08/06/2026
تیزاب سے بچاؤ اور ابتدائی طبی امداد
تیزاب یا کسی بھی خطرناک کیمیکل کے حادثات میں بروقت اور درست ابتدائی طبی امداد متاثرہ شخص کی جان بچانے اور نقصان کو کم کرنے میں اہم کردار ادا کرتی ہے۔ اگر کسی شخص پر تیزاب گر جائے تو سب سے پہلے اسے خطرے کی جگہ سے دور کریں اور فوری طور پر ایمرجنسی سروس 1122 کو اطلاع دیں۔
متاثرہ حصے پر موجود کپڑے، جوتے، زیورات یا دیگر آلودہ اشیاء احتیاط سے ہٹا دیں اور متاثرہ جگہ کو مسلسل کم از کم 20 منٹ تک صاف پانی سے دھوتے رہیں۔ اگر تیزاب آنکھ میں چلا جائے تو آنکھ کو بھی فوراً پانی سے دھوئیں اور اس دوران کوشش کریں کہ کیمیکل جسم کے دوسرے حصوں تک نہ پہنچے۔
یاد رکھیں کہ تیزاب کے زخم پر دودھ، دہی، ٹوتھ پیسٹ، ہلدی، آٹا، برف، مرہم یا کوئی دوسرا کیمیکل ہرگز استعمال نہ کریں، کیونکہ یہ زخم کو مزید خراب کر سکتے ہیں۔ متاثرہ شخص کو ہسپتال منتقل کرنا ضروری ہے کیونکہ تیزاب کے زخم کا مکمل علاج طبی ماہرین ہی کر سکتے ہیں۔
یاد رکھیں:
✔ ویڈیو بنانے کے بجائے مدد کریں۔
✔ تماشائی بننے کے بجائے ذمہ دار شہری بنیں۔
✔ کسی بھی ایمرجنسی کی صورت میں فوراً ریسکیو 1122 پر کال کریں۔
بروقت اور درست ابتدائی طبی امداد کسی قیمتی جان کو بچا سکتی ہے۔
ریسکیو 1122 منڈی بہاوالدین
