09/10/2024
د رپوټونو له مخې د پاکستان پوليسو نن، چهار شنبه په جمرود ښارګوټي کې د يوې جرګې له پاره د راټولو شويو په سونو کسانو د خپرولو په موخه اوښلن ګاز کارولی او پر هغه یې د لښتو ګوزارونه وکړل. د پښتون ژغورنې غورځنګ بیا د پولیسو د ډزو په پایله کې د درو کسانو د وژل کیدو او یو شمیر نورو د ټپي کیدو خبره کوي.
د سيمې د يوه مرکزي روغتون يوه ډاکتر روح الامين، وويل چې روغتون ته د دې اخ و ډب په نتيجه کې د وژل شويو درې کسانو جسدونه ور وړل شوي دي. نوموړي وويل چې همدا شان يو شمير ټپيان هم په روغتون کې درملنې لاندې دي.
د پښتون ژغورنې غورځنګ مشر منظور پښتين هم د ایکس (پخواني ټویټر) له لارې ویلي دي چې د خيبر پښتونخوا پوليسو په خيبر کې پر هغه ميدان چې د اکتوبر پر يولسم نیټه پکې د پښتنو يوې لویې جرګې ته چمتوالی نیول کيده، بريد کړی او په مخامخ ډزو کې يې د دغه غورځنګ درې پلویان وژلي دي. نوموړي زياته کړې چې ډېر کسان ټپيان شوي هم دي.
پښتين، همدا شان د خيبر پښتونخوا په نورو سيمو کې هم د پوليسو په ډزو کې د هغو خلکو د ټپي کیدو خبره وکړه چې په دې جرګه کې د ګډون له پاره ور روان ول.
نوموړي ليکلي: «پر خيبر سربیره نورو ولسواليو کې هم پوليسو په جرګه کې د ګډون له پاره پر روانو کسان ډزې کړی دي. د جنوبي وزيرستان په لوور کې د فېرونو په نتیجه کې يو کس شهيد شوی او څو ټپيان دي.»
نوموړي همدا شان زياته کړې ده چې د جنوبي وزیرستان پر کاروان هم د ډزو خبرونه ورکړل شوي دي.
د فرانسې خبري آژانس په حواله پوليسو چهار شنبې په ورځ په خيبر کې د جرګې له پاره پر راټولو شويو په سونو کسانو اوښلن ګاز کارولی دی. خو د غورځنګ يوه فعال له دويچه ويله سره په خبرو کې وويل چې د پولیسو له لوري پر دوی ډزي شوي دي چې په پايله کي يې اته کسان ټپيان شوي دي او د دوو کسانو حالت د اندېښنې وړ بلل شوی دی. خو ځايي پوليسو او چارواکو تر اوسه پوري په دې اړه څه نه دي ويلي دي.
د پاکستان حکومت همدا څو ورځې تر مخه د پښتون ژغورنې غورځنګ يوه غیر قانوني ډله وبلله او بندیز یې پرې وضع کړ. د حکومت له خوا ويل شوي دي چې د پښتون ژغورنې غورځنګ د پاکستاني طالبانو څخه ملاتړ کوي او له دې وجې یې ورته د غونډو اجازه نه ورکوي چې د پاکستان د ګټو پر ضد فعاليت کوي.
د خيبر پښتونخوا روغتيايي چارواکو ویلي دي چې يو شمېر ټپيان شوي مظاهره کوونکي روغتون ته ليږدول شوي دي چې پکښې د دوو وضعيت د انديښنې وړ دی.
