20/02/2023
پریس ریلیز
اسلام آباد: (پ ر: مورخہ 20 فروری، 2023): کپیٹل ڈیولپمنٹ اتھارٹی نے اسلام آباد کے پارکوں میں داخلہ فیس ختم اور عوام الناس کی سہولت کے لئے 13 مزید روٹس پر فیڈر بسیں چلانے کا فیصلہ کیا ہے۔ یہ فیصلہ سی ڈی اے بورڈ کے اجلاس میں کیا گیا۔ جس کی صدارت چیئرمین کپیٹل ڈیولپمنٹ اتھارٹی کیپٹن نور الامین مینگل نے کی۔ اجلاس میں کپیٹل ڈیولپمنٹ اتھارٹی کے تمام بورڈ ممبران نے شرکت کی۔
سی ڈی اے بورڈ نے اجلاس میں اسلام آباد میں مزید 13 روٹس پر فیڈر بسیں چلانے کی بھی منظوری دی۔ ان روٹس میں پولیس فائڈیشن اسٹیشن سے پوٹھوہار اسٹیشن، علامہ اقبال اوپن یونیورسٹی سے پوٹھوہار اسٹیشن، پمز ہسپتال سے سیکٹریٹ، پمز ہسپتال سے سیکٹریٹ براستہ مارگلہ روڈ، شاہراہ دستور ریڈیو پاکستان سے پمز ہسپتال، سیکٹر ڈی بارہ سے جی ٹین میڑو بس اسٹیشن، گولڑہ شریف سے پمز ہسپتال، جی الیون سے پمز ہسپتال، آبپارہ سے ترامڑی چوک، نیلور سے کھنہ پل، پیر ودھائی سے فیض آباد، 26 نمبر چونگی سے B-17 اور سیکٹر I-16 سے 26 نمبر چونگی تک کے روٹس شامل ہیں۔ ان تیرہ فیڈر روٹس کے ساتھ 5 ڈپو بنانے کیلئے بھی منظوری دی گئی۔ مزید برآں گرین لائن بس سروس کو فیض احمد فیض اسٹیشن تک توسیع دینے کی بھی منظوری دی گئی۔ اسی طرح سی ڈی اے بورڈ نے پمز ہسپتال سے فیصل مسجد، فیصل مسجد سے این ڈی یو، این ڈی یو سے واپس پمز تک کے روٹ پر بسیں چلانے کی منظوری دی۔
اسی طرح سرینہ چوک پر ٹریفک کے مسائل کو ختم کرنے کے لئے سرینہ چوک کو ری ڈیزائن کرنے کا بھی فیصلہ کیا گیا۔ اس منصوبے کے تحت سرینہ چوک پر سنگل بیرل انڈر پاس تعمیر کیا جائے گا۔ سی ڈی اے بورڈ نے اس منصوبے کے لئے کنسلٹنسی سروس حاصل کرنے کی بھی منظوری دی۔
اسی طرح گزشتہ ماہ منعقد ہونے والی کمرشل پلاٹس کی نیلامی میں موصول ہونے والی بولیوں کی بھی منظوری سی ڈی اے بورڈ کے اجلاس میں دے دی گئی۔
سی ڈی اے بورڈ نے اسلام آباد میں پارکنگ کے مسائل کو ختم کرنے کے لئے مختلف مراکز میں 6 پارکنگ پلازوں کی تعمیر کی منظوری دی۔ اس منصوبے کے تحت ایف ایٹ مرکز میں ایک، ایف ٹین مرکز میں دو، آئی ایٹ مرکز میں ایک، جی نائن مرکز میں ایک اور بلیو ایریا سنٹیورس کے پاس ایک پارکنگ پلازہ تعمیر کیا جائے گا۔
اسی طرح سیکٹر آئی الیون میں نیشنل بس سروس کی تعمیر کے منصوبے کے لئے کنسلٹنسی سروسز ہائر کرنے کی بھی منظوری سی ڈی اے بورڈ کے اجلاس میں دی گئی۔
چیئرمین کپیٹل ڈیولپمنٹ اتھارٹی کیپٹن نور الامین مینگل نے ہدایت کی ہے کہ تمام جاری منصوبوں پر ترقیاتی کاموں کی رفتار کو مزید تیز کیا جائے اور تمام منصوبوں کی بروقت تکمیل کو یقینی بنایا جائے۔ چیئرمین سی ڈی اے نے مزید ہدایت کی کہ آئی جے پی روڈ کے اطراف وسیع پیمانے پر شجرکاری کی جائے۔ انہوں نے مزید ہدایت کی کہ اسلام آباد میں جاری شاہراہوں کے تعمیراتی منصوبوں کے اطراف بھی شجرکاری کی جائے اور لگائے گئے پودوں کی نشوونما کو یقینی بنایا جائے۔
