03/05/2021
BOJO RIVER CRUISE
Nature lover ka ba, ug sa samang higayon gusto ug adventure?
Bagay nimo ang Bojo River Cruise sa lungsod sa Aloguinsan sa habagatan-kasadpang bahin sa Sugbo o 90 kilometros gikan sa syudad sa Sugbo.
Usa lang kini sa mga sikat nga destinasyonan o suroyanan sa lungsod.
Sakay sa baroto o kaha glass boat, baybayon sa cruise ang 1.4 kilometro nga gilay-on sa sapa taliwa sa labong nga pagatpatan paingon sa baba sa dagat sa Tañon Strait.
Ang pulong nga "bojo" nagpasabot sa espanyol ug "river ceiling" apan sa bisaya nagkahulogan ug boho o lungag o baba paingon sa dagat.
Sa karaang panahon , dinhi magpasalipod ang mga sakayan sa kadagatan kung modagku ang bawod tungod sa dautang panahon.
Sa wa pa ipromote ang Bojo River Eco-Cultural Tour niadtong 2009, gihimo usab kining agianan sa mga gagmay'ng mananagat sa maong lugar paingong gawas ngadto sa dagat.
Makita sa Bojo River ang di momenos 20 ka species sa mangrove ug pasilongan sa kapin 60 ka klase sa langgam ,pipila kanila mga migratory birds.
Ang Bojo River Cruise giduma sa Bojo Aloguinsan Eco-Tourism Association ( BAETAS) nga naghatag usab ug panginabuhian sa pipila ka residente sa maong lugar.
Gawas sa "cruise experience" mahimo kang mosakay sa glass boat ,aron makasud-ong sa mga himsog nga corals pag- abot na sa dagat ,ig-gawas sa river.
Human makakita sa kinatibuk-ang pagsuroy sa sapa, mokawas gikan sa sakayan aron mag-swimming ug maexperience ang bugnaw-bugnaw nga brackish water (tab-ang sagol parat nga tubig).
