16/01/2026
Bagong Padre Garcia Town Center, Magiging Sentro ng Kaunlaran at Turismo
Isang bagong pangunahing pasyalan at atraksyon ang inaasahang magbubukas sa bayan ng Padre Garcia, Batangas sa nalalapit na pagbubukas ng NPGTC New Padre Garcia Town Center, isang malawakang infrastructure at commercial development project na layong gawing modernong economic hub ang nasabing bayan. Ang proyekto ay magtatampok ng mga retail at business spaces na idinisenyo para sa mga mamimili, residente, at turistang dadayo sa lugar, kasabay ng patuloy na pag-unlad ng Philippine Jockey Club na kinikilala bilang isa sa pinakamagandang horse racing facilities sa bansa.
Ayon sa lokal na pamahalaan, inaasahang lilikha ang bagong town center ng maraming negosyo at oportunidad sa trabaho na magpapalakas sa lokal na ekonomiya at turismo ng Padre Garcia. Ito ay bahagi ng adbokasiya ni Mayor Celsa B. Rivera na gawing mas maunlad at kasiya-siya ang pamumuhay ng mga Garciano. Samantala, nakatuon naman si Vice Mayor Micko Angelo Rivera sa pagpapaunlad ng edukasyon sa bayan, sa pamamagitan ng pagtatayo ng Padre Garcia Polytechnic College (PGPC) at ng bagong dalawang palapag na gusali ng Central School 2 na may apat na fully air-conditioned at kumpletong pasilidad na silid-aralan, patunay sa patuloy na pagsulong ng Padre Garcia na ngayo’y kinikilala na bilang isa sa mga umuunlad na bayan sa Calabarzon.
