дээрх бичиг баримтууд хүчингүй болох юм уу өөрчлөлт орсон байж болно.
За тэгээд гэрээндээ дээрх бичиг баримтуудыг тусгаж, үүний дагуу захиалга хийсэн гэдгийг тусгах нь зөв.
Үүгээр орон сууцны захиалга өгөхөөс өмнө танилцах, нягтлах шаардлагатай гол баримт бичгүүдийг бичлээ. Хадгалаад аваарай 👍
Хуульч А.Базар
Өмгөөллийн “Хэруга Партнерс” ХХК
