25/06/2024
Гуйя, ГАНЦ ЭМЭГТЭЙ дугуйлчихаарай
Яагаад гэж үү? Учир нь:
Нэг. Бид бүгдээрээ Ковидын үеийг мартаагүй, хөл хорионы элдэв “амьдралгүй” заавар, журмын улмаас жирэмсэн, хөхүүл эмэгтэйчүүд, хорт хавдрын эмчилгээтэй иргэд, хөгжлийн бэрхшээлтэй хүмүүс, ганц биеэрээ амьдардаг ахмад амь дүйж байсан. Учир нь тэдгээр шийдвэрийг “ганц эмэгтэй хүн үгүй” комисс гаргасан байдаг. Хөөрхий, дан эрчүүд муудаа биш, тэдний тархинд хэзээ ч “жирэмсэн, хөхүүл хүн яах билээ” гэдэг бодол орж ирэхгүй. Энэ амьдрал чинь өөрөө эрэгтэйчүүд, эмэгтэйчүүд, бусад хүнээс бүрддэг БАЯЛАГ учир ОРОЛЦОО хангаж байж, амьдралд нийцэх шийдвэр гарна.
Хоёр. Жендэрийн эрх тэгш байдал гэхээр "эмэгтэй хүн дарга болох гээд" байгаа юм шиг л ойлголт хэдийнээ хэвшчихсэн, яг л “охин төрсөн бол ягаан өлгий” гэдэг шиг. Гэтэл өнөөдөр шийдвэр гаргах түвшинд эмэгтэйчүүдийн оролцоог хангаагүйгээс “ЭРЭГТЭЙЧҮҮДИЙН ЭРҮҮЛ МЭНД 00” болчихоод байна. Монгол улсад жилд (2023 онй статистик үзүүлэлтээр) 11930 хүн нас барж буйгийн 60% нь эрэгтэйчүүд, нас баралтын шалтгааны эхний 3т Зүрх судасны өвчин, хавдар, гэмтэл ордог ба энэ гурван шалтгаанаар нас барагчдын 65%-ийг эрэгтэйчүүд эзлэж байна. Таны дэргэд байгаа хөгшин залуу ямар ч хүнээс асуугаад үзээрэй,
-Ажил хийх чухал уу, эмнэлэгт үзүүлэх чухал уу?
гэж.
Үр хүүхэд, гэр бүлийнхээ эрүүл мэндийг эмэгтэйчүүд илүү анзаардаг. Орчны бохирдол, байгаль эх дэлхийг хайрлах сэтгэл, ЗҮТГЭЛ эмэгтэйчүүдэд бий.
ГУРАВ. Заа, бүгдээрээ нүдээ аниад бодоод үзъе, их сургуулиа төгссөн эрэгтэй, эмэгтэй нэг ангийхан. Аль аль нь “хүнтэй суулаа”, “хүүхэдтэй боллоо”. Заа тэгээд 10 жил өнгөрөхөд юу болох вэ? Оюутны ширээнд миний дэвтрээс хуулсаар хамт төгсөн залуу 10 жилийн дотор надтай адилхан хүнтэй сууж, хүүхэдтэй болсон хирнээ ажил, албан тушаал тасарлтгүй өссөөр…
Харин эмэгтэй нь яах уу?
Хүүхэд төрүүлээд, хүүхэд төрүүлээд …. Албан тушаал ахих битгий хэл адваг цалинтай ажил ч байхгүй, ажил хийх боломж ч байхгүй, хүүхдээ өгөх ясли цэцэрлэг ч байхгүй, хүүхдүүдээ сургууль цэцэрлэгт өөрөө зөөгөөд “нэргүй зарц” болно. Харин эр нөхөр нь ГАНЦ хүний цалингаар өрх гэрээ авч явах гэж гүрийсээр…. Үүний цаад шалтгаан “ИРГЭД ТАЙВАН АМЬДАРЧ, ЗОХИСТОЙ АЖЛЫН БАЙР-тай байх эрх үгүйлэгдсээр.
Монгол улс хөдөлмөрийн насны Хөдөлмөрийн насны 2,231,704 хүний 1,193,518 нь ажилгүй,тэдний талыг эмэгтэй, ахмад, сурч байгаа буюу залуу, хөгжлийн бэрхшээлтэйн учраас ажиллах хүчнээс гадуур гэж тооцож байгаа.
ТЭГЭХЭЭР, эмэгтэйчүүд хүүхэд төрүүлэх байгалиас заяасан үүргийнхээ төлөө ХҮН хэмээх бодгалийн хувьд эдлэх ёстой ЭРХ-ээ эдлэхгүй байх нь ШУДАРГА БУС бөгөөд энэхүү ШУДАРГА ЁС-ыг эдлүүлбэл эрэгтэй, эмэгтэй, бусад хүйс болоод бүх насны ХҮН-д ээлтэй юм.
Өөр олон учир шалтгаан буй хэдий ч Таныг залхаагаад яахав.
МИНИЙ НАЙЗУУД УХААНТАЙ ДАА, УХААНТАЙ
Гуйж байна, ГАНЦ ЭМЭГТЭЙ ОН дугуйлчихаарай :)
Эмэгтэйчүүдийн эрхийн төлөөх Төрийн Бус Байгууллагууд сүүлийн 20-оод жилийн хөдөлмөрөөрөө улс төрийн намын хуулийг өөрчлөн байж нэр дэвшигчдийн 30 хувьд нэг хүйс байх СОНГОЛТ-ыг ТАНЫ ГАРТ авч ирлээ, одоо шийдвэрлэх эцсийн ГООЛ танаас шалтгаална.
Таныг хүндэтгэсэн,
Монгол Улсын иргэн, Хүний эрхийн идэвхтэн, Жендэрийн Үндэсний Шинжээч Шагдарсүрэгийн Ариунаа
