Kadastri - Zyre Gjeodezike

18/02/2026

20/12/2025

Si ekspert gjyqësor i gjeodezisë, kjo çështje pasqyron qartë abuzimin e procedurave të shpronësimit.

Vlerësime joreale të tokës, shpërfillje e gjendjes faktike në terren dhe ndërhyrje në procesin e ekspertizës kanë prodhuar dëm të matshëm për shtetin.

Kur standardi teknik dhe ligjor shkelet, shpronësimi kthehet në mekanizëm dëmtimi publik. Përgjegjësia është individuale dhe e provueshme.

Kjo çështje duhet të shërbejë si precedent. Jo çdo raport vlerësimi është i shenjtë. Jo çdo vendim administrativ është i paprekshëm. Dhe jo çdo ekspertizë është e bërë me integritet profesional.

Drejtësia reale fillon aty ku përgjegjësia individuale nuk fshihet pas funksionit apo titullit.

Raporton: Flamur KABASHI

15/10/2025

𝐀 𝐊𝐀 𝐆𝐉𝐘𝐐𝐓𝐀𝐑 𝐓𝐄̈ 𝐏𝐀𝐃𝐑𝐄𝐉𝐓 𝐃𝐇𝐄 𝐉𝐎𝐏𝐑𝐎𝐅𝐄𝐒𝐈𝐎𝐍𝐀𝐋? 𝐏𝐎, 𝐊𝐀!

Drejtësia nuk është gjithmonë reflektim i ligjit, por shpesh pasqyrë e ndërgjegjes së atij që e zbaton.
Ka gjyqtarë që e mbrojnë nderin e profesionit dhe ka të tjerë që e dëmtojnë me vendime të padrejta e qëndrime joprofesionale.

Kjo këshillë është posaçërisht për ata që kanë rast në gjykatë por nuk angazhojnë avokat. Pikërisht aty ndodhin më së shumti padrejtësitë, sepse mungon dikush që njeh procedurat dhe di t’i mbrojë të drejtat siç duhet.

Edhe unë, si ekspert gjyqësor për gjeodezi, personalisht jam ballafaquar me gjyqtarë të tillë që e kanë keqpërdorur autoritetin ose kanë vepruar me mungesë profesionalizmi.
Por, njëkohësisht, kam bashkëpunuar edhe me gjyqtarë të përkryer, të ndershëm dhe të drejtë, që e bëjnë njeriun të ndjejë respekt për vetë sistemin e drejtësisë.

Nëse përballesh me gjyqtarë të padrejtë apo joprofesionalë, ankesën mund ta paraqesësh pranë Këshillit Gjyqësor të Kosovës (KGJK), përmes Zyrës për Ankesa Disiplinore, ku shqyrtohen çdo sjellje joprofesionale dhe shkelje etike.

Sepse heshtja ndaj padrejtësisë është bashkëfajësi, ndërsa zëri i arsyes është detyrë qytetare.

25/09/2025

Moduli i ri për gjeodetët, në qendër të takimit të sotshëm me gjeodetët e licencuar

Sot u mbajt takimi i radhës me Operatorin Ekonomik, i cili është duke zhvilluar sistemet digjitale të Agjencisë Kadastrale të Kosovës, me ç'rast u pranua versioni i Sistemit për gjeodetët dhe kompanitë gjeodete. Sistemi i zhvilluar deri më tani u prezantua si një arritje e prekshme, drejt përpunimit më të lehtë, më të thjesht dhe qasjes së drejtëpërdrejtë në proceset teknike.

Moduli i ri për gjeodetët paraqet një mekanizëm inovativ, që do të mundësojë administrimin dhe përpunimin e lëndëve teknike, duke kontribuar në ngritjen e efikasitetit profesional, si dhe duke garantuar besueshmërinë e të dhënave dhe një shërbim tejet më efikas të gjeodetëve të licencuar ndaj qytetarëve.

