12/10/2024
Дуу чимээний бохирдол нь дэлхий дахинд агаарын бохирдлын дараа орох том хэмжээний бохирдлын нэг гэж тооцогддог.
Дуу чимээний бохирдол олон эх сурвалжтай. Гудамж, зам талбай, нийтийн тээврийн хэрэгсэл, тоглоомын талбай, худалдааны төв болон үйлдвэр, станцуудын дуу гээд тоочоод байвал энэ жагсаалт дуусахгүй.
Түүний нөлөө
- Их дуу чимээ сэтгэцэд нөлөөлдөг. Байнгын дуу чимээтэй орчинд ажиллаж, хотын төвд амьдардаг хүмүүс нам гүм орчинд байдаг хүмүүстэй харьцуулахад илүү уур уцаартай, аймхай, өөртөө итгэлгүй, гутранги байдаг нь хэд хэдэн судалгаагаар тогтоогдсон байна.
- Дуу чимээ ихтэй орчинд анхаарал төвлөрүүлэх амаргүй тул ажлын бүтээмж багасна.
- Их дуу чимээ зүрхэнд нөлөөлж, хэмнэл алдахад нөлөөлдгийг судлаачид тогтоожээ.
- Хоол боловсруулах эрхтэнд ч их дуу чимээ нөлөөлнө. Чанга дуу чимээтэй орчинд дотор тавгүйтэх нь их тул ходоод гэдэсний үйл ажиллагаа саарч, энэ нь олонтаа давтагдвал хоолны шингэц мууддаг.
Хэрхэн чимээний бохирдолд хэрхэн өртөхгүй байх вэ?
• Гэрт их дуу гаргадаг хэрэгслүүдийг анзаарч, боломжтой бол дуу багатай бүтээгдэхүүн сонгож байгаарай.
• Ажиллаж, амьдардаг орчиндоо мод тарь. Энэ нь дуу чимээний бохирдлыг бууруулаад зогсохгүй орчны агаарыг цэвэршүүлж, чийг хураан, амар амгалан, нам гүм мэдрэмж төрүүлнэ.
• Зайлшгүй шаардлагатай биш л бол машиныхаа дуут дохиог битгий хангинуул.
• Байгальд ойр, төв замаас зайтай, чимээ багатай тайван газарт амьдар.