14/03/2026
АМГТГ: Газрын тосны бүтээгдэхүүний хадгалах агуулах шинээр барих, өргөтгөх төслийн хүсэлт хүлээн авах тухай
------------------------------------
Газрын тосны бүтээгдэхүүний хангамжийн тогтвортой байдлыг хангах, нөөцлөх хүчин чадлыг нэмэгдүүлэх, Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн холбогдох заалтын хэрэгжилтийг хангахтай холбогдуулан Аж үйлдвэр, эрдэс баялгийн сайдын Зөвлөлийн 2026 оны 03 дугаар сарын 09-ний өдрийн хуралдаан болон “Газрын тосны бүтээгдэхүүний хангамж, үнийг тогтворжуулах ажлыг зохион байгуулах, хяналт тавих үүрэг бүхий төр, хувийн хэвшил, иргэний нийгмийн хамтарсан Зөвлөл”-ийн 2026 оны 03 дугаар сарын 12-ны өдрийн дөрөвдүгээр хуралдаанаар дараах нөхцөл шаардлага, байршил, шалгуур үзүүлэлтийг хангасан бүх төрлийн шатахуун импортлох, бөөний болон жижиглэнгийн худалдаа эрхлэх тусгай зөвшөөрөл эзэмшигч аж ахуйн нэгжүүдийн газрын тосны бүтээгдэхүүний агуулах шинээр барих, өргөтгөх төсөлд хөнгөлттэй зээлийн санхүүжилт олгохоор шийдвэрлээд байна.
Хөрөнгө оруулалтын буюу хөнгөлөлттэй зээлд /хүүгийн татаас 9%/ хамрагдах тусгай зөвшөөрөл эзэмшигч аж ахуйн нэгжүүдэд тавигдах нөхцөл шаардлага, агуулахын байршил, шалгуур үзүүлэлт:
- Компанийн нөөц бүрдүүлэх тухай 2024, 2025, 2026 онуудын Засгийн газрын тогтоолд хамрагдаж, нөөц бүрдүүлэх үүрэг хүлээсэн байх;
- Бүх төрлийн шатахуун импортлох болон бөөний худалдаа эрхлэх тусгай зөвшөөрөлтэй байх;
- Агуулахын барих, өргөтгөх ажлын Архитектор төлөвлөлтийн даалгавар, загвар зураг эрх бүхий төрийн байгууллагаар батлагдсан байх;
- Барилга угсралтын ажлын төсвийг мэргэшсэн төсөвчин, эрх бүхий байгууллагаар гүйцэтгүүлсэн байх;
- Төсөл хэрэгжүүлэгч нь дагнасан хэрэглээний салбар төмөр зам салаалах техникийн дүгнэлтийг Төмөр замын асуудал эрхэлсэн төрийн захиргааны байгууллагаас гаргуулсан байх;
- Төсөл хэрэгжүүлэх газрын төмөр замын нэгдсэн сүлжээнд холбох салбар төмөр замын ажлын зураг төмөр замын асуудал эрхэлсэн төрийн захиргааны байгууллагаар хянагдсан байх;
- Цахилгаан хангамжийн техникийн нөхцөл авсан байх;
- Газрын тосны бүтээгдэхүүний агуулах барихад нийцэх зориулалт бүхий эзэмшил газар, газар эзэмших гэрчилгээ, гэрээ, кадастрын зурагтай байх;
- Төслийн товч танилцуулга, агуулахын хүчин чадал, байршил, хэрэгжих хугацаа, санхүүжилтийг тодорхой тусгасан байх;
- Шинээр барих, өргөтгөх агуулахын байршил:
Баян-Өлгий аймаг, Ховд аймаг, Ховд аймгийн Булган сум, Орхон аймаг (Эрдэнэт хот), Архангай аймаг, Баянхонгор аймаг, Өвөрхангай аймаг, Сэлэнгэ аймаг, Дархан-Уул аймаг, Төв аймаг, Говьсүмбэр аймаг, Дорноговь аймаг (Сайншанд, Замын-Үүд боомт, Ханги боомт), Өмнөговь аймаг (Цогтцэций сум, Гашуунсухайт боомт, Шивээхүрэн боомт), Сүхбаатар аймаг (Бичигт боомт), Улаанбаатар хот (Рашаант өртөө /СХД/, Амгалан өртөө /БЗД/, Толгойт өртөө /СХД/, Багахангай өртөө, Хүннү хот) зэрэг болно.
Дээрх нөхцөл шаардлага, шалгуур үзүүлэлтийг хангасан газрын тосны бүтээгдэхүүний агуулах шинээр барих, өргөтгөх төсөл хэрэгжүүлэх хүсэлт, холбогдох бичиг баримт материалыг 2026 оны 03 сарын 23-ны өдрийн дотор Аж үйлдвэр, эрдэс баялгийн яаманд ирүүлнэ үү.
Холбоо барих: Аж үйлдвэр, эрдэс баялгийн яамны Газрын тосны бодлогын газрын ахлах шинжээч Б.Бат-Оргил, шинжээч Б.Манзушир, утас 51-264181.
