15/07/2026
𝐋𝐓𝐎, 𝐍𝐀𝐆𝐋𝐀𝐁𝐀𝐒 𝐍𝐆 𝐒𝐂𝐎 𝐋𝐀𝐁𝐀𝐍 𝐒𝐀 𝐃𝐑𝐀𝐘𝐁𝐄𝐑 𝐀𝐓 𝐑𝐄𝐇𝐈𝐒𝐓𝐑𝐀𝐃𝐎𝐍𝐆 𝐌𝐀𝐘-𝐀𝐑𝐈 𝐍𝐆 𝐓𝐎𝐘𝐎𝐓𝐀 𝐋𝐀𝐍𝐃 𝐂𝐑𝐔𝐈𝐒𝐄𝐑 𝐒𝐀 𝐕𝐈𝐑𝐀𝐋 𝐇𝐈𝐓-𝐀𝐍𝐃-𝐑𝐔𝐍 𝐈𝐍𝐂𝐈𝐃𝐄𝐍𝐓; 𝐋𝐈𝐒𝐄𝐍𝐒𝐘𝐀 𝐒𝐔𝐒𝐏𝐄𝐍𝐃𝐈𝐃𝐎, 𝐒𝐀𝐒𝐀𝐊𝐘𝐀𝐍 𝐈𝐍𝐀𝐋𝐀𝐑𝐌𝐀
Sa direktiba ni Land Transportation Office (LTO) Chief, Assistant Secretary Markus V. Lacanilao, agad na inisyuhan ng Show Cause Order (SCO) ang rehistradong may-ari at ang sangkot na drayber ng isang Toyota Land Cruiser matapos maiugnay sa isang viral hit-and-run incident.
Sa naturang video, makikita ang sangkot na Toyota Land Cruiser na iniuugnay sa hit-and-run incident sa Ortigas Avenue, Mandaluyong City. Makikita rin sa video na natatakpan ng sticker ng House of Representatives (HOR) ang conduction sticker ng naturang sasakyan.
Dahil dito, agad inatasan ang rehistradong may-ari at ang drayber na humarap sa Intelligence and Investigation Division (IID) sa itinakdang pagdinig upang magpaliwanag kung bakit hindi sila dapat managot sa mga kasong Tampering of Authorized Motor Vehicle License Plates and/or Third Plate Plate Sticker, Reckless Driving, at Improper Person to Operate a Motor Vehicle, bukod sa iba pang paglabag na maaring matukoy sa nagpapatuloy na imbestigation.
Kasabay nito, isinailalim sa alarm status ang naturang sasakyan habang nagpapatuloy ang imbestigasyon. Isinailalim din sa 90-araw na preventive suspension ang driver’s license ng sangkot na drayber at inatasan siyang isuko ito sa IID.
“Walang sinuman ang higit sa batas. Hindi magiging batayan ang anumang katungkulan, posisyon, o impluwensya upang makaiwas sa pananagutan. Patuloy nating ipatutupad ang batas nang patas at walang kinikilingan para sa kaligtasan ng bawat gumagamit ng lansangan,” pahayag ni Assistant Secretary Lacanilao.
Muling iginiit ng LTO na patuloy nitong paiigtingin ang patas at walang kinikilingang pagpapatupad ng mga batas at regulasyon upang mapanagot ang mga lumalabag at mapanatili ang kaayusan at kaligtasan sa ating mga lansangan.