08/08/2026
گوادر میں پانی کی دستیابی اور مستقبل کی آبی ضروریات کو پورا کرنے میں سوڈ کور ڈیم اور شادی کور ڈیم انتہائی اہم کردار ادا کر رہے ہیں۔
سوڈ کور ڈیم ضلع گوادر میں مکمل ہونے والے درمیانے درجے کے ڈیموں میں ذخیرہ کرنے کی گنجائش کے اعتبار سے سب سے بڑا ڈیم ہے، جس کی مجموعی گنجائش تقریباً 45,000 ایکڑ فٹ ور کمانڈ ایریا تقریباً 4,500 ایکڑ ہے۔ یہ ڈیم بارشی اور سیلابی پانی کو ذخیرہ کرنے کے ساتھ ساتھ گوادر کی پینے کے پانی کی ضروریات پوری کرنے میں بھی معاون ہے۔
شادی کور ڈیم بلوچستان کا ذخیرہ کرنے کی گنجائش کے اعتبار سے دوسرا بڑا مکمل شدہ درمیانے درجے کا ڈیم ہے، جس کی مجموعی گنجائش تقریباً 37,000 ایکڑ فٹ اور کمانڈ ایریا تقریباً 6,625 ایکڑ ہے۔ یہ ڈیم پسنی کے لیے پینے کے پانی کا اہم ذریعہ ہونے کے علاوہ گوادر کو بھی اضافی پانی فراہم کرتا ہے۔
اس وقت گوادر ڈویلپمنٹ اتھارٹی ان دونوں ڈیموں سے گوادر شہر کو تقریباً 35 سے 40 لاکھ گیلن یومیہ (MGD) پانی فراہم کر رہی ہے۔ ان آبی ذخائر کو گوادر شہر کے واٹر سپلائی سسٹم سے منسلک کرنے کے لیے مرکزی ٹرانسمیشن لائن تقریباً 150 کلومیٹر طویل ہے، جس کے ذریعے پانی گوادر تک پہنچایا جا رہا ہے۔
گوادر کی مستقبل کی بڑھتی ہوئی پانی کی ضروریات کو مدنظر رکھتے ہوئے میرانی ڈیم سے گوادر تک پانی کی ترسیل کے لیے پائپ لائن بچھانے کے منصوبے کی بھی منظوری دی جا چکی ہے۔ اس منصوبے پر عملی کام کا آغاز ہونا باقی ہے، تاہم اس کی تکمیل سے گوادر کے لیے مستقبل میں پانی کے ایک مزید بڑے اور پائیدار ذریعہ کی دستیابی ممکن ہو سکے گی۔
یوں سوڈ کور اور شادی کور ڈیمز موجودہ پانی کی ضروریات پوری کرنے میں اہم کردار ادا کر رہے ہیں، جبکہ میرانی ڈیم سے مجوزہ پائپ لائن منصوبہ گوادر کی طویل المدتی آبی ضروریات اور واٹر سیکیورٹی کو مزید مستحکم کرنے کی جانب ایک اہم قدم ہے۔
فوٹو بشکریہ ۔ Department of Irrigation, Government
Irrigation Department Government of Balochistan
