05/10/2026
MIRËNJOHJE DHE FALËNDERIM 🤝
Sot patëm kënaqësinë të jemi së bashku në një drekë të organizuar nga Fondacioni “Amaneti”, me drejtor z. Blerim Arifi, fondacion i cili ka qenë një ndër mbështetësit kryesorë në realizimin e projektit madhor të Xhamisë së fshatit Bllacë.
Në këtë takim morën pjesë përfaqësues të Këshillit të Bashkësisë Islame në Suharekë, në krye me kryetarin Haki ef. Hoxha dhe bashkëpunëtorët e tij, përfaqësues të Pro Arkitekturë, që ka realizuar projektimin e xhamisë, kompania punëkryese I Seferi, si dhe bashkëpunëtorë e kontribues të tjerë të këtij projekti.
Ishte një takim i mirë për të reflektuar mbi rrugëtimin që kemi bërë së bashku: nga projekti dhe fillimi i punimeve, deri te xhamia që sot është në shërbim të xhematit tonë.
Në emrin tim si imam, por edhe në emër të xhematit të Bllacës, shpreh mirënjohjen dhe falënderimin më të sinqertë për Fondacionin “Amaneti”, i cili për realizimin e xhamisë sonë ka siguruar një donacion prej 115,000 euro.
Ky është një kontribut i jashtëzakonshëm dhe një mirësi që do të mbetet gjatë në kujtesën e këtij vendi. Allahu i shpërbleftë të gjithë ata që kanë qenë sebep dhe kanë kontribuar në ngritjen e kësaj shtëpie të Allahut.
Mirënjohje edhe për KBI-në në Suharekë, projektuesit, punëkryesit, donatorët, bashkëfshatarët tanë brenda dhe jashtë vendit dhe secilin që ka dhënë kontribut, qoftë financiar, profesional apo me punën dhe kohën e tij.
Puna jonë ende nuk ka përfunduar. Na mbeten punë të rëndësishme në infrastrukturën e jashtme dhe rregullimin përfundimtar të hapësirave përreth xhamisë, të cilat synojmë t’i përfundojmë me të njëjtin përkushtim.
Njëkohësisht, dëshiroj ta njoftoj xhematin se së shpejti do të publikojmë listën përfundimtare dhe transparente të donacioneve të mbledhura për Xhaminë e fshatit Bllacë, në mënyrë që çdo kontribut të evidentohet dhe çdo donator të marrë mirënjohjen që meriton.
Xhamia nuk u ngrit nga një dorë e vetme. Ajo u ngrit nga shumë duar, shumë zemra dhe shumë njerëz që besuan në një qëllim të përbashkët.
Allahu e bëftë këtë xhami sadaka rrjedhëse për secilin që kontribuoi në të, e mbushtë gjithmonë me namaz, Kur’an, dije dhe gjenerata që do ta adhurojnë Allahun në të.
Allahu ju shpërbleftë të gjithëve me të mira!
Faleminderit nga zemra! 🤲
Naser ef. Hoxha
Imam i Xhamisë së fshatit Bllacë