Ky sistem do të zbusë ndërlikimet procedurale nga marrja e shënimeve fillestare e deri te përpunimi përfundimtar, përfshirë komunikimin në kohë reale me zyrat kadastrale. Së shpejti, është paraparë të mbahet një takim gjithëpërfshirës me gjeodetë, ndërsa në të ardhmen e afërt do të fillojë edhe trajnim i posaçëm për përdorimin e sistemit të ri.

09/09/2025

𝐀 𝐉𝐄𝐍𝐈 𝐌𝐀𝐒𝐇𝐓𝐑𝐔𝐀𝐑 𝐍𝐆𝐀 𝐌𝐀𝐑𝐑𝐄̈𝐕𝐄𝐒𝐇𝐉𝐄𝐓 𝐅𝐀𝐌𝐈𝐋𝐉𝐀𝐑𝐄?

Shumë familje, sidomos në të kaluarën, kanë blerë tokë së bashku me mund dhe kursime të përbashkëta. Mirëpo, për arsye praktike apo përfitime shtesash që lidhnin regjistrimet e fëmijëve, prona shpesh regjistrohej vetëm në emër të një personi dhe jo në emër të të gjithë atyre që kishin kontribuar në blerje.

Në fillim kjo dukej si një marrëveshje e thjeshtë e bazuar në besim. Por më vonë, kur personi që figuron si pronar i vetëm vendoste ta shiste tokën pa njoftuar askënd, nisnin problemet e mëdha. Në dokumente ai shihej si pronar legjitim, ndërsa të tjerët mbeteshin jashtë, edhe pse realisht kishin marrë pjesë në blerje.

Në këto raste, anëtarët e tjerë të familjes që kanë kontribuar në blerje kanë të drejtë padie. Ligji njeh faktin se prona është fituar në mënyrë të përbashkët, edhe pse regjistrimi formal është bërë në emër të një personi të vetëm. Gjykata është institucioni që vendos mbi të drejtat reale dhe mbi pasojat e një sh*tjeje të tillë.

𝐑𝐎𝐋𝐈 𝐈 𝐄𝐗𝐏𝐄𝐑𝐓𝐈𝐓 𝐆𝐉𝐘𝐐𝐄𝐒𝐎𝐑

Në këtë pikë hyn detyra ime si ekspert gjyqësor i gjeodezisë. Roli im është të:
- Analizoj dokumentacionin kadastral dhe kontratat që lidhen me pronën.
- Verifikoj historikun e pronës dhe të gjitha ndryshimet e pronësisë ndër vite.
- Konstatoj gjendjen faktike në terren dhe krahasimin e saj me të dhënat e regjistruara.
- Përgatis një raport profesional e të paanshëm, të cilin e paraqes në gjykatë.

Ky raport është mjeti kryesor që i jep gjykatës një pasqyrë të qartë e të saktë, duke ndihmuar që vendimi përfundimtar të jetë i drejtë dhe i bazuar në prova të forta.

Ky rast është mësim i madh për të gjithë: mos u mjaftoni vetëm me marrëveshje verbale ose besim familjar. Dokumentoni çdo marrëveshje, regjistroni pronën në mënyrë të drejtë dhe të barabartë, dhe sigurohuni që kontributi i secilit të jetë i mbrojtur ligjërisht. Vetëm kështu shmangen konfliktet dhe zhgënjimet e rënda që zgjasin me vite.

Arbër Peci
Ekspert gjyqësor i gjeodezisë

08/09/2025

𝐀𝐆𝐉𝐄𝐍𝐂𝐈𝐎𝐍𝐈 𝐐𝐄̈ 𝐔𝐃𝐇𝐄̈𝐇𝐈𝐐𝐄𝐓 𝐍𝐄̈ 𝐌𝐄̈𝐍𝐘𝐑𝐄̈ 𝐓𝐄̈ 𝐃𝐔𝐇𝐔𝐑

Agjencia Kadastrale e Kosovës udhëhiqet në mënyrë të duhur, duke e dëshmuar këtë me ndryshimet dhe përmirësimet që po bëhen vazhdimisht.

