03/06/2020
FYI
OFFICIAL STATEMENT of BOGO CITY MAYOR ATTY. CARLO JOSE A. MARTINEZ on the 2 COVID-19 Positive cases in the City.
Bisan pa man sa tanan natong mga paninguha, pag-amping, ug pag-ampo nga mahilayo kita gikan sa hulga sa sakit nga COVID-19,subo ko nga ipadangat kaninyo mga pinalangga namong mga Bogohanon nga duha sa atuang isigka-Bogohanon ang mi-POSITIBO sa maong sakit.
Ang Dakbayan sa Bogo walay giusikan nga takna human nakahibaw kita niini. Gibuhat dayun ang mga labing mahinungdanon ug dinalian nga mga lakang aron ang mga panginahanglan sa mga nagpositibo maatiman didto sa atuang dugay na nga giandam nga Isolation Facilities. Samtang gihimo kini, gipahigayon usab ang makuti ug mabinantayong contact tracing.
Basi sa pasiunang pakisusi sa mga tinugyanan nga buhatan, ang atuang Patient number 1, usa ka 25 anyos nga babaye nga residente sa Lower Pandan. Nasayran nga niadtong Mayo 22,2020, pipila ka adlaw human gipaubos kita sa General Community Quarantine nahiuli siya dinhi human nga natanggong sa Isla sa Malapascua. Nakasinati siya’g ubo ug sip-on hinungdan nga miduol sa atuang Cebu Provincial Hospital-Bogo City (CPH-Bogo) niadtong Mayo 25 arun magpacheck-up ug tungod kay iyahang sintomas sulod sa Influenza Like Illness (ILI) Category 1, gawas sa regular nga laboratory tests, gibuhat usab ang pagkuha ug swab sample arun ipaubos sa Covid-19 PCR test kay mao man kini ang protocol. Subay gihapon sa protocol, ang mga indibidwal nga sulod sa ILI Category 1 gikinahanglan nga ipaubos sa Mandatory Home Quarantine samtang magpaabot sa resulta. Pinasikad sa gipahigayun nga contact tracing, pito (7) ka indibidwal ang nasuta nga adunay close contact ni Patient number 1.
Si Patient Number 2, 28 anyos, lalaki , kasamtangang nagpuyo sa Purok Barungoy Sitio Punta, Barangay Nailon ug walay travel history gawas sa Dakbayan sa Bogo. Mayo 25, 2020 mipaubos siya ug check-up sa CPH-Bogo tungod kay nakasinati ug sore throat, ubo, sip-on, ug paglisod ug ginhawa. Tungod kay iyahang sintomas sulod sa Influenza Like Illness (ILI) Category 1 gipaubos usab siya sa susama nga protocol nga gibuhat ngadto sa atuang Patient Number 1. Pinasikad sa gipahigayun nga contact tracing, siyam (9) ka indibidwal ang nasuta nga adunay close contact ni Patient number 2.
Ang tanan nga nalakip sa close contact persons sa duha ka Covid-19 Positive patients gikuhaan na ug Swab samples arun ipaubos sa Covid-19 PCR Test. Sila padayon nga i-isolate hangtod nga mogawas ang resulta niini.
Pinangunahan sa atuang City Health Office, inabagan sa kapulisan, DRRM ug lain pang hingtungdan nga mga kawani sa Local Government Unit gipatuman diha dayun ang mga protocol o buluhaton sa usa ka lugar nga dunay COVID-19 positive patient.
Atong gipangaliya nga ang resulta sa mga swab tests nga gihimo sa mga close contact persons mo-gawas nga negatibo.
Sayud ako ug batyag nako ang inyong kahingawa ug kabalaka sa pagkadungog ninyo sa balita nga duna nay positibo sa COVID-19 sa atuang Dakbayan. Apan miluwat lang kita niining official statement human nga ang mga lakang sa pagseguro nga dili mokaylap ang sakit napatuman.
Ato usab gisunod ang protocol sa DOH ug pangagamhanan sa Probinsya sa Sugbo. Sa maong protocol, ang atong Gobernador mao gayud ang mouna sa pagluwat sa opisyal nga pahibalo. Human niini, ang Provincial Health Office (PHO) mopahibalo sa City Health Office (CHO) aron ang CHO makahimo ug pakig-susi sa tanang panghitabo ug mo report ngadto sa Mayor sa Dakbayan. Niana pang higayona nga ang Mayor moluwat sa iyang official statement.
Akoang giseguro nga husto gayud ang kasayuran nga akong mahatag kaninyo hinungdan gihuwat usa nato ang opisyal nga report gikan sa City Health Office human kini ma verify sa makapila nga higayon.
Mga pinalangga kong Bogohanon, padayon kita nga magbinantayon nga dili ta mataptan sa COVID-19. Mag-amping kita kanunay apan dili nato itugot nga maulipon sa walay sukaranan nga kahadlok. Dili ta motuo dayon sa mga kasayuran nga gikan sa mga tinubdan nga dili kasaligan. Labaw sa tanan, hugtan nato ang pag-ampo nga kita luwas kanunay niining makalilisang nga balatian.
Stay safe mga pinalangga namong Bogohanon!
