18/06/2025
⬛PARA KO MGA WATA ADN A LOKS IYAN.
🍃🍃🍃🍃🍃🍃🍃🍃🍃🍃🍃
➡Mataan a so agama a Islam na sabnar a iniporo iyan so pangkatan a kaphiyapiya e ko mbala a loks ago sabnar mambo a inisapar iyan sa tolabos so kaprataratae kiran, a mataan a so kaatowi kiran na pd anan sa mga ala a dosa. Pitharo o Rasulullah Sallalahu alayhi wasallam: ( So mga ala a dosa na: kapanakoto, ago so kaato sa mbala a loks, ago so kabunu s genawa) sa kataya so mga pd a buntal a kaato sa mbala a loks.
↘𝙋𝘿 𝙎 𝘽𝙐𝙉𝙏𝘼𝙇 𝘼 𝙆𝘼-𝘼𝙏𝙊 𝙎𝘼 𝙈𝘽𝘼𝙇𝘼 𝘼 𝙇𝙊𝙆𝙎:
🍁1) kapakaguraok angka kiran ago kapakakharata angka ko genawa iran mlaged o makanggolalan sa kataro ago galbk odi na so katarow ingka kiran sa
mga rarata.
🍁2) Kaphasung angka kiran makanggolalan sa kiphoroon ka ko lagam ka sii kiran. Pitharo Allah azzawajal : (
۞ وَقَضَىٰ رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا ۚ إِمَّا يَبْلُغَنَّ عِنْدَكَ الْكِبَرَ أَحَدُهُمَا أَوْ كِلَاهُمَا فَلَا تَقُلْ لَهُمَا أُفٍّ وَلَا تَنْهَرْهُمَا وَقُلْ لَهُمَا قَوْلًا كَرِيمًا)
Na inipaliyogat o kadnan ka a da psuwasuwata nyo inonta na skanyan, go peapea e nyo so mbala a loks sa samporna a kapeapea, na o raota o kamamasai so kaloks o isa sa dowa o to, o di na tanan siran na dingka kiran phtarowa e karimorng ako, ago dingka siran prarasnga.
🍁3) So dingka kapng gaga-ani galbk ko mga suguwan iran, sa o matrang kapn na adn ka kageraw run a "أف" O sii sa basa rktanu na gyaya so kageraw o wata sii ko loks iyan a "Eeh" Di masusuwat ko suguwanun e ina ago ama iyan. Sa adn pn a pkasima a aya nyan ipsmbag ko loks iyan na "Sakn boy susugoon" "Sakn boy di galbk", O di na dii mananasang (Dingka khapikir ikaritan iran a inu skapn e sosogoon ka skay pkababayaan iran ka maunotn ka kiran)
🍁4) So kapakaririmng a buntal iyan igera man oto a minimbaratmowa iyan si ina ago ama iyan sa laged dn o kasasayudan sa kamanga a buntal iyan, ogaid na aya myakaratarata on sa genawa na amay ka sii ko salakaw di salakaw na tanto ko makalalangas a buntal iyan (sa ayabo sama a di kakhaulog a ngipn iyan sa kapakasisinga iyan) Batadi labaw ron ko mga genawae nean.
🍁5) So kailaya ko mbala a loks sa silg. Opon iyan myailay si ina ago ama iyan na datar dn o kilat o di na glat a mata niyan sa aya bo sama a ka-khabilg a mata niyan sa langet.
🍁6) So di nyan kapagugup sa sold a walay ka inisayan iyan si ina iyan sa maid iyan (نعوذ بالله من شر ذلك) sa aya niyan pn di pakapamipiin ko nditarn iyan, ago pakapanang'l'n ko kn iyan sa somasayan sa datu o di na bae a labi a di kalkat sa igaan iyan (bakabo arap)
👉Sa so sabage (tabiya bo ko kipipiya piya ron) na mas myatomo iyan a cellphone iyan oto a maiilay nean dn a katawan iyan sa genawa niyan a pamatayan si ina iyan galbk sa sold a walay na badn oontod o di na mataman miga sa di pagugup na aya nean bo kapagugup na ikakarang iyan amay ka myapasad so galbk e ina iyan (myugup kapn)
🍁7) So kapamaawingi nean ko initinda e ina iyan odi na myapasad o mbala loks iyan laged o kageraw niyan a "da taam a initinda ini ina," o di na da timos iyan. (makasasayan sa badn pkalilid a babasal a da bali nean)
Sa so kapamaawingi ko pang'n'ngkn na di kapakae. Mataan a so Nabi Sallalahu alayhi wasallam na dadn a kyapaawingan iyan a pang'n'ngkn, o kabayaan iyan kuman na kn iyan odi na talikodan iyan,
Naba gyuto a pyamaawingan ka so pang'n'ngkn oriyan iyan na myalngan kabo kuman!
