28/01/2026
مرکزی ترجمان پاکستان تحریک انصاف آزاد کشمیر اور حلقہ کوٹلی سٹی سے امیدوار برائے قانون ساز اسمبلی جاوید نذیر بڑالوی نے ڈپٹی کمشنر کوٹلی کو دوبارہ باقاعدہ درخواست جمع کراتے ہوئے یکم فروری کو ہونے والی ریلی اور کنونشن کی اجازت مانگ لی ہے۔ درخواست میں مؤقف اختیار کیا گیا ہے کہ پاکستان تحریک انصاف حلقہ کوٹلی سٹی کی جانب سے بڑالی سے کوٹلی شہر تک “ریلیز عمران خان ریلی” نکالی جائے گی، جس کا مقصد مرکزی قیادت کا بھرپور استقبال کرنا ہے۔ جاوید نذیر بڑالوی نے اپنی درخواست میں واضح طور پر لکھا ہے کہ 18 جنوری کو ضلعی انتظامیہ کی جانب سے بلاجواز طور پر ان کی ریلی اور ورکرز کنونشن منسوخ کیا گیا، جو نہ صرف جمہوری اقدار بلکہ آئینی حقوق کی بھی سنگین خلاف ورزی ہے۔
انہوں نے کہا کہ اس وقت وزیراعظم آزاد کشمیر کے دورے کا کوئی حتمی پروگرام موجود نہیں تھا، اس کے باوجود تحریک انصاف کے پروگرام کو سبوتاژ کیا گیا، جس سے کارکنوں میں شدید مایوسی اور غم و غصہ پایا جاتا ہے۔ درخواست میں مزید کہا گیا ہے کہ پاکستان تحریک انصاف ایک پرامن اور جمہوری سیاسی جماعت ہے اور اس کی تمام سرگرمیاں آئین و قانون کے دائرے میں رہ کر انجام دی جاتی ہیں۔ جاوید نذیر بڑالوی نے اس بات پر زور دیا کہ یکم فروری کو ہر صورت ریلی اور کنونشن منعقد کیا جائے گا اور انتظامیہ کو چاہیے کہ وہ کسی بھی دباؤ یا سیاسی جانبداری سے بالاتر ہو کر آئینی ذمہ داریاں ادا کرے۔ مرکزی ترجمان پی ٹی آئی آزاد کشمیر نے کہا کہ عمران خان کے
نظریے سے وابستہ کارکنان کسی بھی صورت اپنے جمہوری حق سے دستبردار نہیں ہوں گے۔ انہوں نے خبردار کیا کہ اگر اس بار بھی اجازت نہ دی گئی تو اس کی تمام تر ذمہ داری ضلعی انتظامیہ پر عائد ہو گی اور تحریک انصاف آئینی و قانونی راستہ اختیار کرنے پر مجبور ہو گی۔ جاوید نذیر بڑالوی نے مطالبہ کیا کہ امن و امان کی صورتحال کو بنیاد بنا کر سیاسی سرگرمیوں کو روکنے کی روایت کا خاتمہ کیا جائے اور تمام جماعتوں کو یکساں مواقع فراہم کیے جائیں۔ انہوں نے کہا کہ کوٹلی شہر کے عوام یکم فروری کو بھرپور انداز میں عمران خان سے اپنی والہانہ وابستگی کا اظہار کریں گے اور یہ ریلی عوامی طاقت کا واضح ثبوت ہو گی۔
