11/07/2026
Mahigit 7,000 Housing Units Itatayo sa Tarlac City sa Ilalim ng 4PH Program
Tinatayang 7,000 Tarlaqueños ang inaasahang makikinabang sa isang bagong abot-kayang housing project matapos ang grand launching at house blessing ng Kaia Homes Tarlac noong July 4.
Ang proyekto ay bahagi ng Expanded Pambansang Pabahay para sa Pilipino (4PH) Program ng pamahalaang nasyonal sa ilalim ng Department of Human Settlements and Urban Development (DHSUD).
Matatagpuan sa Barangay Armenia, Tarlac City, ang 48-ektaryang housing development na bubuuin ng humigit-kumulang 7,066 housing units sa apat na development phases.
Ang proyekto ay naglalayong makapagbigay ng dekalidad at abot-kayang pabahay para sa mga minimum wage earners at first-time homebuyers. Tampok dito ang Naya Townhouse, isang two-storey housing unit na may 32-square-meter floor area at 30 hanggang 41 square meters na lot area, na may nakalaang espasyo para sa dalawang silid, toilet and bath, at parking para sa motorsiklo o e-bike.
Ayon sa Kaia Homes, ang proyekto ay gumagamit ng subsidized financing sa ilalim ng 4PH Program upang maging mas abot-kaya ang pagbabayad ng mga benepisyaryo.
Bukod sa mga housing unit, magkakaroon din ang komunidad ng mga kalsada, parke, playgrounds, at iba pang community facilities upang suportahan ang maayos na pamumuhay ng mga magiging residente.
