18/01/2024
اہلیان لوٹ کوہ آپ کی محبتوں کا شکریہ!!
ہمارے نظریات ضرور مختلف ہیں، مگر ہم اہل چترال مختلف الخیال ہونے کے باوجود ایک دوسرے کے نظریات و افکار کا احترام کرنا بخوبی جانتے ہیں، ہماری ثقافت ایک، روایات ایک، طور طریقے ایک، نفع نقصان اور سود و زیاں کے معاملات ایک ہیں۔۔
یہی وجہ ہے کہ ہمارے ہاں مثالی امن قائم ہے، ہمارے دل آپس کی رواداری اور ایک دوسری کے مراکز محبت کی قدردانی کے جذبات سے لبریز رہتے ہیں۔
ہم صرف زبانی کلامی مہمان نواز نہیں، بلکہ ہم نے ہر بار عملی صورت میں کرکے دکھایا ہے کہ ہم واقعی مہمان نواز ہیں۔ شائستہ مزاجی اور شرافت ہماری فطرت ثانیہ ہے، البتہ کوئی ہماری شائستگی کا ناجائز فایدہ اٹھا کر ہماری روایات اور تہذیبی اقدار کو پامال کرنے اور ہمیں بے وقوف بنانے کی کوشش کرے تو ہم منہ توڑ جواب دینے اور اوقات یاد دلانے سے بھی دریغ نہیں کرتے۔
ہم ان پہاڑوں کے درمیاں میں وسائل اور سہولیات سے محروم تو ہیں، مگر ہمارے دل و دماغ اخوت، مروت اور محبت کی دولت سے لبریز ہیں۔ ہماری عبادت گاہوں کے راستے الگ ہوسکتے ہیں مگر ہمارے گھروں اور دلوں کے دروازے ہمیشہ ایک دوسرے کے لیے کھلے رہتے ہیں۔۔۔۔ انتخابی مہم کے سلسلے میں لوٹکوہ کے دورہ کے دوران جو پذیرائی اور عزت افزائی مجھے دی گئی میں اس کے لیے تمام اہل علاقہ کا ممنون رہوں گا۔ اور ان شاء اللہ آپ کے تعاون سے کامیابی پانے کے بعد آپ کی محرومیوں کا ازالہ کرنا میری اولین ترجیح ہوگی۔
حاجی مغفرت شاہ
امیدوار برائے صوبائی اسمبلی
پی کے 2 چترال لوئر
