09/02/2025
ОРОН СУУЦНЫ ЗЭЭЛ АВАХ АЛХМУУД
Орон сууцны зээл авах явц төвөгтэй, олон шат дамжлагатай. Иймд танд зориулан алхам бүрийг ойлгомжтой, хялбар байдлаар хүргэж байна.
АЛХАМ 1: БАЙРАА СОНГОХ
Байрны зээл хөөцөлдөхийн өмнө орон сууцаа сонгоорой. Тухайн орон сууцыг та зээлээр авах боломжтой эсэхээ мэдэхийн тулд банканд хандаж, урьдчилсан судалгаа хийлгэх хэрэгтэй.
Бяцхан зөвлөгөө: Шинээр ашиглалтад оруулсан орон сууцны хувьд инженерийн дэд бүтэц (цахилгаан, дулаан, ус, ариутгах татуурга, холбоо дохиолол)-д бүрэн холбогдсон, эрх бүхий байгууллагын шийдвэрээр ашиглалтад хүлээн авсан орон сууц байх; харин ашиглагдаж байгаа орон сууцны хувьд инженерийн дэд бүтцэд бүрэн холбогдсон, барилгын техникийн хяналт хэрэгжүүлэгч байгууллагын шийдвэрээр ашиглахыг хориглоогүй байр байх шаардлагатай.
АЛХАМ 2: БАНКНЫ АЖИЛТНААС ЗӨВЛӨГӨӨ АВАХ
Худалдан авах байраа сонгосны дараа банкны харилцааны менежертэй уулзаж, дараах мэдээллийг өгнө:
- Өөрийн болон хамтран зээлдэгчийн орлого, санхүүгийн мэдээлэл
- Байрны талаархи дэлгэрэнгүй мэдээлэл
- Урьдчилгаа төлбөр төлөх төлөвлөгөө
Харилцааны менежер танд тохирох зээлийн нөхцөлийг танилцуулж, шаардлагатай зөвлөгөө өгөн, зээл авах боломжтой эсэхэд урьдчилан дүгнэлт хийж, шаардагдах бичиг баримтын жагсаалтыг өгнө.
Бяцхан зөвлөгөө: Та байраа хараахан сонгоогүй байсан ч зээлээ судлуулж, урьдчилсан батламж авах боломжтой.
АЛХАМ 3: ЗЭЭЛИЙН ХҮСЭЛТ ГАРГАХ
Харилцааны менежерийн өгсөн жагсаалтын дагуу шаардлагатай бичиг баримтуудыг бүрдүүлэн, банканд зээлийн хүсэлтээ гаргана. Үүнд:
- Зээлийн маягт бөглөх
- Өргөдлийн хураамж төлөх
- Байр болон орлогын талаарх мэдээлэл өгөх
АЛХАМ 4: БАНКНЫ СУДАЛГАА
Банк таны сонгосон орон сууц болон бизнесийн орлогыг газар дээр нь судална. Үүнд:
- Худалдан авах орон сууц
- Бизнесийн орлогыг газар дээр нь үнэлэх ажлыг тус тус хийнэ
Жич: Цалингийн орлоготой иргэдийн хувьд таны бүрдүүлсэн бичиг баримт лавлагаануудыг ашиглан судалгаа хийнэ.
АЛХАМ 5: ЗЭЭЛИЙН ШИЙДВЭР
Банк хийсэн судалгааныхаа үндсэн дээр зээлийн хүсэлтийг батлах эсвэл татгалзах шийдвэр гаргана. Хэрэв зээл олгохоор шийдвэрлэвэл:
- Танд зээл батлагдсан тухай албан ёсны мэдэгдэл өгнө.
- Улсын бүртгэлийн ерөнхий газарт (УБЕГ) хандан уг байрыг өөрийн нэр дээр шилжүүлэх талаар заавар өгнө.
Бяцхан зөвлөгөө: Та уг байрыг өөрийн нэр дээр шилжүүлж авахын тулд эхэлж худалдах, худалдан авах гэрээ байгуулж, нотариатаар батлуулна. УБЕГ-ын хураамж, бүрдүүлэх материалын талаар мэдээллүүдийг албан ёсны вэбсайтаас аваарай. Хүмүүс хоорондоо тохиролцсон тохиолдолд худалдах, худалдан авах гэрээг эхний алхам дээр хийх нь ч бий.
АЛХАМ 6: БАЙРНЫ ГЭРЧИЛГЭЭ АВАХ
Дээрх зааврын дагуу та Улсын бүртгэлийн ерөнхий газарт хандан, орон сууцаа өөрийн нэр дээр бүртгүүлнэ. УБЕГ-ын байцаагчийн заасан өдөр очиж өөрийн нэр дээр гарсан үл хөдлөх хөрөнгийн гэрчилгээг авна. Энэ нь зээлийн гэрээ байгуулах үндэс болно.
АЛХАМ 7: ЗЭЭЛИЙН ГЭРЭЭ БАЙГУУЛАХ
Байрны гэрчилгээгээ авсны дараа дахин банканд хандаж зээлийн гэрээ болон барьцааны гэрээг байгуулна. Ингэхдээ:
- ҮХХ гэрчилгээ, түүхчилсэн лавлагаа авч очих
- Эргэн төлөлтийн хуваарьтай танилцах бөгөөд
- Барьцааны гэрээ, барьцаалбар үйлдэх.
- Энэ бүхнийг УБЕГ-т бүртгүүлэх шаардлагатай.
АЛХАМ 8: ДААТГАЛД ХАМРАГДАХ
Банк таны амь нас болон үл хөдлөх хөрөнгийг даатгалд хамруулахыг шаарддаг. Энэ нь:
- Орон сууцны даатгал
- Амь насны даатгал
Бяцхан зөвлөгөө: Орон сууцны даатгал 3 жилийн хугацаатай хийгддэг, мөн зээл олголтын шимтгэл зэрэг нэлээд хэмжээний мөнгө энэ үед танд шаардлагатай болно гэдгийг давхар тооцоолоорой.
АЛХАМ 9: ЗЭЭЛ ОЛГОЛТ БА ТӨЛБӨР ШИЛЖҮҮЛЭГ
Эцэст нь банк таны зээлийг баталж, орон сууц худалдагч талд төлбөрийг шилжүүлнэ. Ингэснээр та байрныхаа түлхүүрийг авч, шинэ орон сууцандаа орох боломжтой болно.
