06/10/2026
امریکی حکام نے پنجاب کے شہر خانیوال کے رہائشی فہیم اکرم کی گرفتاری پر ایک لاکھ ڈالر انعام دینے کا اعلان کیا ہے تاہم ساتھ میں یہ بھی کہا گیا ہے کہ فہیم اکرم کو خود گرفتار کرنے کی کوشش نہ کی جائے بلکہ اس حوالے سیکیورٹی حکام کو اطلاع دی جائے۔فہیم اکرم خانیوال کے رہائشی ہیں جن پر اس وقت امریکہ کی ریاست فلوریڈا میں فرد جرم عائد ہوچکی ہے۔فہیم اکرم آئی ٹی کے ماہر ہیں موصوف نے ایک ویب سائٹ " لیبلز بینک ڈاٹ کام " بنائی جہاں سے امریکی شہریوں کو ڈاک ٹکٹ اور شپنگ لیبلز فروخت کئیے جاتے تھے۔امریکی حکام کے مطابق 33 سالہ فہیم اکرم نے مجموعی طور پر امریکی پوسٹل سروس کو 126 ملین ڈالر کا نقصان پہنچایا ہے،پاکستانی حساب کتاب میں یہ رقم 35 ارب کے لگ بھگ بنتی ہے۔فہیم اکرم کی بنائی گئی ویب سائٹ بند کردی گئی ہے اور اسے قبضہ میں لے لیا گیا ہے۔تحقیقات کے مطابق ملزم نے ویب سائٹ کے ذریعے5200 سے زائد لوگوں کو 50 لاکھ سے زائد جعلی ڈاک ٹکٹس فروخت کئے،ان ڈاک ٹکٹس کی مدد سے صارفین کے ڈاک کی منزل کے فاصلے اور وزن سمیت دیگر چیزوں کا تعین کئیے بغیر سستے ٹکٹس فروخت کئیے گئے۔ملزم اس وقت کہاں ہے اس حوالے سے کوئی تفصیلات موجود نہیں ہیں.اس حوالے سے جب ڈی پی او خانیوال سے عابد وڑائچ سے رابطہ کیا گیا تو ان کا کہنا تھا کہ ملزم اس سے قبل پاکستان میں بھی اس قسم کے آن لائن فراڈ میں ملوث رہ چکا ہے تاہم اس کے خلاف پاکستان میں کوئی مقدمہ درج نہ تھا۔ ملزم خانیوال سٹی کا رہائشی اور سوفٹ وئیر انجنئیر ہے۔ پولیس حکام کے مطابق شبہ ہے کہ ملزم اس وقت بیرون ملک موجود ہے۔