🍁8 ) Di makiphawala ki ina ago ama iyan o di na di niyan siran di pamukhagan ka madakl kon e mbayadan a project sa eskwelaan manaya manaya gyuto bsae na sara bo a mipangamlok iyan s makaisa sa mga resto aya, di nean katawan a kapakaaawid akal o loks iyan sa kapkasukata iran ko ipmbayad iyan. Oranan sinanganun si ama iyan na sara bo a di maka-social (malo ka thanod wata!)
🍁9) Di pagudas igera adn a sunguwan iyan sa badn pkada o di na badn pagega siiko mga layok iyan na dadn babo odas ko mbala loks iyan, di nean babo katawan a kapakandadamar e ina ago ama iyan o anda dn myatago a wata iran aya a kasasanaan.
🍁10) So kipkayaan ko mbala a loks. Ipkaya iyan so mbala loks iyan ba mailay o mga genawae nean. O di na ba matharo a wata iran sa aya neanun pn antap o maito e tamok so loks iyan na obabo kon sii lomipot sa pamilya geraw.
👉O di na ipkaya iyan ba niyan katabangi si ina ago ama iyan sa madakl a tao sa di nean babo kaawidn so mga cellophane a pyamamasaan i ina iyan kay bakon kalbati a kapopogi iyan a datu o di na kataid iyan a bago a tao.
🍁11) So kiphiki ilayn iyan ki darodopa iyan ago mga wata iyan a da adat iyan ki ina ago ama iyan. Sa badn malbo-lbod a kaphasunga niyan kiran.
🍁12) Di niyan di kasintae ko mbala loks iyan o di na di niyan di pamtowan laged o kageraw nean a mga talng, mga boda, ago so salakaw ron san.
🍁13) So kisoldn iyan ko mga pakasisingay sa sold a walay ran a pkaringasa on si ina ago ama iyan laged ibarat o tyago iyan sa sold a walay ran sa mga musical instrument o di na so kapakatanutanuga nyan ko sound iyan igera man oto a di mamaking sa idayda (Haram baka di pamakin'g sa boni bonian o iblis), o di na di manigupan sa sold a walay ran na pkaringasa ron so mbala a loks iyan.
🍁14) Kapsnditi nyan ko mbala loks iyan. Ibarat o myasakit o di na da maka-apas na aya nean di panditan so mbala loks iyan ka inukon magiyaya ka misabap kiran. Ibarat o mikhurang a kapakanono nean kay misabap sa dii today mag-game sa mobile legend o di na mbantay sa da bali niyan. Dingka psnditn ko loks ka, ayanga psnditi a genawangka ka galbk kanan problema na pkarambit ka bo ka paka-awida akal pn o loks ka.
🍁15) So di niyan di kapanumbiringi ko mbala loks iyan. Sa opon siran kyararangitan misabap ko marata galbk iyan na ayapn akie mawaraw a lawan pn sa arimao, a mapasang pn e kapanmbag ago kapanumbiring.
🍁16) Di nean babo mapakan'g so mbala loks iyan sa mga pepea a katharo makararani kiran antawa aka makawawatan. Di babo pakageraw ki ina ago ama iyan a "Inakulay ago amakulay I love you (pkababayaan ko skanu)" O di na "Ipkadali ko skanu" Mainot so mga wata a mga pipiya e pamikiran a di saya di makatharo misabap kon sa pkaya ogaid na ilayn ka bo ko salakaw di salakaw na mitatayak a Iloveyou nean aya. Apea bo man mapea a katharo na iphakapya dn a genawa e ina ago ama aka raksn kawn pn a o makawma ka na myakasalam ka raks a myagaks ka siran ago kyapangangarkan ka siran ago adn pn a pasalubong iran rka a khakan ah na isana ko mapea. Sa myambagean kapn so balas a p**n ko Allah.
