15/09/2026
𝗞𝗥𝗜𝗦𝗜𝗦 𝗦𝗔 𝗧𝗨𝗕𝗜𝗚 𝗟𝗨𝗠𝗔𝗟𝗔—𝗣𝗗𝗥𝗥𝗠𝗖 𝗜𝗡𝗜𝗥𝗘𝗞𝗢𝗠𝗘𝗡𝗗𝗔 𝗔𝗡𝗚 𝗦𝗧𝗔𝗧𝗘 𝗢𝗙 𝗖𝗔𝗟𝗔𝗠𝗜𝗧𝗬 𝗦𝗔 𝗖𝗔𝗠𝗔𝗥𝗜𝗡𝗘𝗦 𝗡𝗢𝗥𝗧𝗘
DAET, CAMARINES NORTE — Inirekomenda ng Provincial Disaster Risk Reduction and Management Council (PDRRMC) sa Sangguniang Panlalawigan ang pagdedeklara sa buong lalawigan ng Camarines Norte sa ilalim ng State of Calamity dahil sa patuloy na krisis sa suplay ng tubig at epekto ng El Niño phenomenon.
Batay sa Resolution No. 9, s. 2026, na pinagtibay noong Setyembre 14, 2026, isinagawa ang rekomendasyon matapos talakayin ng PDRRMC ang malawakang kakulangan sa suplay ng maiinom na tubig sa ilang bahagi ng lalawigan.
Nauna nang nagdeklara ng State of Calamity ang San Vicente dahil sa water shortage na nakaapekto sa 1,312 pamilya o 5,904 katao. Nagdeklara rin ng State of Calamity ang San Lorenzo Ruiz dahil sa malawakang kakulangan ng potable water na nakaaapekto sa pang-araw-araw na pamumuhay, kabuhayan at sanitation.
Ayon sa resolusyon, kabilang din sa mga lugar na nakararanas ng krisis sa tubig ang Daet at Mercedes, habang may mga ulat ding natatanggap hinggil sa kaparehong problema sa iba pang mga bayan sa lalawigan.
Samantala, iniulat ng Provincial Agriculturist Office na 29% lamang ng rice production area sa Camarines Norte ang nakapagtanim ngayong season, na maaaring magkaroon ng malaking epekto sa produksiyon ng pagkain at kabuhayan ng mga magsasaka sa mga susunod na buwan.
Iniulat naman ng Provincial Health Office ang 431 kaso ng dengue mula Enero hanggang Setyembre 14, 2026. Ayon sa resolusyon, maaaring lumala ang sitwasyon dahil sa mga gawi sa pagtatago ng tubig sa ilang komunidad.
Iginiit din sa resolusyon na kinumpirma ng Department of Environment and Natural Resources (DENR) at National Irrigation Administration (NIA) ang mababang lebel ng tubig sa kanilang mga ulat.
Mahalagang paglilinaw: Ang dokumentong inilabas ng PDRRMC ay rekomendasyon pa lamang sa Sangguniang Panlalawigan. Ang pinal na deklarasyon ng buong Camarines Norte bilang nasa State of Calamity ay nakasalalay pa sa aksyon ng Sangguniang Panlalawigan.
