25/05/2026
زندگی کسی ایک بڑے فیصلے سے نہیں بدلتی
چھوٹی سی اچھی عادتوں سے بدلتی ہے
جلدی جاگنا شاید ایک عام سی بات لگے
لیکن حقیقت یہ ہے کہ یہی ایک عادت انسان کی پوری زندگی کا رخ بدل سکتی ہے
جب آپ صبح جلدی اٹھتے ہیں تو دن ہنگاموں سے نہیں، سکون سے شروع ہوتا ہے
فجر کی خاموشی، ٹھنڈی ہوا، خالی رستے، پرسکون ذہن
یہ وقت انسان کو اپنے آپ سے ملاتا ہے
پھر صبح بیداری آپ میں واک کی عادت ڈالتی ہے ، چلتے چلتے جسم ہلکا محسوس ہونے لگتا ہے
سانس بہتر ہوتی ہے، دل ہلکا ہوتا ہے، دماغ صاف ہونے لگتا ہے
جب انسان ورزش شروع کرتا ہے تو وہ خود ہی غیر صحت مند کھانوں سے دور ہونے لگتا ہے
کیونکہ اب اسے اپنے جسم کی فکر ہونے لگتی ہے، وہ پانی زیادہ پیتا ہے، چائے، کولڈ ڈرنکس اور فضول اسنیکس کم ہونے لگتے ہیں
پھر نیند بہتر ہونے لگتی ہے
اچھی نیند انسان کو اگلے دن زیادہ توانائی دیتی ہے توانائی موڈ بہتر کرتی ہے، بہتر موڈ غصہ کم کرتا ہے، سوچ واضح ہونے لگتی ہے
پھر ایک وقت آتا ہے جب انسان ہر وقت موبائل پر وقت ضائع کرنا چھوڑ دیتا ہے، کیونکہ اب اسے اپنی زندگی دلچسپ لگنے لگتی ہے، وہ سوشل میڈیا سے نکل کر حقیقت میں جینا شروع کرتا ہے
آہستہ آہستہ کتابیں اچھی لگنے لگتی ہیں ، خاموشی اچھی لگنے لگتی ہے، تنہائی بوجھ نہیں لگتی، وقت کی قدر پیدا ہوتی ہے
پھر انسان وقت پر سونا سیکھتا ہے، وقت پر اٹھنا سیکھتا ہے، اپنے وعدے پورے کرنا سیکھتا ہے،
پھریہی چھوٹی چھوٹی چیزیں ڈسپلن بناتی ہیں
ڈسپلن انسان کو اعتماد دیتا ہے
اعتماد انسان کو مضبوط بناتا ہے
پھر انسان دوسروں کی نظروں میں نہیں، اپنی نظروں میں بہتر ہونے لگتا ہے
یہ سب ایک ساتھ نہیں ہوتا
آہستہ آہستہ ہوتا ہے
خاموشی سے ہوتا ہے
ایک اچھی عادت دوسری اچھی عادت کو مقناطیس کی طرح کھینچتی ہے
~ ڈاکٹر واصف اقبال