🍁17) So di kaphanarg sa walay.
Inu kapn di panarg sa walay ka makapmamaana oto sa di ka masusurot ki ina ago ama ka. (Na san kadn badn baling sa liyo)
🍁18) kapakandakla ko mga angin. Laged o so mga luho oka di kaompas. Laged o kageraw ngka a da bago akn a bangkala, da cellphone akn a bago a badi gyuto na aya rka kinipamasaan, ago so salakaw ron pn. (Psipat ka bo ikaritan iran, o mala kanoy tamok a khagaga iran na dadn problema ron, aya awida akal na igera man oto a sasarakmita so perak iran)
🍁19) So Kaunoti o datu ki karuma nean adi ko mbala loks iyan. ( gyaya so tig tanu a inisurrender iyan si ina iyan ki darodopa iyan) sa o pkasakit si ina iyan na di nean ba bo miphamasa sa bulong kay kkmsn e darudupa iyan odi na di nean ba bo kabisita kay maalk ki darodopa iyan. Di nyan mipangalinggagaw!
🍁20) So di nean kiran kambisita ah, odi na kapangumusta-ah ago di nyan kiran kapnggastowi (o siran na da rk iran)sa ba nean siran dn pyakalipatan sa aya nean bo kambaling p**n sa mawatan na kay kyadaan dn sa napas so mbala loks iyan (myaling kapn)
🍁21) Kaplipati o wata ko mbala loks iyan batadi labaw run igera a myaloks siran sa mas myatomo iyan so galbk iyan adi so kaserbisyowi nean kiran.
🍁22) Kapran'ga nean ko mbala loks iyan o di na so ka-aloi nyan kiran, ibarat o botilya o di na glat o di na lampaso etc.
🍁23) Di nean kapamakin'ga ko mga pipiya iran a pangtoma (advice) o mbala loks iyan ka ayakon matao.
🍁24) So Kapligtowi nean kiran ago so di nean di kambokbokl apea o kailngan iran so ogop iyan.
🍁25) So kapamankhawe nean sii kiran
🍁26) kipamangniin o wata a mada so mbala loks iyan. Laged ibarat o pobre siran o di na masasakit so mbala loks iyan na di nean di mandingandingan a matay siran badn.
🍁27) kabunuwa nyan sii kiran.
🍁28) So di nean kipndua-an sii ko mbla loks iyan oyag oyag sirn antawa k miyawafat siran.
➡Pitharo Allah azzawajal:
( وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُلْ رَبِّ ارْحَمْهُمَا كَمَا رَبَّيَانِي صَغِيرًا)
Go pakainayangka kiran so gowagoway o kapangalimbabaan phoon ko kalimo go tarowangka "kadnangko kalimoon ka siran laged o kyapagoyag oyaga iran rakn ko kayto akn.
➖Sa pananggelaan tanu ba tanu pkaatowi so mbala loks tanu sa o myagdam ka sa genawanga a kyaatowan ka siran o di na myapakakharata aka genawa iran na magaan so magaan na pamangni ka kiran sa rela dingka pnayawa e ganatan ka iran na da ka babo makapamangni sa rela ago dangka siran kaserbosyowi. Ka mataan a da myakasndit sa onaan ka langun o kasndit na sa oriyan.
✍ الداعية: فرحانة عثمان
🔸 Balasangkano o Allah sa mapia ko kiyabatiya aniyo saya, phangninta siiko Allah ditano kaatowan sombla loks tano sa apia i bontaliyan a kaato a pd sagiyanan a miyanga aaloy.
🔸 Phangnintano siiko Allah ikalimo iyan so mga loks tano a miyarasay rikitano.
🔸 Balasan rka o Allah sa mapia na panamapayn ka aya, go giya page tano na invite aniyoron so AllFriend iyo iLike giya page tano.
- Like page
⏭Share...