Qytetarët e vërejnë qartë këtë progres në digjitalizimin e proceseve, rritjen e transparencës dhe lehtësimin e shërbimeve.
Çdo hap i ri është pjesë e një vizioni afatgjatë për një sistem kadastral modern dhe të besueshëm.

Ky zhvillim i qëndrueshëm është tregues i një udhëheqjeje që i shërben interesit publik dhe që përdor teknologjinë si mjet për ta afruar institucionin me qytetarët.

11/08/2025

𝐒𝐇𝐄𝐌𝐁𝐔𝐋𝐋 𝐑𝐀𝐒𝐓𝐈 𝐆𝐉𝐘𝐐𝐄̈𝐒𝐎𝐑 – 𝐌𝐎𝐒𝐌𝐀𝐑𝐑𝐄̈𝐕𝐄𝐒𝐇𝐉𝐄 𝐏𝐄̈𝐑 𝐏𝐑𝐎𝐍𝐄̈𝐒𝐈𝐍𝐄̈ 𝐃𝐇𝐄 𝐊𝐔𝐅𝐈𝐑𝐈𝐍 𝐄 𝐏𝐀𝐑𝐂𝐄𝐋𝐄̈𝐒

Të dhënat themelore
• Paditësi: Pronari i regjistruar i parcelës kadastrale nr. ###, zonë kadastrale e një komune në Kosovë.
• I padituri: Pronari i parcelës fqinje me numër kadastral YYY.

Përshkrimi i konfliktit
Paditësi pretendon se një sipërfaqe prej rreth 200 m² e parcelës së tij është uzurpuar nga i padituri, i cili ka vendosur një gardh të ri duke e zhvendosur vijën kufitare nga pozicioni i regjistruar në planin kadastral. Sipas paditësit, dokumentet zyrtare kadastrale dhe certifikata e pronësisë dëshmojnë qartë se ajo sipërfaqe i takon atij.

I padituri, në anën tjetër, pretendon se gardhi është vendosur sipas vijës kufitare historike që ka ekzistuar në terren prej vitesh dhe se ndryshimi në hartat kadastrale është pasojë e gabimeve teknike gjatë përditësimeve pas vitit 2004.

Veprimet procedurale
Gjykata urdhëron:
• Sigurimin e dokumentacionit historik dhe aktual nga Agjencia Kadastrale.
• Marrjen e dëshmive nga dëshmitarët që njohin historikun e kufirit.
• Kryerjen e një ekspertize gjeodezike për të përcaktuar vijën kufitare ligjore dhe për të krahasuar gjendjen faktike në terren me atë në regjistrat kadastralë.

Roli i ekspertit gjeodet
Si ekspert gjyqësor, detyra është të:
• Analizoj dokumentacionin kadastral historik dhe aktual.
• Mat terrenin sipas koordinatave të regjistruara.
• Përgatis raportin për gjykatën me gjetjet dhe interpretimin teknik, duke treguar qartë kufirin ligjor.

Pika kyçe e kontestit
Ky rast ilustron dallimin mes kufirit ligjor të regjistruar dhe kufirit faktik të përdorur në terren për vite të tëra një nga konfliktet më të shpeshta në gjykatat civile që kërkon ekspertizë profesionale për zgjidhje.

Ky është një shembull rasti nga praktika ime si ekspert gjyqësor i licencuar për gjeodezi, Arbër Peci.

01/08/2025

𝐍𝐔𝐊 𝐊𝐀 𝐓𝐎𝐊𝐄̈ 𝐏𝐀 𝐏𝐑𝐎𝐍𝐀𝐑 𝐍𝐄̈ 𝐊𝐀𝐃𝐀𝐒𝐓𝐄̈𝐑

Shumë herë dëgjojmë shprehjen:
“Kjo tokë nuk është e askujt”, ose
“Prona është e lirë, veç regjistroje në emrin tënd.”

