15/06/2023
"Pangarap"
Sa harap ng salamin, sya ay nakatitig
Di kumukurap at walang katinig-tinig
Sa kanyang balat, dumampi ang hanging malamig
Luha'y gumuhit habang labi'y nanginginig
Ang dating masayahing mukha'y napalitan ng lungkot
Ang malakas na loob ay binalutan na ng takot
Nahiga sa k**a habang nagtatalukbong ng kumot
Tanong sa isip ay pilit hinahanapan ng sagot
Sa daang tinatahak ay tila ba naligaw
Ang tubig ay di na kayang pawiin ang uhaw
Ang pag-asang kinakapitan ay unti-unti nang bumibitaw
At ang pangarap na ginuhit ay unti-unti nang nalulusaw
Nasan na nga ba ang dating ako na puno ng pangarap?
Ang dating ako na lumilipad na parang alitaptap
Ang mandirigmang sa laban ay hindi takot humarap
Tila nasa kawalan at umaasang may yayakap
Sa mataas at madilim na kalangitan ay muling titingala
Ngunit pangarap ay para bang hindi nakaguhit sa mga tala
Ang maliit na liwanag ay naglalahong tila isang bula
Muling babagsak sa lupa kung saan lahat ay nagsimula
Ang bawat paghihirap ay hindi na nasusuklian
Ang mga pangarap ay parang gusto nang sukuan
Kung hanggang dito nalang ang nais ng kapalaran,
Ako'y bibitaw na't tatahakin ang ibang daan
Noong musmos pa'y itinatak na sa isipan
Pangarap na kay taas ay dapat laging sundan
Ngunit habang tumatanda'y nawawalan ng kabuluhan
Mga ngiti'y maglalaho habang naliligaw sa daan
Matayog na mga pangarap ay dapat nga bang panghawakan?
Kahit pa kapalit nito'y oras na di na mababalikan?
Siguro'y matatagpuan ko din ang tunay na kasiyahan
Kapag handa nang tanggapin ang kung ano lang ang inilaan
—iam
Nang ako ay pumikit
Wala akung makita🤣🤣🤣
