18/05/2022
" "काठमाडौं । ०७९ को पहिलो महिना बैशाख घरजग्गा (रियलस्टेट) व्यवसायका लागि त्यति सुखद रहन सकेन । चैतको तुलनामा वैशाखमा देशभरी घरजग्गा किनबेच ३६.७४ प्रतिशतले घटेको छ ।
वैशाख महिनामा देशभरीका मालपोत कार्यालयबाट ४४ हजार ८०३ घरजग्गा किनबेच भएका छन् । जबकी, चैतमा देभरी ७० हजार ८३० घरजग्गा किनबेच भएका थिए । चैतको तुलनामा वैशाखमा २६ हजार २७ घरजग्गा कम किनबेच भएको देखिन्छ ।
फागुनमा देशभरी ७४ हजार ३६, माघमा ५९ हजार ५१६ र पुस महिनामा ७० हजार घरजग्गा किनबेच भएको भूमि व्यवस्थापन तथा अभिलेख विभागको तथ्यांकले देखाउँछ ।
बैंक तथा वित्तीय संस्थाहरूमा देखिएको चरम तरलता अभाव र स्थानिय तह निर्वाचनको गतिविधिका कारण वैशाखमा घरजग्गा किनबेच घटेको रियलस्टेट व्यवसायी बताउँछन् । ०७८ फागुनको तुलनामा ०७८ चैतमा घरकर्जा घटेको राष्ट्र बैंकको वित्तीय प्रतिवेदनले देखाइसकेको छ । त्यसको निरन्तरता ०७९ वैशाखमा पनि भएको हुन सक्ने अनुमान छ ।
बैशाख महिनामा देशभरीका मालपोत कार्यालयबाट सेवाग्राहीलाई ९८ हजार ९७४ सेवा प्रवाह भएको छ । जबकी, चैतमा देशभरीबाट एक लाख ५९ हजार २६४ सेवा प्रवाह भएको थियो ।
घरजग्गा किनबेचसँग अरु सेवा प्रवाहको संख्या पनि घटेपछि राजश्व असुली पनि घटेको छ । वैशाखमा देशभरीबाट ४ अर्ब ७८ करोड रुपैयाँ कुल राजश्व असुली भएको छ । गत चैतमा ५ अर्ब ७५ करोड ७४ लाख रुपैयाँ राजश्व असुली भएको विभागले जनाएको छ ।
सबैभन्दा धेरै घरजग्गा किनबेच गराउने मालपोत
बैशाख महिनामा पनि सबैभन्दा धेरै घरजग्गा किनबेच गराउने मालपोतमा सुनसरीको इनरुवा र मोरङको बेलवारी नै अगाडि देखिएका छन् ।
वैशाखमा इनरुवाबाट २ हजार ६४ घरजग्गा किनबेच हुँदा बेलवारीबाट १८ सय ८९ घरजग्गा किनबेच भएका छन् ।
यस्तै, झापाको भद्रपुरबाट १७ सय २०, जनकपुर १५ सय ३६, काभ्रे एक हजार ८६, लगनखेल १४ सय ३१, कलंकी ११ सय १०, मकवानपुर १ हजार १५, चितवन ११ सय ३५, बाँकेको नेपालगञ्जमा १३ सय ७९ घरजग्गा किनबेच भएको विभागले जनाएको छ ।
वैशाखमा २३ हजार ३३५ घरजग्गा रोक्का भएका छन् भने १५ हजार १३१ घरजग्गा फुकुवा भएका छन् । बैंक तथा वित्तीय संस्थाहरुमा सम्पत्ती धितो राखेर कर्जा निकाल्नका लागि नेपालमा प्रायः मालपोत कार्यालयमा घरजग्गा नै धितो बन्धक (रोक्का) राख्ने चलन छ ।
तरलता संकटको प्रभाव घरकर्जामा देखिँदै
(Post Credits: )
https://bit.ly/3sIFEPT .com
