17/02/2026
ЭРХЭМ ХҮНДЭТ АХМАД НАСТАН, ЭЛЭГ НЭГТ МОНГОЛ ТҮМЭНДЭЭ
XVII ЖАРНЫ “СҮРЭЭР ДАРАГЧ” ХЭМЭЭХ ГАЛ МОРИН ЖИЛИЙН САР ШИНИЙН МЭНДИЙГ ӨРГӨН ДЭВШҮҮЛЬЕ
Сар шинийн баяр нь өвөг дээдсийн ухаан, үндэсний дархлаа болсон зан заншил, өрх гэрийн эв нэгдэл, төр улсын бат бэхийн бэлгэдэл билээ.
Бид тооноороо нарны гэрлийг тосож, босгоороо буяныг угтаж, ахмадаа хүндэтгэж, удам угсаагаа дээдлэн золгодог ард түмэн.
Энэ л үнэт зүйлс Монгол Улсын маань тусгаар тогтнол, төрт ёсны дархлааг үеийн үед өвлүүлэн хамгаалж ирсэн.
Сар шинийн босгон дээр
Эв нэгдлийг эрхэмлэж,
Ёс уламжлалаа нандигнаж,
Хөдөлмөр бүтээлээ арвижуулж,
Эрүүл энх, зөв амьдралын хэв маягийг түгээн дэлгэрүүлж хамтдаа хөгжин дэвшихийн ерөөлийг өргөж байна.
Айл өрх бүлийн гал голомт бадран асаж,
Ахмад буурлуудын ерөөл биеллээ олж,
Ирээдүй болсон хүүхэд багачуудын инээд цангинаж,
Эх орон минь амгалан тайван,
Иргэн бүрийн амьдрал элбэг хангалуун, эрүүл энх байх болтугай.
Сар шинэдээ сайхан шинэлээрэй.
Монгол түмэн минь мөнхөд хүчирхэг байг ээ.