Në praktikën profesionale dhe ligjore, kjo nuk qëndron fare.

Çdo njësi kadastrale në Kosovë ka një pronar të regjistruar qoftë:
– Shteti
– Komuna
– Një person fizik
– Një trashëgimi pa ndarë
– Apo një pronar i përkohshëm në verifikim

Nëse një parcelë nuk ka të dhëna të qarta, kjo nuk do të thotë që është pa pronar, por që duhet:
– Të verifikohet historiku i saj
– Të shqyrtohet kujdestaria kadastrale
– Të hetohet nëse është tokë publike apo pronë e mbetur pa trashëgimtar

Si ekspert gjyqësor për gjeodezi, e them me bindje:
“E papërdorur” nuk do të thotë “e përvetësueshme”.
“E pabanuar” nuk do të thotë “e përbashkët”.

Çdo veprim mbi një pronë që “nuk është e askujt” është rrezik ligjor për atë që e ndërmerr.

Arbër Peci
Ekspert Gjyqësor për Gjeodezi dhe Kadastër

30/07/2025

𝐊𝐔𝐑 𝐏𝐀𝐃𝐈𝐀 𝐅𝐎𝐑𝐌𝐔𝐋𝐎𝐇𝐄𝐓 𝐆𝐀𝐁𝐈𝐌, 𝐏𝐄̈𝐒𝐎𝐍 𝐊𝐋𝐈𝐄𝐍𝐓𝐈

Gjatë përvojës sime si ekspert gjyqësor për çështje të pronësisë, kam hasur raste konkrete ku gabimi në përpilimin e padisë nga avokati ka sjellë pasoja serioze për klientin jo për shkak të mungesës së fakteve, por për shkak të formulimit të gabuar juridik.

Po ndaj një rast tipik nga praktika:

Ekziston pronari A, i cili ka një parcel prej 500 m², dhe pronari B me parcelë ngjitur prej 300 m². Sipas certifikatave të pronësisë dhe kufijve digjitalë, gjithçka është e qartë por në teren, pronari B kishte ndërtuar një pjesë të shtëpisë mbi parcelën e pronarit A, në sipërfaqe prej 30 m², dhe kjo ndërtesë ka qëndruar aty mbi 20 vjet.

Në vend që të ngritej padi për vërtetim të pronësisë përmes parashkrimit fitues, avokati i pronarit B ngriti padi për rregullim kufiri sikur të bëhej fjalë për një paqartësi teknike mes parcelave, e jo për pretendim pronësie mbi një pjesë të tokës që i përket tjetrit.

Problemi?
Kufiri ka qenë i qartë në dokumente dhe në terren. Mosmarrëveshja nuk ishte kufitare, por lidhej me pretendimin për fitim pronësie përmes përdorimit të gjatë dhe ndërtimit pa kundërshtim.

Rezultati? Gjykata e hodhi poshtë padinë, sepse lloji i padisë nuk korrespondonte me thelbësinë juridike të çështjes, dhe klienti humbi rastin të kërkojë njohjen e së drejtës së tij në mënyrë të ligjshme.

———-

Si ekspert gjyqësor, unë mund të konstatoj faktet, kufijtë dhe gjendjen e pronës në terren, por nëse padia nuk është ngritur drejt, atëherë as gjykata nuk mund të japë vendim të drejtë, sepse është e kufizuar nga ajo që është kërkuar.

———-

Këshilla ime si profesionist i terrenit dhe i ligjit:
Mos e nënvlerësoni emërtimin e saktë dhe përmbajtjen e padisë. Kërkoni opinion të dytë nëse nuk jeni të sigurt. Sepse një fjalë e gabuar në titullin e padisë mund të kushtojë me dekada pasiguri në pronë.