05/02/2026
تمام لاہور میں موٹر سائیکل سوار ایک مضحکہ خیز بلا میں مبتلاء ہوئے ہیں کہ ان کے سامنے چار فٹ کا لمبا سا پائپ لگا دیا گیا ہے ۔ کہ کوئی ڈور ان کا گلا نہ کاٹ دے ۔
اب اگر وہ یہ پائپ نہیں لگاتے تو ان کو دو ہزار روپے جرمانہ ہے اور اگر اس جرمانے سے بچنا ہے تو کارٹون نیٹ ورک کی شمولیت اختیار کرنا ہو گی ۔
اس پائپ کی صورت میں گویا انتظامیہ نے یہ تسلیم کر لیا ہے کہ وہ کسی بھی صورت میں اس قابل نہیں ہے کہ " منحوس بسنت " کو محفوظ بنا سکے اور اس نااہلی کو چھپانے کے لیے لوگوں کو کہا گیا ہے کہ وہ پائپ لگائیں ۔۔۔
بسنت کا کوئی شرعی ، غیر شرعی پہلو ہم زیربحث نہیں لاتے لیکن اس سوال کا کوئی تو جواب دے کہ کیا انسانی جانوں کی قیمت پر اسے منانا درست ہے ؟ ۔
سیدنا عمر کے دور میں یمن میں ایک نوجوان قتل ہو گیا تو آپ نے فرمایا تھا کہ آدھے یمن کی آبادی اس قتل میں ملوث ہوئی تو اسے قصاص میں سزا دی جائے گی ۔۔۔۔ گویا انسانی جان کی حرمت اس قدر ہے اور یہاں یہ جشن منانا ایسا اہم تھا کہ تمام شہر کو کارٹون بنا دیا ۔
پھر اسی پر بس نہیں کہ " پھکے جٹ کٹورا لبھیا پانی پی پی آپھریا"
کہ ایک بھوکے کو پیالہ مل گیا تو پانی پی پی کر ہی پیٹ پھلا بیٹھا ۔۔ حکومت نے ایک نہیں تین دن کی بسنت کا اعلان کیا ۔۔۔اور ساتھ " کشمیر کی آزادی" کی خوشی کی چھٹی کو بھی ملا دیا اوپر سے شب برات بھی آ گئی اور وزیر اعلیٰ نے ٹویٹ کی پانچ چھٹیاں انجوائے کریں ۔۔۔یعنی کشمیر کا غم بھی احکام کی نظر میں جشن منانا ہوا ۔
پھر مسلسل پانچ دن جو کاروبار مملکت ، اور سب نظامِ زندگی بند رہے گا اس میں کون سی خوشی کی بات ہے ؟
یہ تو افسوسناک ہے کہ آپ پانچ روز قوم کو بے کار بٹھا رکھیں گے ، اس بیچ کتنا نقصان ہو گا ، تعلیمی حرج ہو گا ، روزمرہ [ دیہاڑی دار ] کما کر کھانے والے لاکھوں گھرانے پریشان رہیں گے۔۔۔ اور نیرو روم جلتا دیکھے گا ۔۔
سیاسی قیادت کا تو یہ فرض ہوتا ہے کہ قوموں کی مثبت رہنمائی کرے اور یہاں پر پوری قوم کو پانچ دن کے لیے سب کام چھوڑ کر عیاشی کا درس دیا جا رہا ہے ۔
اور پھر یہی نہیں بلکہ بسنت کے تین دنوں میں اونچی چھتوں پر جو طوفان بدتمیزی ہوگا اس کا گناہ بھی اس حکومت کے سر جائے گا ۔۔۔۔۔ خبریں ہیں کہ لاکھوں اور کروڑوں میں یہ چھتیں کرائے پر جا رہی ہے ۔ ماضی میں تو ہم نے دیکھا ہے کہ بڑے بڑے ڈیک اور سپیکر لگے ہوتے تھے اوپر بیہودہ گانے چل رہے ہوتے تھے ، نیچے خواتین کی نگاہیں جھکی ہوتی تھیں ، اڑوس پڑوس کی مساجد میں نماز ادا کرنا مشکل ہو جاتا تھا ، محلے میں اگر کوئی مریض ہوتا تو وہ دن اس کے لیے عذاب ہوتا ۔ اور جو زیادہ جہالت میں مبتلا تھے ان کی خواتین بھی چھتوں پر اس ناچ گانے کا حصہ ہوتی تھیں ۔۔
وہ طبقات کہ جو مسجد میں آٹھ دن بعد خطبہ برداشت نہیں کر سکتے اور ان کا بس نہیں چلتا کہ [صرف] اذان پر بھی پابندی لگا دی جائے ، اس ناچ گانے کو بڑی سہولت سے برداشت کریں گے تب نہ کسی کی تعلیم کا حرج ہوگا نہ کسی مریض کو تکلیف ہوگی ۔۔
آخری بات ! بسنت پر پابندی اس لیے لگائی گئی تھی کہ دو چار نہیں بلکہ درجنوں جوان اس کی نذر ہوئے ، کئی لوگوں کے بچے ڈور کے ہاتھوں قتل ہوئے ، کتنے گھر اجڑے کتنی ماؤں کی گود خالی ہو گئی حتی کہ پوری قوم چیخ اٹھی کہ خدارا اس قاتل کھیل کو بند کیا جائے ۔۔ بیس برس سکون کے گزر چکے تھے لوگ اس بےہودہ کھیل کو بھول چکے تھے لیکن ہمیں نہیں سمجھ آئی کہ کیا سبب ہوا اس بےہودگی کو دوبارہ جاری کرنے کا ۔۔۔
اگر یہ ہماری ثقافت کا حصہ بھی تھا تو بھی اپنے خونی پس منظر کے بعد اس کو ترک کرنا ضروری تھا ۔۔۔ بہت سے جائز اور حلال امور بڑے فائدے کے لیے ترک کیے جاتے ہیں ۔
اب اگر ایک جان بھی جاتی ہے تو میں سمجھتا ہوں کہ صرف حکومت ہی نہیں بلکہ ہر وہ شخص اس خون میں حصے دار ہوگا اور قاتل شمار کیا جائے گا کہ جس نے اپنے زبان سے یا قلم سے اس خونی کھیل کی بحالی کی حمایت کی ہے ۔۔۔۔
Copied
