19/05/2026
Танай түрээсийн зардал орлогынхоо хэдэн хувийг эзэлж байгаа вэ? Та энэ асуултанд хариулаад дараад нь үргэлжлүүлээд уншаарай.
Түрээсийн төлбөр өндөр байгаа нь бизнес эрхлэгч нарт хүнд байна гэсэн мэдээтэй холбоотойгоор түрээсийн талаар нилээд ухаж судаллаа. Үүний үр дүнд доорх дүгнэлтэнд хүрлээ:
1. Түрээсийн зардал нь цалин хөлс, бараа материалын зардлын дараа орох топ3 зардлын нэг.
Орлого/Түрээсийн зардал гэдэг үзүүлэлтээр хэмжиж үзвэл:
5-10% маш эрүүл
10-15% хэвийн, удирдаж болохуйц
15%-аас дээш эрсдэл нэмэгдэнэ
20%-аас дээш бол бизнес хийхэд хүндрэлтэй, ашигт ажиллагаа муудна.
2. Салбараас хамаарч мөн орлого/түрээс байж болох дээд харьцаа харилцан өөр байдаг:
Хүнсний дэлгүүр, супермаркет: 4% хүртэл
Түргэн хоол: 7%
Ресторан кафе: 10%
Худалдаа: 15%
Том худалдааны төв: 20%
Оффис: 12%
Дээрх хувиас дээшээ гарвал ачаалалтай болж эхэлж байгаа юм.
3. Түрээсийн зардал орлогод эзлэх хувь өндөр байснаар дараах асуудлууд бий болж эхэлдэг:
- Ашиг буурна
- Мөнгөн урсгал багасна
- Маркетинг, тэлэлтийн төсөв буурна
- Ажлын байр тогтворгүй болно
- Эцэстээ бизнес хаалгаа барихад хүрнэ.
Дүгнэвэл түрээсийн төлбөр өндөр байхдаа асуудал биш гол нь өндөр орлого олж чадах байршил мөн үү гэдгийг тооцож үзэх хэрэгтэй болж таарч байна.
Танай түрээсийн зардал орлогынхоо хэдэн хувийг эзэлж байгаа вэ?
https://www.facebook.com/share/p/18vDvJ6zgC/
Мисс С.Сарнай: Өглөөний мэнд ээ.
Гэнэт сэрээд нэг бодлоо л доо. Толгойноос гарахгүй стрессдүүлээд байхаар нь бичиж сууна.
Та нар яаж болоод байдаг юм бэ?
Яаж энэ өндөр түрээсүүдийг төлөөд, хүн цалинжуулаад, дээрээс нь зээлээ төлөөд амьдраад болоод байдаг юм бэ гэж үнэхээр гайхах юм. Одоо махны үнэ өсчихлөө гээд бүгд ярьж байна.
Гэтэл түрээсийн үнэ ингэж өсөөд байхад яагаад хэн ч дуугардаггүй юм бол? Гадуур шинэ үйлчилгээний төвүүд өчнөөнөөрөө баригдаад л байдаг. Ороод харахаар баахан хоосон талбай. Тэгсэн хэрнээ үнэ нь буурах биш, улам л өсөөд байдаг. Хүмүүс ороод л шатаж гараад байгаа нь харагдана. Тийм байхад түрээсээ уян хатан, хүн хүндээ боломжтой байлгаж болдоггүй юм байх даа гэж бодогдох юм. Өчнөөн олон брэнд дампуурлаа. Facebook бараг орох болгондл дэлгүүр бууж байгаа тул зарна гэсэн постууд харах боллоо.
Дээрээс нь 3+1, 6+1 гээд бараг байрны урьдчилгаатай дүйцэх хэмжээний мөнгө төлж байж орно. Ямар тооцооллоор ийм нөхцөл гаргадаг юм бол гэж үнэхээр ойлгодоггүй.
Уг нь түрээсэлж байгаа хүмүүс чинь худалдан авах боломжгүй, дундаж амьдралтай хүмүүс л байдаг байлгүй дээ тэ. Гэтэл түрээслүүлэгчид нь бүгд боломжтой баян хүмүүс байдаг болоод тэрүү энэ байдлыг ойлгодоггүй юм болов уу гэж хүртэл бодогдох үе байх юм.
Бид хоёр ч нуух юм юу байх вэ, чардайж байж л хэдэн төгрөг олж түрээс, зээлээ төлөөд явж байна.
Хэзээ нэг өдөр түрээс төлөхгүй, зээлний дарамтаас гарч, өөрийн гэсэн ажлын байртай болоод хүнд биш ядаж өөрийн юмандаа төлдөг болоод суух юмсаан гэж мөрөөдөх юм.
Заримдаа хүмүүсийг яаж ингэж стрессгүй юм шиг амьдраад болоод байдаг юм болдоо гэж үнэхээр гайхах юм… Эсвэл үнэхээр болоод байдаг юм болуу... Эсвэл хэцүү байгаагаа ил гаргахаас ичээд байдаг юм уу... Энэ тал дээр дуугарах хүн байдаггүй юм уу...
Урд нь ч буцаад гадагшаа явчихмаар л байдаг байлаа. Одоо 3 хүүхдээ бодохоор эх орондоо тайван, санаа зовох зүйл багатай, зүгээр л амар амгалан амьдарчихмаар санагдах юм.
Яамаар ч юм дээ…
