16/03/2026
March 16, 2026 — Mariveles, Bataan
𝗣𝘂𝗯𝗹𝗶𝗰 𝗪𝗮𝗿𝗻𝗶𝗻𝗴: 𝗨𝗻𝗮𝘂𝘁𝗵𝗼𝗿𝗶𝘇𝗲𝗱 𝗥𝗲𝗺𝗼𝘃𝗮𝗹 𝗼𝗳 𝗕𝗼𝘂𝗻𝗱𝗮𝗿𝘆 𝗠𝗮𝗿𝗸𝗲𝗿𝘀 (𝗠𝘂𝗵𝗼𝗻) 𝗶𝗻 𝗟𝗼𝘁 𝟱𝟱𝟰
Sa kasalukuyang isinasagawang pagmumuhon at pagsusukat ng Lot 554, napag-alaman na may ilang boundary markers o muhon sa piling bahagi ng area ang tinanggal o ginagalaw ng hindi awtorisadong tao.
Mahigpit pong ipinapaalala sa lahat na ang mga muhon na ito ay opisyal na survey monuments na inilagay bilang bahagi ng kasalukuyang pagsusukat ng lupa. Ang sinumang sadyang magtanggal, maglipat, o sumira ng muhon o anumang palatandaan ng hangganan ng lupa ay maaaring managot sa ilalim ng Article 313 ng Revised Penal Code (Altering Boundaries or Landmarks).
Dagdag pa rito, sa ilalim ng RA 8560 (Geodetic Engineering Act), ang mga lisensyadong geodetic engineer lamang at ang kanilang survey team ang may awtoridad na maglagay, maglipat, o mag-reset ng mga survey markers bilang bahagi ng opisyal na pagsusukat.
Ang mga litrato sa ibaba ay nagsisilbing dokumento at patunay ng ilang muhon na napag-alamang tinanggal o ginulo.
Ang kooperasyon po ng bawat isa ay mahalaga upang maging maayos, patas, at malinaw ang kabuuang proseso ng pagsusukat at pagtukoy ng hangganan ng lupa. Kaya mahigpit naming ipinapaalala na igalang at huwag galawin ang mga muhon upang hindi maantala ang proseso at upang maiwasan ang anumang legal na pananagutan.
Maraming salamat po sa inyong pakikiisa at pag-unawa.
