25/07/2023
پشاور(پریس ریلیز)متاثرین کینال ویو ہاؤسنگ سوسائٹی نے ڈی جی نیب خیبر پختونخواوقار احمد چوہان کی جانب سے نیب دفترپشاورمیں منعقدہ کھلی کچہری میں شرکت کی اور سٹی بلڈرز اور سٹار مارکیٹنگ کی جانب سے2018سے سینکڑوں متاثرین کے کروڑوں روپے ہڑپ کرنے کے حوالے سے ڈی جی نیب کو تفصیلات سے آگاہ کیا،ڈی جی نیب نے معاملے میں خصوصی دلچسپی لیتے ہوئے متاثرین کو اپنی طرف سے بھرپور تعاون کا یقین دلایا۔تفصیلات کے مطابق متاثرین کینال ویو ہاؤسنگ سوسائٹی (ناصر باغ روڈ پشاور) نے ڈی جی نیب کی جانب سے گزشتہ روز بلوائی گئی کھلی کچہری میں شرکت کی۔متاثرین کی جانب سے ڈی جی نیب کو آگاہ کیا گیا کہ پشاور ناصر باغ روڈ پر سٹی بلڈرز نے2018میں کینال ویو نامی ہاؤسنگ سوسائٹی کا سٹار مارکیٹنگ کے تعاون سے افتتاح کیا اور متاثرین سے کروڑوں روپے لیکر انہیں یقین دلایا گیا کہ دو سال کے اندر پلاٹ کا قبضہ حوالے کر دیا جائیگا۔متاثرین نے سٹار مارکیٹنگ کے پاس پلاٹس کیلئے کروڑوں روپے کی رقوم جمع کروائیں اور بعد ازاں قسطیں بھی جمع کرانی شروع کیں لیکن متاثرین کو پلاٹ نہیں دئے گئے،پانچ سال گزرنے کے باوجود متاثرین در در کی ٹھوکریں کھانے کو مجبورہیں اور سٹار مارکیٹنگ اور سٹی بلڈرز کی جانب سے کوئی تعاون نہیں کیا جا رہا۔سٹی بلڈرز کے مالکان میں بااثر شخصیات سلمان فداولد فدا محمد،سید عارف خان ولد روز محمد خان اور،شہزاد علی خان ولدعمر دالی خان شامل ہیں جو پلاٹس کا مطالبہ کرنے پر متاثرین کو دھمکیاں بھی دے چکے ہیں،متاثرین نے سٹار مارکیٹنگ اور سٹی بلڈر زسے بھی باربار پلاٹ فراہم کرنے کا مطالبہ کیا،احتجاجی مظاہرے بھی کئے لیکن سٹار مارکیٹنگ اور سٹی بلڈرز ٹس سے مس نہیں ہوئے اور اب بھی متاثرین کو ٹرخایا جا رہا ہے،متاثرین نے ڈی جی نیب کو بتایا کہ متاثرین میں حاضر سرو س و ریٹائرڈ سرکاری افسران،آرمی افیسرز،ڈاکٹرز،انجینئرز،صحافیوں سمیت معاشرے کے مختلف شعبہ جات سے تعلق رکھنے والے مرد و خواتین شامل ہیں جنھوں نے اپنی عمر بھر کی جمع پونچی ایک اچھے مستقبل کی خاطر سٹار مارکیٹنگ اور سٹی بلڈرز کے ہاتھوں میں دیدی جنھوں نے عوام کیساتھ بڑے پیمانے پر فراڈ کیا۔ڈی جی نیب نے انتہائی تحمل اور اخلاص سے متاثرین کی بات سننے کے بعد انہیں اپنی طرف سے بھرپور تعاون کا یقین دلایا اور متاثرین کو تمام تفصیلات نیب دفتر میں جمع کرانے کی ہدایت کی،ڈی جی نیب وقار احمد چوہان نے نیب افسران کو بھی ہدایت کی کہ وہ اس کیس میں ذاتی دلچسپی لیں گے اور متاثرین کو ان کا حق دلوائیں گے،نیب افسران ہفتہ وار بنیاد پر متاثرین کے حوالے سے ڈی جی نیب کو پیشرفت سے آگاہ کرینگے۔متاثرین نے ڈی جی نیب کے روئیے اور تعاون کی یقین دہانی پر ان کا شکریہ ادا کیاہے۔واضح رہے کہ متاثرین کینال ویوکروڑوں روپے دینے کے باوجود 2018سے اب تک پلاٹس کے حصول کیلئے در در کی ٹھوکریں کھانے پر مجبورہیں اور تاحال سٹی بلڈرز اور سٹار مارکیٹنگ کی جانب سے انہیں ٹرخایا جا رہا ہے۔
