25/04/2026
12-EKTARYA NGA YUTA SA TALOMO RIVER ALANG SA SOCIALIZED HOUSING PROGRAM SA DAVAO, APRUBADO
Giaprubahan sa Sangguniang Panlungsod sa Davao City ang Preliminary Subdivision Development Plan (PSDP) ug Development Permit (DP) alang sa “Balai Calinan” socialized housing project nga pagatukuron sa Barangay Talomo River, Calinan District.
Gipresenta ni City Councilor Atty. Diosdado Mahipus Jr. ang aplikasyon sa Bria Homes Inc. human kini miagi sa technical review sa City Housing and Land Use Regulatory Unit (CHLURU).
Ang proyekto naglangkob og kapin 123,332 square meters nga yuta o halos 12 ka ektarya ug gilaraw nga mabutangan og 630 ka residential units alang sa socialized housing beneficiaries.
Sumala sa konseho, ipatuman ang proyekto pinaagi sa donation-development-turnover arrangement, diin ang yuta giturn-over na ngadto sa City Government, samtang ang developer maoy motuman sa land preparation ug subdivision development alang sa umaabot nga public housing use.
Gipasabot ni Mahipus nga ang proyekto anaa pa sa development stage, ug sa higayon nga mahuman ang land development, ang siyudad ang magplano sa sunod nga lakang alang sa pagtukod sa mga housing units ug sa paghatag niini ngadto sa kwalipikadong benepisyaryo pinaagi sa abot-kayang pamaagi.
Padayon sab ang Davao City Housing Office sa paglista ug pagdawat og aplikasyon gikan sa mga low-income earners, lakip na ang informal settler families (ISF) ug mga nagpuyo sa delikadong lugar.
Lakip sa mga kwalipikasyon nga kinahanglan residente sa Davao City, low-income earner, wala’y laing yuta nga gipanag-iya, ISF o nagpuyo sa danger zones (priority), base sa year of entry alang sa displaced ISF.
Gipahibalo usab nga ang pagpili sa mga benepisyaryo pagadesisyunan base sa existing guidelines ug prioritization protocol sa siyudad.
Dugang detalye atangi sa 93.9 iFM News Davao!
Via || Idol Danica Raneses
📷 Councilor Diosdado Mahipus Jr./Facebook
ctto
