25/10/2022
मौलिक जरोकिलो पार्टीको २४ बुँदे सङ्कल्प पत्र :
१) नेपालको संविधानको पुनर्लेखन गरेर धर्म निरपेक्षता खारेज गरी सनातन धर्मसापेक्ष राष्ट्र लेखिनेछ । धर्मपरिवर्तनलाई पूर्ण रूपमा प्रतिबन्ध लगाइनेछ । धर्मपरिवर्तन गराउनेलाई अत्यन्त कडा सजायको व्यवस्था गरिनेछ ।
२) अवैज्ञानिक किसिमले तयार गरिएको खर्चिलो वर्तमान संघीय संरचनालाई परिवर्तन गरेर पानीढलोको सिद्धान्त (Watershed theory) मा आधारित, गण्डकी, कोशी, कर्णाली राजधानी प्रदेश हुने (३+१) ढाँचाको संघीयता निर्माण गरिनेछ ।
३) विशेष मौलिक निर्वाचन विधिद्वारा प्रत्यक्ष निर्वाचित कार्यकारी व्यवस्था गरिनेछ ।
४) एमसीसी, बिआरआई, रिभरलिंक लगायतका रणनीतिक परियोजनाको लागि भएको सम्झौताहरू खारेज गरिनेछ ।
५) सांसदहरू मन्त्री बन्न नपाउन, केन्द्रमा ९ जना र प्रदेशमा ५ जना मात्रै मन्त्री हुने व्यवस्था गरिनेछ । सांसदहरूलाई सांसद विकास कोष वा अन्य कुनै बहानामा करोडौँ रकम दिइने प्रावधान तत्काल बन्द गरिनेछ ।
६) संविधानमा लेखिएको ’समाजवाद उन्मुख’ भन्ने वैचारिक जाल खारेज गरेर ’वैज्ञानिक सत्ययुग उन्मुख’ भनेर लेखिनेछ ।
७) कडा व्यक्तिगत पात्रता परिक्षणपछि मात्रै नागरिकता दिने ’राष्ट्रिय नागरिकता नीति’ लागू गरिनेछ ।
८) शक्तिशाली संयन्त्र खडा गरी भ्रष्टाचारको तीव्र छानविन, दोषीलाई कठोर सजाय र सर्वस्वहरणसम्म गरिनेछ ।
९) नेपाली नागरिकमाथि सिमानामा हुने ज्यादती रोक्न विशेष दस्ता खडा गरिनेछ । निश्चित स्थानहरूबाट अभिलेखीकरण गरेर मात्रै सिमा वारपार गर्ने व्यवस्था लागू गरिनेछ । मिचिएका सिमाना फिर्ता ल्याउन कडा कुटनीतिक कदम चालिनेछ ।
१०) विदेशी र विधर्मी एजेण्डा बोकेका एनजीओ र आइएनजीओमाथि प्रतिबन्ध लगाइनेछ ।
११) नेपालको मुद्रामा श्री ५ बडामहाराजधिराज पृथ्वीनारायण शाहको तस्वीर छापेर प्रचलनमा ल्याइनेछ ।
१२) शिक्षा र स्वास्थ्यमा भइरहेको व्यापारीकरणको अन्त्य गरी ‘सक्नेले तिर्ने, नसक्नेलाई निःशुल्क’ हुने मौलिक शिक्षा र स्वास्थ्य प्रणाली लागू गरिनेछ ।
१३) नक्कली किसान मोटाउने, वास्तविक किसान पिडित रहने, किसानले समयमा मल नपाउने र स्वदेशी उत्पादनले बजार नपाउने अवस्थाको अन्त्य गरिनेछ ।
१४) विपन्न विद्यार्थीको रहेको घरमा एक एक वटा कम्प्युटर निःशुल्क उपलब्ध गराइनेछ ।
१५) हरेक पालिकामा आविष्कार केन्द्र सञ्चालन गरेर युवाहरूलाई आविष्कार (Invention) र नवाचार (Innovation)का लागि सुविधा प्रदान गरिनेछ ।
१६) इन्फरमेसन कम्युनिकेसन टेक्नोलोजी ICT बोर्ड गठन गरेर नेपाललाई विश्वकै आउटसोर्सिङ्ग केन्द्रको रूपमा विकास गरिनेछ ।
१७) आर्थिक समृद्धिको प्रमुख आधार, स्रोत साधनमाथि समुदायको अधिकार– कार्यक्रम लागू गरिनेछ । सबैको लागि आधारभुत समृद्धिको सुनिश्चितता गरिनेछ ।
१८) उद्योग, उत्पादन गृह, व्यापार आदि क्षेत्रमा शान्ति सुरक्षाको पूर्ण प्रत्याभूति गरी स्वदेशमै लगानी, स्वदेशमै रोजगारी अघि बढाईनेछ ।
१९) मातृभाषाको संरक्षणका लागि आधारभूत तहको शिक्षा मातृभाषामा गर्ने अनिवार्य व्यवस्था गरिनेछ ।
२०) जातीय छुवाछुत र विभेद हटाउन कडाइका साथ कानुनको पालना गर्नका साथै विद्यार्थीलाई सानै कक्षादेखि वंशियार र अंशियार नीतिमा आधारित प्रशिक्षण अनिवार्य गरिनेछ ।
२१) अपाङ्गता भएका व्यक्तिहरूको वैज्ञानिक किसिमले वर्गीकरण गर्ने, सामूहिक आवासको व्यवस्था गर्ने र उक्त आवास गृहलाई उत्पादन गृहको रूपमा सञ्चालन गरी राष्ट्रनिर्माणमा अग्रसर गराइनेछ ।
२२) नयाँ पुस्तालाई धर्म, संस्कृति, सभ्यता र नैतिकतासँग जोड्न ‘सुखी ज्येष्ठ नागरिक र सवल स्वसंस्कृतिकरण’ अभियान चलाइनेछ ।
२३) नेपाललाई आध्यात्मिक केन्द्रको रूपमा अन्तरराष्ट्रिय ब्राण्डिङ्ग गरिनेछ । ध्यान, योग, साधना र तीर्थाटनको लागि प्रमुख गन्तव्यको रूपमा विकास गरिनेछ ।
२४) पत्रु खाना (Junk food) को आयातमा प्रतिबन्ध लगाइनेछ । घरको भान्छालाई घरेलु प्राकृतिक औषधालयको रूपमा विकास गरिनेछ ।
