01/12/2020
Та дэгдэхээс өмнө орон сууц худалдан авахаар төлөвлөж байсан юм биш биз? Магадгүй энэ цаг үе хамгийн тохиромжтой байж болох талууд харагдаж байгааг харуулая.
Одоогоор барилгын компаниудын ажил зогссон байна. Энэ үе нь жилийн хамгийн ач холбогдол өндөртэй ажлууд явагддаг буюу халаалтаа авсаны дараах ашиглалтад орохын өмнөх ажлууд хийгддэг үе юм.
Энэ үед барилгын ажлын гүйцэтгэл 80%-аас дээш байдаг бөгөөд ашиглалтад орохтой зэрэгцэн жилийн хамгийн өндөр борлуулалт хийгддэг сарууд нь өмнөх жилүүдийн тоон мэдээллээс харахад 11, 12-р сарууд байдаг.
Энэ онд багтаж ашиглалтад оруулахаар төлөвлөсөн орон сууц 4000 орчим гэсэн албан бус тоо мэдээлэл байгаа бөгөөд тэдгээрийн борлуулалттай холбоотой мөнгөн урсгал барилгын салбарт орох хугацаа нь мөн хойшилж байна.
Энэ нь барилгын салбарт ажиллаж буй ажилчид, туслан гүйцэтгэгчид, бригадуудад очих цалин, ажлын хөлс тасалдах, барилгын компаниуд банкны зээлээ төлж чадахгүй зэрэг нөхцөл байдалд хүргэхээр харагдаж байна.
Өнөөгийн барилгын салбарын төлбөрийн нэг хэрэгсэл буюу бартерийн нөхцөл нь салбарын гол хөдөлгөгч хүч болоод байсан. Гэтэл одоогийн нөхцөл байдлаас шалтгаалан барилгууд ашиглалтад орох хугацаа хойшилсон дагаад борлуулалтаас орж ирэх мөнгө түүнээс илүү хойшилж байгаа нь барилгын гүйцэтгэгч, бригадууд зэрэг ажиллах хүчний цөмийг бүрдүүлэгчдийн орлого тасалдахад хүрч байна. Эдгээр туслан гүйцэтгэгч, бригад зэрэг бүтээн байгуулагчид нь нэг үгээр урд хормойгоороо хойд хормойгоо нөхөж өдөр хоногийг өнгөрүүлдэг бөгөөд циклд нэг алдахад өвдөлтийг хүчтэйгээр мэдэрдэг. Эндээс харахад барилгын компаниуд өмнөх арга барилаараа ажиллахад хүндрэлтэй харагдаж байна. Тиймээс нөхцөл байдалд тохирсон арга хэмжээг яаралтай авахгүй бол асуудал улам хүндрэх вий.
Дийлэнх компаниуд одоо хэрэгжүүлж буй бүтээн байгуулалтаа дуусгахаар шалавлах бөгөөд одоогийн тодорхойгүй нөхцөл байдалд шинээр бүтээн байгуулалт төлөвлөх нь эрсдэлтэй тул хойшлуулах талтай. Иймд барилгын салбарын ажилгүйдэл, цомхотгол, сул зогсолт явагдах нөлөөтэй.
Барилгын салбарынхны хувьд товчхондоо одоо хийж байгаа ажлаа хурдан дуусгаж борлуулалтад гаргахыг хичээн ажиллана. Мөн шинээр бүтээн байгуулалт хийхгүй учир ажилчид сул зогсоно. Бартерийн систем тасалдсан, банкны зээл төлөлт зэргээс шалтгаалан борлуулалтыг шахах арга хэмжээ явагдах бөгөөд зах зээлд Covid-19-тэй холбоотой худалдан авагчдын орлого тасалдсан нөгөө талаасаа цаашид хэрхэхийг тандан хүлээлтийн байдалтай байгаа бөгөөд үүнтэй холбоотой борлуулалт огцом унах дагаад орон сууцны үнэ унах нөхцөл үүсэхээр харагдаж байна.
Энэ нь бэлэн мөнгөөр худалдан авалт хийхээр зэхэж буй хүмүүст туйлын таатай нөхцөл байдал юм. Мөн бэлэн мөнгөөр худалдан авагчид цөөн тул хувь лизинг гэх зэрэг компанийн зээлийн нөхцөлүүд олон төрлийн нөхцлүүд гарч ирнэ.
