19/05/2026
#Ипотекийнзээл
Жилийн 6 хувийн хүүтэй орон сууцны зээлд хамрагдахаар 47,000 гаруй иргэний хүсэлт хүлээгдэж байгааг Монголбанк мэдээллээ.
2013 оноос хэрэгжиж эхэлсэн ипотекийн зээлийн хөтөлбөрт өнөөг хүртэл 140,000 гаруй өрх хамрагдаж 10.7 их наяд төгрөгийн зээл авчээ. Зээлийн эрэлт маш өндөр, одоогийн байдлаар хүсэлт 5-6 жил хүлээгдэж байгаагаас харахад энэ хөтөлбөрийг эрх зүйн хувьд шинэ шатанд гаргах шаардлагатай байна гэдэгт Монголбанк болон Засгийн газар санал нэгдсэнээ илэрхийлж байсан юм.
Орон сууцны санхүүжилтийн банкны тухай хуулийн төсөл болон орон сууцжуулалтын тухай хуулийн төслийг боловсруулж, гурван удаа хэлэлцүүлээд байгаа. Энэ хүрээнд 6 хувийн хүүтэй хөтөлбөрийг ЗГ-т үе шаттайгаар шилжүүлж, шинээр байгуулах Орон сууцны санхүүжилтийн банкны анхны хөрөнгө оруулалт хийх ажлууд хүлээгдэж байгааг Монголбанкны Ерөнхийлөгч мэдэгдэж байв.
Эрэлт ихтэй, нийлүүлэлт талд санхүүжилтийн эх үүсвэр дутмаг, хязгаарлалттай байгаа нь зах зээлд үнэ өсөх бас нэгэн хүчин зүйл болж байна гэж салбарын яам үзэж буй. Тиймээс дээрх хоёр хуулийн хүрээнд төсөл хэрэгжүүлэгч барилгын компаниудыг газар болон санхүүжилтийн хувьд батлан даалт гаргаж дэмжих, мөн ипотекийн шаардлага хангахгүй иргэдэд түрээсийн ба түрээслээд өмчлөх боломж бүрдүүлэхээ илэрхийлжээ
Source: Bloomberg TV Mongolia
